1Pedro 1:3 - Tradução Bíblica Pacaas Novos

³ Tomi' hwet xin ca awi tamana nucun Iri' Jam co Te ca Taramaxicon nexi' Jeju Cristo ta. Xiram pa' tamana napari'. Mam' mi' napari' pain xocori ca e' wa pain ca to' e' mami' con Jeju Cristo ta. Je ca om tara con ta'a camain' xun pain ca howa xun ca', pain ca winim' xun pain oro ca mi' xim capari' ma'.

1Pedro 1:3 Iomraidhean Croise

João 1:13

Om ca to' mana panxica Iri' Jam tococwa cocon oro hwanana nucucun. Om ca to' mana panxica Iri' Jam tococwa cocon cote caca cacam jicocon pain ca ma' xirapari' pije' na cacama. Om ca to' mana panxica Iri' Jam tococwa cocon cote caca pain ca wanxi' tococwa quem. Wirico Iri' Jam pan na co mi' nonon pain ca mana panxica pin caca ma'.

Romanos 12:12

Tomi' querec te je. Xi ma' ara ne carawa ca awi ca mi' xim capari' Iri' Jam ta. Jain jain iri hwe pain ca to' i'ina cuhu' carawa ma' ne, ta naro hwe me ta. Hwara' opa cara je. Tama' tomi' jun Iri' Jam quem.

Romanos 15:13

Wirico Iri' Jam co mi' napari' pain ca howa xun pain ca winim' cara xin oro carawa ca awi ca mi' xim capari' ca'. Param inon pain ca mi' cuhu' pain ca tomi' querec te wa, param inon pain ca mi' cuhu' pain ca om toron ne xumuhu' quem. Xi howa ara hun ta. Param inain Tamataracon pain ca mi' mi' tiquin' cuhu' pain ca winim' cara hun ma'. Mam' mi' turuhu' pain ca winim' cara wa pain ca hwara' opa nein quem.

Romanos 4:25

Je ca tomi' xuhu' ca'. Om ca nain ho' con Jeju Iri' Jam pane. To' pa' pin jun tata co to' pa' pin xun nonon pane. Xi om ne ca caracat nexi' ta. To' e' mami' ac con na quem. Ma' ta to' hohot pin xuhu' ta napari' ta.

Romanos 5:10

Noc paxi' urun Iri' Jam pane ira, ane cut in pan capari' ne. Taxipa' pin ac urun na. Xi mi' pin ara ca Panxica ta. Wirico Panxica co to' taxipa' pin napari' con, taxi' urun. Je ca taxi' mip xun pain i ca' quem, pain ca main to' witan pin xim capari' ca', xi e' ara ca ta.

Romanos 8:11

Mo ta pe ho' capari' pain ximixi' Tamataracon Iri' Jam ca to' e' mami' non Jeju pane, main to' e' mami' ac capari' tara quem. Main to' e' mami' tarapari' Iri' Jam co to' e' mami' non Cristo Jeju pane. Pain ca aram aram mi' pin ta' ne cwerexi' ca', to' e' mami' ac capari' tara. Tamataracon ca pe ho' napari' ca', je tara ca mam' to' e' mami' capari' quem.

Romanos 8:24

Je ca winim' iri' ca', pain ca xo' to' witan qui' capari' Iri' Jam pane, winim' cara ac irin na oro ca mi' xim capari'. Mo xi wara ma' capari' oro ca mi' xim capari' ca', je i ma' xira ca om winim' winim' wet qui' xin quem. Je ca tomi' xuhu' ca': Pain ca wara ma' con carawa wari' ma', om ca winim' winim' wet cain.

1 Coríntios 13:13

Je ca tomi' xuhu' ca': Ma' 3 na ca ara cara je capari' Iri' Jam. Mo na: Na e' na pain ca howa cara xun. Na e' na pain ca winim' cara xun pain ca mi' xim capari' pain carawa ca wara tomi' pe mi' capari'. Na e' na pain ca an xiho' cara xun pain ca om noc capari' ca', je pain ca om noc cocon oro wari' ma' quem. Awi paxi' na ca howa tocwa Iri' Jam. Awi paxi' na ca winim' tocwa quem. Ca an xiho' tocwa pain ca om noc capari' ca', je pain ca om noc cocon oro wari' ma' iri na ne, awi tamana pan na ta.

