1Pedro 1:7 - Tradução Bíblica Pacaas Novos

⁷ Noro jein ouro ca om awi cara ma', ca an tom pe xine ma'. Awi paxi' na, ane awi tamana pan capa' ca howa nuhu' ne nuhu' Iri' Jam. Je ca to' i'ina cuhu' oro carawa pain xocori ca' nuhu', ma' ta querec pin' xihwe pain ca howa iri'o' hun Jeju ta nuhu'. Ma' ta awi hwe, tomi' querec te tamana inuhu', hohot tamana mahu' ta xuhu' ca' turuhu' pain xec nein ca aram aram in qui' ta' nucun Jeju Cristo ta.

1Pedro 1:7 Iomraidhean Croise

Mateus 19:28

Ame hwe e' ac caparut na. Maqui' cain' tara xec nein ca quep xocori pin tain cain oro carawa pain macan' ta na Iri' Jam ca'. Xao pe ho' pin ac tain tara ca mam' xao pe ne pain ca taramaxicon pin ta' ta' ca'. Wata' pain ca Iri' Wari' ta' ca', taramaxicon hwara' opa pin ac ta' tara ta. Awi tamana tara ca taramaxicon ne. Taramaxicon wi ac mahu' tara quem. Wahu' pain ca taxipa' mahu' ma', xao to xao to xam' ac hwein tara ca mam' xao pe nucun taramaxicon. Ma' 12 tara ca mam' xao to nuhu' pain ca taramaxicon wi mahu'. Taramaxicon to ho' ac huhun tara waram winacocon mana panxica Israel cara pane, co ma' 12 nana cara pane. Tomi' iri'o' inuhu'.

Mateus 25:21

Awi na ta ac con na. Awi na ca taramaja nem, taramaja xo' ma ma' ira. Mam' taramaja xo' main wijimain dinheiro ne cara pane. Je ca mi' hwara' mami' xim xim pain, ma' ta mam' taramaja xo' mami' main quem. Maji tomi' querec te wi xi' e' ac con na.

Mateus 25:23

Awi na ta ac con na. Awi na ca taramaja nem, taramaja xo' ma ma' ira. Mam' taramaja xo' main wijimain dinheiro ne cara pane. Je ca mi' hwara' mami' xim xim pain, ma' ta mam' taramaja xo' mami' main quem. Maji tomi' querec te wi xi' e' ac con na quem.

Lucas 12:33

Je ca tomi' xuhu' ca': Vender jein caramajuhu' ma'. Cut iri jein dinheiro nein ne, mi' mi' ac huhun pain tara oro wari' co om nonon carawa. Ma' ac cuhu' tara oro carawa ca om pi' ra ha' ma'. Ac ca cut in xo' tamana hwein tara carawa pain pawin cain. To wet cara ac ne tara quem. Om ara xi' nain i cain wari' co cut noc xa tain nain oro caramajixi', om nain i cain oro caxicon tohoro' co cao' nain quem.

Lucas 17:30

Ac i ma' tatara oro wari' pain xec nein ca in qui' ta' ne quem. Om ta maqui' ca ma' tatarapa'. Ara ara e' tatarain oro ca ara taxipa' caca ma', ane ane hwet pa' ac toton tara. Wata' pain ca Iri' Wari' ta' ca', ane ane hwet pa' ac toton tara ta.

João 12:26

Wari' co taramaja mi' xim napa' ma', na e' na pain ca ja' ja' cara capa'. Oro ca mao ne ca', je tara ca mao ca quem, pe ho' tarapa' quem. Wari' co taramaja mi' napa' ma', tomi' querec te ac tocwa tara, hohot ma ta ac tocwa tara. Wirico Te tara co hohot ma pan ton non ta na ca tomi' tococwa ma'.

João 5:44

Cain' cain' xihwe quem? Ma' na ca howa ac hwe ra? Xi param e' ara huhun oro wari' pain ca in ac cucuhu' ma'. Je xi in ac tarapari' ta hun Iri' Jam co xica' xat cwa' quem?

Atos 8:20

Ane tomi' in pin pan con Pedro ne: Jao jao mao ra pain dinheiro nem pain cote ne xe cain ta non. Cain' cain' xima quem? Na tarapa' pain ca mam' an ta' pain dinheiro main carawa ca mi' e' ca Iri' Jam ra?

Romanos 2:10

Ane tomi' querec te toton cocon oro wari' co tama' ara nanain ca awi wa ne. Hohot hwe ta totoron. Tomi' querec te inuhu' ta totoron. Mi' xuhu' pain ca om toron ne xumuhu' ta totoron. Tomi' cain' ac i ma' totoron oro win judeu ta', tomi' ac i ma' ac cuhu' tara pain ca om judeu hwe ma' quem.

