1Pedro 1:2 - Tradução Bíblica Pacaas Novos

² Wara querec pin' nuhu' Cotere' Iri' Jam pain cara pane. Tora' nuhu', to' hohot pin nuhu' Tamataracon quem. Ma' ta tomi' ha' hun Jeju Cristo ta nuhu'. Ma' ta hohoc pin cuhu' pain quicon ta nuhu'. Param inon Cotere' Iri' Jam pain ca quep xiho' tamana cuhu' pain ca mi' cuhu' pain ca param nucun. Param inon pain ca mi' hwara' cuhu' pain ca om toron ne xumuhu' quem.

1Pedro 1:2 Iomraidhean Croise

Mateus 24:22

Mo xi om to' wijimain pin cain oro xec nein ca jain jain nucucun oro wari' Iri' Jam ma', om xi witan camain' caca. Ane to' wijimain pin tain cain ne. Xi ma' ara caca oro wari' nucun co tora' ca ma'.

Mateus 24:31

On mip ac ne tara caji taracom. Tomi' ac toton tara oro jam co taramaja mi' nanapa' ma'. Mama' jein oro xijein macan', cut in cut in xam' jujun oro wari' co tora' ca Iri' Jam ta, cut in qui' jujun pain oro xijein macan' pain pira ta, ac i ma' tara ca tomi' toton ta.

Marcos 13:20

Mo xi om to' wijimain pin cain oro xec nein ca jain jain nucucun oro wari' Iri' Jam ma', om xi witan camain' caca. Ane to' wijimain pin tain cain ne. Xi ma' ara caca oro wari' nucun co tora' ca ma'.

Marcos 13:27

Tomi' ac toton tara oro jam co taramaja mi' nanapa' ma': Mama' jein oro xijein macan' ta, cut in cut in pi' pin jujun oro wari' co tora' ca Iri' Jam ta, cut in qui' jujun pain oro xijein macan' pain pira ta, ac i ma' tara ca tomi' toton ta.

Lucas 18:7

Quep xiho' tam ta na. Om ta ac i ma' ca Iri' Jam quem ra? Om ta quep xiho' cocon oro wari' nucun co wara tora' ca ma', co tama' quep xiho' xut cocon oro wari' co mixein nanaparut cwa' nonon pain xec je pain xim quem ra? Miri'om cara totoron ra? Om ta miri'om cara cocon ta.

Atos 15:18

Wara an hwet pe inain ca coromicat an pe xo' ta' pain cara pane, pain ca xo' ma' ten qui' ne oro carawa pane. Ac i ma' na ca xirao' pe cacain ca tomi' nucun Iri' Jam oro profeta pane.

Atos 2:23

Iri' Jam ma', wara an pe xo' nain ca coromicat nucun pane, pain ca main quep totoron ta cuhu' con. Je ca om narain ho' cuhu' con. Quep hun, to' pa' pin jun ta ac huhun na oro caracat co om tomi' ha' camain' nonon Iri' Jam. Tatatain mi' ac cocon na pain pana.

Atos 20:32

Je ca tomi' xuhu' ca' ac tococwa na. Tomi' mi' inuhu' con Iri' Jam. Querec wet roron me inon pahu'. Mi' roron pain ca howa cara cacain capijam ca tomi' hwet naparut pain ca xiram pa' pan maparut ta inon pahu'. Mo ta howa cara hwein capijacon Iri' Jam ca pijim' hwet xuhu' pane, to' hwara' opa ac cuhu' tara, aram aram mi' ac cuhu' tara pain oro ca param nucun ca an to xo' mi' cuhu' ma', ca mi' xun tococwa oro wari' nucun co to' hohot ca cwa'.

Romanos 1:5

Tomi' hwet jein capija naparut Iri' Jam pane, pain ca taramaja mi' jun Jeju ta caparut pane. Awi tamana na ca taramaja mi' tocwa quem, pain ca tomi' hwet xine capijacon ca'! Wirico Jeju co mi' naparut pain ca taramaja mi' urut con ca'. Ma' ta howa cacapa' oro wari' pain oro xijein macan' ta naparut. Ma' ta tomi' ha' cacapa' quem naparut.