1 Coríntios 15:20

Ane to' e' mami' con Cristo Iri' Jam ne. Iri'o' na, wirico co to' e' mami' cain' wa pane. Je ca taxi' xuxun oro wari' co howa nonon ma' quem. Cono' paxi' nana, ane to' e' mami' xun tococwa ne.

2 Coríntios 1:3

Tomi' hwet xin ca awi tamana nucun Iri' Jam co Te ca Taramaxicon nexi' Jeju Cristo ta. Xiram pa' tamana napari', to' hwara' opa napari' pain ximixi' quem.

Gálatas 6:16

Tomi' mi' tomi' mi' pi' pin inonon con Iri' Jam oro wari' co xuruxut xo' nana pain ca tomi' ha' cacain ca xirao' ne ca'. Mi' roron pain ca om toron ne ximicocon, xiram pa' roron quem inon cocon. Oro co xuruxut xo' nana pain ca tomi' ha' cacain ca xirao' ne ma', wiricoco nana co iri' wari' nucun Iri' Jam nana ta. Win caca oro wari' nein Israel co iri' wari' ne ca pane quem.

Efésios 1:17

Tomi' inon Cotere' co awi tamana ma', pain ca om caracat nucun pain ca hwara' opa tamana nucun ma', co Iri' Jam ne ca Taramaxicon nexi' Jeju Cristo. Tomi' mi' ac i ca' inuhu' con: Mi' roron pain ca taxi' wa, mi' roron pain ca taraju pa' wa quem, mam' mi' roron pain Tamataram, ma' ta querec pin' quequem pain iri' xumum, ac i ma' na ca tomi' mi' xuhu' con.

Efésios 1:3

Tomi' querec te xun Iri' Jam co Te ca Taramaxicon nexi' Jeju Cristo. Ja' tomi' querec te napari' pain iri' ximixi' ca' quem. Xi mi' mi' pi' pin ara capari' pain oro caramaxicon ca awi ca to pawin cain. Win cwere ara xi' urun Cristo.

Efésios 1:7

To' witan ca' napari' pain ca caracat nexi' Cristo. Xi ao mao ara ne quicon pain ca mi' pin caho' capari' pane. Je ca xic am pin cain ca caracat nexi' Iri' Jam quem. Xiram pa' tamana e' napari' ta.

Efésios 2:4

Ane xiram pa' tamana capari' Iri' Jam ne. Om ca noc camain' capari'.

Efésios 3:20

Tomi' querec te xun Iri' Jam co hwara' opa tamana ta. Ha' ha' pi' pin non oro carawa. Ha' ha' tiquin' ca' nain ca param iri' ca' con. Ha' ha' tiquin' ca' cain ca coromicat iri' ca' quem. Win ne ca hwara' opa pe ho' capari' pain ximixi' ca'.

Colossenses 1:23

Mo ta howa tiquin' howa tiquin' hun Cristo ma', mo ta hwara' opa cara hwe pain ca howa nuhu' ma', mi' ac cuhu' tara pain ca om ma' camain' cuhu' ca to' em' nuhu' ma'. Ta howa ni ca' camain' hwein capijacon Iri' Jam con Cristo me ta. Howa howa tiquin' jein oro ca wara tomi' pe nucun ca ara mi' xim cuhu' con. Wara pijim' xihwe pain pane, taraju hwein. Pijim' hwet pijim' hwet xam' tata pain oro xijein macan' oro wari' quem. Je ca taramaja ne ca' quem. Wata' pain ca Paulo ta' ca', pijim' hwet taxipa' inain capijacon Iri' Jam con Cristo.

Colossenses 1:27

Awi tamana na ca coromicat nucun Iri' Jam ca an hwet pin ca pain xocori ca'. Ac i ca' na ca coromicat mi' cuhu' pain ca om judeu hwe ma': Pe ho' turuhu' Cristo, win cwere turuhu' pain iri' xumuhu'. Wirico co to' taxi' nuhu' pain ca aram aram to ho' xun hun pain pawin cain.