Romanos 2:29

Om ca judeu ca wari' co tomi' ha' e' nain ca xirao' nucun Moisés ta. Judeu na wari' co iri' judeu pain iri' ximicon ma', co ac ca wac xirac xine na pain iri' ca coromicat nucun. Je Tamataracon Iri' Jam ca wac xirac non ma'. Wari' co wac xirac ac i ma' wa, wirico co hohot napa' ta ca Iri' Jam. Om na wari' co hohot na ta non.

Romanos 2:7

Oro wari' co tama' ara nanain oro ca awi wa pain ca win xumu cacain ca tomi' querec te nucun Iri' Jam ma', coromicat ca' ac caca na: Tomi' querec te tarapari' Iri' Jam ta. Hohot hwe tarapari', to' e' cara xuhu' tarapari' ta nana. Wiricoco tatara co mi' wawa pain ca e' cara wa.

Romanos 8:19

Winim' non Iri' Jam oro carawa ca tomi' ma' pin ca ca'. Winim' non pain ca aram aram cut hwerehwet to xim capari' pain ca aram aram momon cwa' mana panxita' cwa' xim capari' ca'. Mija na ca winim' con, winim' cara non, jain jain na, param tamana non pain ca cut hwerehwet to xim capari' ca'.

1 Coríntios 3:13

Aram aram querec pin' ac xine tara oro ca taramaja nucun pain ca quep xam' pin cain xirim ma'. Ac i ma' tara pain xec nein ca aram aram maqui' ta' ca Cristo quem. Maqui' iri tara ne, ac ca tom tain cain ne oro ca taramaja nucucun co pijim' nanain capijacon Iri' Jam, querec pin' ac xine tara quem. Am awi ne ca taramaja nucucun, am om awi ne cocon, querec pin' querec pin' xam' ac xine tara oro ca taramaja nucucun.

1 Coríntios 4:5

Je ca tomi' xuhu' ca': Ta tomi' em' hap huhun pain ca taramaja nucucun oro wari' me ta. Winim' jein xec nein ca in qui' ta ca Taramaxicon nexi'. Wirico tara co an hwet pin tain nain oro ca coromicat nucucun oro wari' ca joc xim caca ira. Para taramaja mi' cocon Cristo quem? Om na, wirico tara co to' querec pin' napari' pain oro ca coromicat nucucun pain ca taramaja mi' cocon ma'. Wirico tara co tomi' nonon oro wari' co taramaja xo' nana. Mo ta taramaja xo' caca pain ca e' e' wet nucucun pane, hohot ma ta ac cocon tara, taramaja xo' ma ma' ira ac cocon tara, tomi' tomi' xam' ac cocon tara ta.

Tiago 1:12

Param mi' ta pain ca awi wa wari' co hwara' opa cara pain ca quereme cain oro ca to' i'ina non ma'. Querec pin' pan iri toron Iri' Jam ne, pain ca hohot mapa' ta con ma', mi' ac con pain tara carawa ca wara tomi' pe con ma', pain ca e' pe ho' cara ne ta con ma'. Wari' pain ca om noc xun ca', wara tomi' pe napari' pain i ma' ta.

1Pedro 1:13

Je ca tomi' xuhu' ca'. Coromicat xo' je. Wara awori xo' je pain ca ara xin hwein ca param nucun Iri' Jam. Ma' tara xumuhu'. Howa mip jun Iri' Jam pain ca xiram pa' xim cuhu' ma', pain ca to' witan e' xim cuhu' pain ca in qui' ta' nucun Jeju Cristo ta.

1Pedro 1:5

Querec wet xo' nuhu' quem, xi om ne ca howa ara hun ta. Mam' querec wet xo' nuhu' pain ca hwara' opa nucun. Querec wet xo' querec wet xo', aram aram maqui' pa' ac cuhu' tara xec nein ca to' witan pin toton cuhu' ma'. Wara awori xo' na, winim' e' nain xec nein ca an hwet mi' toton cuhu' pain ca param nucun ma', pain ca to' witan pin toton cuhu' ma'.

1Pedro 2:4

Wixicam pin hun Taramaxicon nexi' Jeju co an xiho' nain pacun ca e' ma', ca to' teren nain xirim. Noc urut pum ta paxi' nonon oro wari' pane, ane tora' pan con Iri' Jam ne. Hohot tamana ara xi' mapa' ta non pane.

1Pedro 2:7

Je ca tomi' xuhu' ca'. Hohot tamana nuhu' Cristo co an xiho' nain pacun ca to' teren nain xirim ma', xi om ne ca howa ara hun ta. Oro co om howa nonon ma' iri nana ne, an xiho' nonon oro co noc nonon ma'. Win ne ca xirao' pe xine pain capijacon Iri' Jam ma' quem: Pacun ca noc caca caram ma' co quep xin nanain xirim ma', aram aram iri' pacun ca to' teren nain xirim pin na ta. Ac i ma' na ca xirao' pe nein ma'.