Romanos 1:7

Je ca xirao' mi' xirao' mi' pi' pin xuhu' ca', pain ca to hwein Roma ma'. Xirao' mi' inuhu' pain ca om noc cuhu' Iri' Jam pain ca oro wari' ne pin cuhu' ma'. Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Romanos 11:2

Iri' Jam ma', om ca noc caparut pain ca wari' nucun urut ca', xi wara tora' qui' ara tococwa oro hwanana nuxut pane ta. Taxi' ara xi' hwein ca xirao' pe xine capijacon Iri' Jam con Elias cara pane, pain ca tomi' mip qui' con Iri' Jam pain ca tomi' em' qui' cocon oro wari' nein Israel pane. Ca' na ca tomi' mip qui' con pane:

Romanos 11:28

Noc nonon Iri' Jam oro win judeu ta' cwa', xi howa je na cacain capijacon ca tomi' hwet napari' con Jeju. Je ca xiram pa' pan xihwe pain ca om judeu hwe ma' quem. Ane param param wet tococwa oro win judeu ta' cwa' ne. Wara tora' to tata, param tata, xi om ne ca tora' to ara tococwa oro hwanana nuxut pane, Abraão con Isaque con Jacó cara pane.

Romanos 15:16

pain ca taramaja mi' ron Cristo Jeju pain ca pijim' mi' momon con oro co om judeu nana ta capa' pahu' pane. Ara inain ca taramaja nucun wari' co tom tain' mi' taxipa' non pain carawa Iri' Jam ma', pain ca pijim' mi' xuhu' pain capijacon Iri' Jam ca tomi' hwet napari' con Jeju. Pijim' mi' inuhu' pain capijacon Iri' Jam, ma' ta tomi' querec te cuhu' pain ca o mi' xuhu' con inuhu'. Ac carawa ca mi' querec te wa hwe pata', ac ca cut mi' e' xuhu' con tara pain ca o mi' xuhu' con. Mam' to' hohot ara xi' nuhu' pain Tamataracon ta.

Romanos 16:19

Taxi' ara xi' nunuhu' oro xerexi' pain oro xijein cidade, taxi' taxi' pi' pin nunuhu' pain ca tomi' ha' taxipa' hwe ma' quem. Je ca tomi' querec te xuhu' ca'. Param inuhu' pain ca coromicat xo' hwe pain ca ara taxi' hwein ca awi wa. Noc inuhu' pain ca coromicat pan teretem hwe pain ca ara taxi' hwein ca om awi wa quem.

Romanos 16:26

Ane an hwet pe pin cain ca coromicat nucun con Jeju Cristo pain xocori ca' ne. Wara xirao' pe nanain oro profeta cara pane. Iri' Jam co e' cara ma', co om mi' pin ra na ma', wirico co tomi' naparut quem, pain ca pijim' mi' pijim' mi' pi' pin jujun pain capija oro wari' pain oro xijein macan' ta caparut. Ma' ta howa cacain, ma' ta tomi' ha' cacain capija quem naparut.

Romanos 8:13

Mo ta tama' tomi' ha' xin oro ca param nexi' ca', xuruxut xumu ac xin tara ca cono' wa. Pain ca an to pin xin oro caracat nexi' ma' iri na ne, ac ca to' parapa' pin xin tara, ac ca mam' to' parapa' pin xin tara pain Tamataracon Iri' Jam ma'. E' ac xi' tara ta.

Romanos 8:33

Tora' napari' Iri' Jam. Ma' tara wari' co tomi' em' napari' con Iri' Jam ra? Om na ta. Wirico Iri' Jam ara xi' na co wara to' hohot pin napari' ta.