1 Tessalonicenses 1:3

Tama' mam' pe wet urut pahu' pain ca taramaja nuhu' ma'. Taramaja mi' hun Iri' Jam, xi om ne ca howa ara hun ta. Jain jain huhun oro win ma' nuhu' pain ca quep xiho' xun huhun ma', xi noc camain' huhun ta. Quereme hwein oro ca to' i'ina cucuhu' ma' quem, xi om ne ca winim' ara hun Taramaxicon nexi' Jeju Cristo pain ca in qui' ta' nucun ma' quem. Je ca mam' pe wet urut ca', pain ca tomi' mi' urut pahu' con Cotere' Iri' Jam.

1 Tessalonicenses 4:13

Tomi' xo' xim urut pahu' cocon oro xerexi' co wara cono' nana quem xere. Taraju pa' je e'. Ma' ta om an xiho' huhun oro wari' co om coromicat xo' nana ma', co tara ta'a nana pain ca e' mami' xi' caca co wara cono' nana ma'.

2 Tessalonicenses 2:16

Tomi' mi' urut pahu' con Taramaxicon nexi' Jeju Cristo con Cotere' Iri' Jam. Om ca noc capari' Iri' Jam. Om ca pi' ra ha' ne ca to' hwara' opa cara capari'. Xiram pa' napari' pain ca mi' e' capari' pain ca momon winim' xun pain ca main mi' xim capari' pain carawa ca awi ca wara coromicat an pe xo' mi' capari' quem. Om xi mi' capari' pain, xi iri' wari' iri' ta. Ane xiram pa' pan capari' ne. Je ca mi' e' capari' pain.

1 Timóteo 1:14

Om xi xiram pa' capa' Taramaxicon nexi' Cristo Jeju pane, xi iri' wari' ta' ta. Ane xiram pa' tamana pan capa' ne. Mi' e' napa' pain ca howa ton. Mi' e' napa' pain ca om noc ton, je pain ca om noc toton oro wari' co howa nonon ma' quem.

Tito 2:13

Xuruxut xo' ac i ma' xi' pain ca winim' xin xec nein ca ja' tomi' querec te tamana xim capari', je xec nein ca main in qui' ta' ca Jeju Cristo pain ca toc meremem tamana nucun ta. Wirico Jeju Cristo co Iri' Jam ne iri' cwa'. Wirico co to' witan napari' cwa'.

Hebreus 3:6

Cristo cwa' iri na ne, co taramaja xo' taxipa' ma', querec wet xo' nain xiricon Cote ca, xi om ne ca iri' panxica ara ca ta. Xiricon Iri' Jam iri' quem. Je ca tomi' xuhu' ca'. Mo ta howa cara urun pain ca winim' xin oro carawa ca mi' xim capari' Iri' Jam cwa', xiricon ac iri' na ta.

Tiago 1:18

Mi' iri napari' pain ca howa xin capijacon ca iri'o' ca' ne, to' e' ac capari' na, mana panxita' pin ac capari' na quem. Maqui' nain ximicon, wirico co coromicat an pe mi' napari' pain. Tomi' ca' napari': Tomi' querec te paxi' inain oro carawa ca tomi' ma' ta' ca', ane tomi' querec te tamana pan xuhu' pain ca wari' ne xuhu' ca' ne napari'.

1Pedro 1:13

Je ca tomi' xuhu' ca'. Coromicat xo' je. Wara awori xo' je pain ca ara xin hwein ca param nucun Iri' Jam. Ma' tara xumuhu'. Howa mip jun Iri' Jam pain ca xiram pa' xim cuhu' ma', pain ca to' witan e' xim cuhu' pain ca in qui' ta' nucun Jeju Cristo ta.

1Pedro 1:21

Je ca howa pin hun Iri' Jam ma', xi om ca Cristo co to' e' mami' ca pane, co to' hwara' opa ca pain ca mi' con pain ca in ac in ac pi' pin cocon oro wari' quem. Je ca howa hun Iri' Jam ma'. Howa hun pain ca winim' hun ma', pain ca mi' xim cuhu' pain oro ca wara tomi' pe mi' cuhu' ma'.

1Pedro 1:23

Xi mi' ara cuhu' pain xocori ca e' wa pain ca to' camara' mami' cuhu' Iri' Jam ta. Xocori ca e' nuhu' ma', om ca maqui' con wari' co mi' pin. Maqui' non Iri' Jam co e' cara ma'. Mam' to' camara' nuhu' pain capijacon ca e' ma', ca om pi' ra ha' ma'.