1Pedro 4:12

Je ca tomi' xuhu' pain ca tomi' querec te xuhu' ca'. Mija paxi' na ca quep em' xihwe ma', ma' ta querec pin' xihwe pain ca howa hwara' opa nuhu' ma'. Je i ma' ira, ta wa ina me hwe me, ta tomi' ximama' hwe pain ca para quep em' cacapa' ne hwe me, je xi nain ho' capa' pain ca jain jain tamana wa Iri' Jam ca' hwe quem me.

1Pedro 4:13

Jain jain iri hwe pain ca quep em' xihwe pain ca howa hun Cristo ne, jain jain wi ac hun na. Je ta tomi' querec te qui' hwe pain, ma' ta tomi' querec te tamana hwe pain ca aram aram an hwet mi' xim capari' pain ca hwara' opa nucun pain ca awi tamana nucun quem.

1Pedro 5:1

Je ca tomi' xuhu' pain ca querec wet huhun oro co howa nonon Jeju ma'. Tomi' mip inuhu', xi om ne ca querec wet pan ara toton oro co howa nonon Jeju pain i ca' ta. Tomi' hwet inonon oro wari' pain ca jain jain nucun Cristo, jao jao ma' ton pain ca an hwet pe xine ca awi nucun pain ca hwara' opa nucun quem.

2 Pedro 1:1

Simão Pedro ina pain ca xirao' mi' xuhu' ca'. Taramaja mi' inon Jeju Cristo. Apóstolo ra napa' pain ca tomi' hwet roron pain capija oro wari' capa' pane. Xirao' mi' inuhu' pain ca win ma' ne xijexi' pain ca howa xun Jeju Cristo. Wirico co Iri' Jam ne iri' cwa', co to' witan napari' cwa'. Om ca tomi' querec te paxica' capari', mi' mi' pi' pin napari' pain ca howa xun ca'. An an ari xijein ca howa nexi' quem.

2 Pedro 1:4

Je ca mam' ara mi' capari' pain oro ca wara tomi' pe ca pane. Awi tamana na oro ca wara tomi' pe nucun, om ca em' camain' ne, hohot tamana na oro ca param mi' capari'. Ma' ta witan ca' hwein oro ca to' em' nuhu' ma', ca maqui' nein oro ca param pan tem wa pain macan' ca' napari'. Ma' ta an xiho' mahu' pain ca ara xo' ne pain ca Iri' Jam ne ta napari' quem.

2 Pedro 3:14

Je ca tomi' xuhu' pain ca tomi' querec te xuhu' ca'. Pain ca winim' xin hwein xec nucun Taramaxicon nexi' ma', xuruxut xo' e' je, win xumu jein. Ma' ta querec hohot cuhu' Iri' Jam pain ca om toron ne xumuhu' ma', je pain ca om cuhu' ca caracat wa ma', je pain ca om ma' camain' cuhu' oro ca tomi' em' xihwe pain ca caracat wa pain ca aram aram coco' quima hwet xun hun ma'.

Judas 1:24

Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.

Apocalipse 1:7

Noro je! Maqui' tara pain tajain nanawin Jeju. Querec querec pi' pin totoron oro wari'. Oro wari' co xucun' pa' nonon quem, querec querec pi' pin totoron. Awaran awaran pi' pin ac caca tara con oro xucucun wari' pain oro xijein macan'. Amém, iri'o' na ca tomi' ne ta.

Apocalipse 2:10

Ta jin' hwein oro ca jain jain wa ca maqui' pa' xim nuhu' con Caxicon Jam me ta. Ma' tatara oro win ma' nuhu' co wixicao' mi' ca pain xirinain ca tao' to tao' to to wa, quep em' querec ac tococwa tara, am an pe pin xin hwein ca howa nuhu' ta ac tococwa tara quem. Ma' 10 tara xec pain ca jain jain xi' hwe pain ca quep em' xim cuhu' Caxicon Jam. Win xumu cara xine me. Mo ta to' parapa' pin xim cucuhu' pain ca howa mahu' ma', je i ma' ira, to' parapa' pin ma' tatarapa' ne ac huhun tara. Mi' pan ac xuhu' tara pain ca om pi' ra ha' ne ca e' wa ta.

Apocalipse 3:10

Wara hu inuhu' pane, quereme cara jein oro ca to' i'ina nuhu' me inuhu' pane. Tomi' ha' mahu' quem. Je ca narain ho' xim xuhu' pain ca jain jain wa pain oro xec pain ca to' jain jain toton ta' oro wari' co to nanain macan' ma'.

Apocalipse 3:18

Hu ca' inuhu': Cut xine pain ouro ne ca om em' camain' ca', ma' ta caramaju iri'o' pin hwe ta inuhu'. Cut jun wom co towo' cwa' quem, ma' ta to hun, ma' ta wixipa' wixipa' om pin hwe pain ca om cuhu' wom ma', pain ca hwet pe e' ne curuhu' ma' inuhu'. Cut jein aramao aramao toc ma', ma' ta aramao xio pin hwein tucuhu' ma', ma' ta querec iri'o' hwe ta inuhu'.