1 Coríntios 1:30

Ane mi' cuhu' pain ca win cwere pin hun Cristo Jeju Iri' Jam ne. Wirico Cristo Jeju co to' taxi' napari' pain ca coromicat xo' nucun Iri' Jam ma', pain ca to' hohot capari' ca', je pain ca wari' ne capari' ca', je pain ca to' witan capari' ca' quem.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

2 Coríntios 10:5

Je ca mam' to' quiji' pin urut pain oro ca tomi' in pin caracan nucucun oro wari' ma', pain oro ca xin to nucucun pain ca to' i'ina cocon oro xucucun co querec pin' xun paxi' nonon Iri' Jam ma'. Je ca mam' to' quiji' pin urut pain oro ca coromicat pan teretem nucucun, ma' ta aram aram tomi' ha' pin cocon Cristo ta urut cocon.

Colossenses 3:12

Tora' nuhu' Iri' Jam, iri' wari' ne nuhu'. Om ca noc camain' cuhu'. Je ca hohot ne pain ca xiram pa' tamana xujuhu' ma'. An hwet mi' xujuhu' pain ca awi wa. Ta xec xec hwe me ta. Tomi' wixite xujuhu'. Tomi' pan hot xujuhu' quem.

2 Tessalonicenses 2:13

Je ca tomi' urut pahu' ca' xere. Om ca noc cuhu' Taramaxicon nexi'. Na e' na pain ca tama' tomi' querec te urut con Iri' Jam pahu'. Xi om ne ca wara tora' qui' ara cuhu' pain cara pane, pain ca main to' witan xuhu' ta qui' cuhu' pane. Mam' to' witan nuhu' pain ca hwara' opa nein Tamataracon ma', ca to' hohot pin nuhu' ma'. Mam' to' witan nuhu' pain ca howa nuhu' pain ca howa hwein capijacon ca iri'o' ma' quem.

2 Timóteo 2:10

Je ca quereme tain oro ca to' i'ina napa' ca'. Ma' ta quep xiho' toton oro wari' co tora' ca Iri' Jam ta ina. Quereme inain oro ca to' i'ina napa' ca'. Ma' ta to' witan pin tococwa pain ca howa cocon Cristo Jeju ma' inonon. Ma' ta mi' tococwa pain ca e' cara wa pain ca to ho' cara cocon Iri' Jam pain pawin cain.

Tito 1:1

Paulo ina pain ca xirao' mi' xim ca'. Wari' nucun Iri' Jam ina pain ca taramaja mi' e' ton ca'. Apóstolo ra napa' Jeju Cristo quem, pain ca tomi' hwet roron pain capija oro wari' ta capa' pane. Quep xiho' roron oro wari' co tora' ta' cwa' napa' pane. Ma' ta howa xo' cacapa' ta napa' cocon. Ma' ta taraju pa' cacain capija ca iri'o' ca', ca ca' na nonon pain ca xuruxut xo' taxi' wa pain ca win xumu e' cacain ca param ne ta napa'.

Hebreus 10:22

Je ca tomi' ca' xuhu' ca': Mam' wixicam pin xun Iri' Jam pain ca win xumu iri'o' xun, je pain ca howa mip xun ca'. Om ta tara con ta'a camain' xun pain ca xic am pin capari' pain ca caracat nexi' ta. Ac ca cam huco' mi' capari' na pain quicon Jeju pain ca coromicat pan teretem nexi' ca', ac ca hohoc xo' capari' na pain com ca awi tamana pain cwerexi' quem.

Hebreus 11:28

Howa non Iri' Jam, je ca tomi' querec te wi ca cocon oro win ma' ca pain Páscoa pane. Cam huco' mi' xin quinain wijimain taramaji ovelha pain panajinain manain xirixi' ma', pain quirinain je pain pawin ma'. Ma' ta witan pin caca mana pantiri' co wara camara' cain' nana cwa', pain ca wari' nein Israel iri' ca'. Ma' ta om to' parapa' pin cocon jam co to' pa' toton nonon wari' co om tomi' ha' nana ta na tata pane.