1Pedro 2:2

An xiho' jejem oro hwijima' co xo' camara' nana ma', pain ca tama' param cacamain comi catat. Param tamana jein capijacon Iri' Jam ma', ca ac iri' comi catat ca om em' camain' ma', ca mi' capari' Tamataracon Iri' Jam ma' quem. Ma' ta horon horon tiquin' hwe ta nuhu'. Aram aram maqui' pa' ac cuhu' tara xec nein ca to' witan pin xim cuhu' ma'.

1Pedro 3:15

Win xumu jun Cristo, in ac e' jun pain iri' xumuhu'. Taramaxicon ne jun. Mo ta tomi' querec cucuhu' oro wari' ma', mo ta para howa hun Iri' Jam ma' cucuhu'. Wara awori xo' taxipa' ac hwe tara pain ca tomi' in hwet xo' huhun pain ca tomi' querec nucucun ma'.

1Pedro 3:21

Com ca to' witan nanam pane, tomi' joc mam' mi' nain com ca ja' iri' pain ca howa nexi' pain xocori ca' quem. Ja' iri irin com ne, om ca hohoc xin homirixi', om na. An hwet e' irin ca wara tomi' xun Iri' Jam pain ca hohoc pin rain ca caracat ne pain xumu me xun ca'. To' witan pin napari', xi om ne ca to' e' mami' ara con Jeju Cristo ta.

1Pedro 3:5

Xi ac i ma' ara cacama oro narima' co howa nonon Iri' Jam pain cara pane, pain ca winim' e' cocon Iri' Jam pain ca ara pin tain cain ca wara tomi' pe nucun pane. Ara awi xequequem pain ca tomi' ha' taxipa' cocon waram taxicacam ta.

1João 2:29

Wara taxi' hun pain ca ara xo' nucun ma', pain ca hohot con Iri' Jam pain oro ca ara nucun. Je ca taxi' hwein i ca' quem: Oro wari' co ara xo' taxipa' nana ma', pain ca hohot cocon Iri' Jam pain oro ca ara nucucun ma', wiricoco co mana panxica Iri' Jam nana quem.

1João 3:3

Oro wari' co winim' nanain xec nein ca mi' xun tococwa pain ca ac wirico Cristo pin caca ma', to ni ca' taxipa' nanain oro ca caracat wa ma'. Win ca Cristo pain ca pe ni ca' cain ca caracat wa ma' quem.

1João 3:9

Oro wari' co mana panxica Iri' Jam pin nana ma', om ca caracat taxipa' caca, xi ma' ara cocon iri' ca e' nucun Iri' Jam ta. Om ca caracat taxipa' ac caca, xi mana panxica Iri' Jam ara caca ta.

1João 4:7

Je ca tomi' xuhu' pain ca tomi' querec te xuhu' ca'. Ta noc xijexi' me, xi wirico Iri' Jam ara ca co mi' napari' pain ca om noc xijexi' ta. Wari' co om noc non win ma' ca ma', wirico co panxica Iri' Jam ta. Querec pin' ac con na quem.

1João 5:1

Mana panxica Iri' Jam nana oro wari' co howa nonon Jeju ma', pain ca Cristo ca ma'. Oro wari' co om noc nonon Cotere' Iri' Jam cwa', om ca noc cocon oro win ma' caca co Te nonon quem.

1João 5:18

Oro co mana panxita' ca Iri' Jam ma', taxi' ururun pain ca om caracat taxipa' caca ma'. Xi narain ho' pan ara tococwa con Caxicon Jam ta. Wirico Panxica Iri' Jam co narain ho' nonon ma'. Om ca quep xirac pan ac cocon Caxicon Jam ta.

1João 5:4

Wari' co panxica Iri' Jam ma', ha' ara xi' non pain ca to' quiji' pin cain oro ca om awi wa ca i'ina non pain macan' ca'. Je ca tomi' xuhu' ca': Je i ca' ca mam' to' quiji' pin xin quem, mam' to' quiji' pin irin pain ca howa xun Jeju Cristo ta.