Hebreus 12:24

Wixicam hun Jeju cwa', co tomi' an pe xo' nain xocori ca tomi' xo' nucun Iri' Jam ma'. Wixicam pin hwein quicon ca mam' to' hohot pin napari' pain ca cam huco' mi' capari' pain. Hwara' opa tamana na quicon Jeju, hwara' opa tiquin' ca' nain quicon Abel cara pane, xi om ne ca tomi' pe mi' ara capari' pain ca oro ca awi wa ta.

Hebreus 5:9

Pi' pin iri na ca taramaja nucun ca ara ra con Cote ca ne, pain ca hohot pin mapa' ta con ma', ha' pin ac con na pain ca to' witan cara tococwa oro co tomi' ha' nonon.

1Pedro 1:14

Tomi' ha' jun Iri' Jam, win ne ca mana panxita' cuhu' ma'. Ta tomi' ha' mami' hwein oro ca param pan teretem nuhu' ca ara taxipa' hwe pane, pain ca om querec pin' querec hun Iri' Jam pane.

1Pedro 1:19

Mam' to' witan nuhu' pain wic ca awi tamana ma', je quicon Cristo co ac wijimain taramaji ovelha ca om em' camain' ma'.

1Pedro 1:20

Wara tora' paxi' non Cristo Iri' Jam pain cara pane, pain ca om tomi' ma' querec qui' cain macan' pane. Ane an hwet e' con pain xocori ca' ne. Ma' ta to' witan pin cuhu' ta nuhu'.

1Pedro 1:22

An to pin hwein ca caracat wa, xi om ne ca tomi' ha' pin ara hwein capijacon Iri' Jam ca iri'o'. Ha' pin nuhu' pain ca om noc iri'o' xujuhu' pain ca xere xujuhu' ma'. Je ca tomi' xuhu' ca', tama' tomi' querec te cara xujuhu'. Ta tomi' querec te e' ne capijahu' me, tomi' querec te iri'o' xujuhu', maqui' tarain iri' xumuhu' pain ca tomi' querec te xujuhu' ma'.

1Pedro 2:9

Wahu' iri na ne, tora' nuhu' Iri' Jam pain ca wari' ne cuhu' ma'. Ac sacerdote nucun pin hwe pain ca taramaja mi' hun pain ca Iri' Taramaxicon ca ma'. Xica' pe na Iri' Jam co wari' ne nuhu'. Ma' ta tomi' hwet huhun oro wari' pain ca hwara' opa tamana ne ca', pain ca ara mi' toton pain oro ca awi wa ca' nuhu'. Wirico co hwerehwet ca' jein ca jitacat nein xim ta nuhu' pane, wirico co wixicam pin xine pain naran ne ca awi tamana ca' nuhu' pane quem.

2 Pedro 1:2

Taxi' inuhu' pain ca querec pin' mip hun Iri' Jam con Taramaxicon nexi' Jeju ma'. Je ca param ton Iri' Jam pain ca quep xiho' tamana cuhu' pain ca mi' cuhu' pain ca param nucun. Param inon pain ca mi' hwara' cuhu' pain ca om toron ne xumuhu' quem.

2João 1:1

Wata' pain ca querec wet toton oro co howa nonon Jeju cwa', wata' pan co xirao' mi' xim ca' we. Tora' pan nem Iri' Jam. Xirao' mi' inonon humajum ma' quem. Om ca noc camain' xuhu', tomi' querec te iri'o' inuhu'. Om ca xica' pe ta' pain ca om noc xuhu' ca', tomi' querec te tomi' querec te pi' pin nunuhu' co taraju pa' nanain capijacon Iri' Jam ca iri'o' con Jeju ma' quem.

2João 1:13

Mam' pe wet urut pahu' ta nunuhu' humaxicam cowe ma cwa', co tora' ca Iri' Jam cwa'. Je i ca' ca xirao' ne ca'.

Judas 1:2

Param inon Cotere' Iri' Jam pain ca xiram pa' tamana cuhu' ma'. Param inon pain ca mi' hwara' cuhu' pain ca om toron ne xumuhu', je pain ca mi' hwara' cuhu' pain ca querec pin' hun pain ca om noc camain' cuhu' ma' quem.