1Pedro 1:12 - Tradução Bíblica Pacaas Novos

¹² Tomi' xo' ca' tata oro profeta pane: Tomi' hwet iri hwein oro carawa jimao ca maqui' ta' ma' ne, om ca quep xiho' pan xujuhu', om na. Quep xiho' pan huhun oro xucucun wari' co maqui' xi' nana pa'ao' ta na ca tomi' xo' tococwa pane. Je ca tomi' xuhu' ca'. Wahu' pan co quep xiho' xi' wawa pain ca tomi' hwet nucucun pane. Je ca pijim' hwet xihwe pain xocori ca' quem. Oro co pijim' hwet nunuhu' pain capijacon Iri' Jam con Jeju ma', mam' pijim' hwet nunuhu' pain ca hwara' opa nein Tamataracon Iri' Jam ca mam' capari' pain pawin pane. Capijacon Iri' Jam ca pijim' xihwe ma', jain jain pan nanain oro jam co taramaja mi' nonon ma'. Taraju pa' xixi' na nanain.

1Pedro 1:12 Iomraidhean Croise

Mateus 11:25

Tomi' ac con na Iri' Jam Jeju: Tomi' querec te inem ta Te. Wum co Taramaxicon pe nain pawin je macan' ca'. Tomi' querec te inem pain ca tora' momon oro wari' co om xec xec nana cwa', co an xiho' nonon oro hwijima' pain ca om xec xec nucucun ca'. An hwet mi' momon pain oro ca joc xim ma cocon oro wari' co taxi' urut xi' ma nana ma'.

Mateus 11:27

Wirico Te co mi' napa' pain ca hwara' opa tiquin' ca' toton oro wari' ta ac tococwa na. Mi' napa' pain ca querec pin' tain oro ca coromicat nucun quem. Oro ca param nucun, oro ca ara nucun quem, taxi' taxi' pi' pin inain con. Querec pin' napa' pain ca Panxita' capa' ca' quem. Om na xucun wari' co querec pin' nain oro ca coromicat ne. Xica' pe na Te co querec pin' nain oro ca coromicat ne. Wata' iri na ne, pain ca Te ton ca', querec pin' inon quem. Oro wari' co an hwet mi' ta' con, querec pin' nonon quem na ca tomi' tococwa ma'.

Mateus 16:17

Param mi' nem pain ca awi wa Iri' Jam ta Simão panxica João ac con na Jeju. Xi wari' ca co an hwet mi' nem pain ca tomi' nem ma', pain ca Cristo ma ta mapa' ma', pain ca Panxica Iri' Jam ma ta mapa' ma'. Te ma', co pe pawin cain, wirico co an hwet mi' nem pain ca tomi' nem.

Marcos 16:15

Mama' jein oro xijein macan' ta ac tococwa na. Pijim' hwet pijim' hwet xam' jujun pain capija pain ca to' witan toton ta' oro wari' ta na ca tomi' tococwa ma'.

Lucas 15:10

Je ca tomi' xuhu' ca' ac tococwa na. Tomi' querec te ac i ma' nana oro jam co taramaja mi' nonon Iri' Jam, tomi' querec te tamana nonon wari' co cwirin' pin nain ca caracat nucun. Xica' pe paxi' na, tomi' querec te tamana nonon ta na ca tomi' tococwa ma'.

Lucas 2:26

Wara tomi' pe non Tamataracon Iri' Jam pane. Om ta mi' pin querec ma, querec ac mon tara Cristo co wara tomi' pe ca Iri' Jam pane na ca tomi' pe con pane.

Lucas 9:6

Mama' ac caca na, hwet ac cocon na oro wari' co to nanain oro ca paric to ne xirim ma', pijim' mi' ac cocon na pain ca taramaxicon pe ho' xim capari' Iri' Jam, quep xio quep xio ac cocon na co caxi nana ma' quem.

João 15:26

Hwet iri turuhu' co quep xiho' xim nuhu' ne, tomi' xo' ac cuhu' tara pain oro ca iri'o' wa con Te Iri' Jam ta ac caparut na. Tomi' inain Tamataracon Te ta, taraju pa' hwe? Maqui' toron Te. Wata' tara co mam' nuhu' pain. Tomi' hwet ac cocon tara oro wari' pata'.

Atos 10:44

Pijim' pijim' wet na Pedro ma', ane ane hwet pa' ac cocon na Tamataracon Iri' Jam. Pe ho' mip pe ho' mip xam' tata oro wari' co taraju nonon ma'.

Atos 16:10

Mamiram pin iri na Paulo ne, tomi' hwet ac caparut na pain ca querec nucun. Je ca param mi' capari' Iri' Jam ta ac xujuxut na. Hwet jujun oro wari' nein Macedônia cwain, pijim' mi' jujun pain capija con Jeju ta napari' ta xujuxut. Noro ho' xin mam' horoho wa ta, horoho mama' xin Macedônia cain ac xujuxut na.

Atos 2:33

An piri' mao non pain pawin Iri' Jam quem. Xao pe ho' ne pain iri' cwere ca', xi querec awi tamana ara mapa' ta arain ac con na. Mi' ac con na pain Tamataracon ca wara tomi' pe ca pane. Je ca maqui' ne pain xocori ca' quem. Mam' naparut pain Tamataracon Cote ca. Je ca querec hwe ca', je ca taraju hwe ca' quem.

Atos 4:31

Pi' pin iri na ca tomi' cocon Iri' Jam ne, cocoroc ac ne na xirim ca cut in to xucucun ma'. Pe ho' mip pe ho' mip xam' ac cocon na Tamataracon Iri' Jam. Pijim' hwet ac cacain na capijacon quem. Om ca pijim' jin' camain' cacain.

Atos 4:8

Tomi' ac ca na Pedro. Pe ho' mip non Tamataracon Iri' Jam, tomi' ac tococwa na: Tomi' xim inuhu' ta oro taramaxicon. Tomi' xim inuhu' pain ca taramaxicon to ho' maparut pain ca judeu iri' ca' quem.

Atos 8:25

Pijim' pijim' tiquin' ac cocon oro wari' na Pedro con João ma'. Tomi' hwet nonon con Jeju, pijim' pijim' ac cocon na pain capijacon Iri' Jam quem. Pi' pin iri na cocon ne, in mama' xin Jerusalém ta ac caca na. Pain ca xuruxut xuruxut caca ma', pijim' to ac cacain na oro ca paric to ne xirim pain Samaria ma'. Pijim' mi' pijim' mi' tata con Jeju oro wari' ma', pain ca to' witan xim cuhu' Jeju ta tococwa ma'.

Romanos 1:15

Je ca pijim' xim xuhu' pain ca to hwein Roma ma'. Param tamana inain. Tomi' hwet xuhu' pain capijacon Iri' Jam ca tomi' hwet nuhu' pain ca to' witan xim cuhu' Jeju ta inuhu'.

Romanos 1:17

Pain ca tomi' xo' capari' pain capijacon con Jeju cwa', je ca an hwet mi' capari' pain ca to' hohot pin capari' Iri' Jam. To' hohot pin napari', xi om ne ca howa ara xun ca'. Xica' pe na ca howa nexi', je ca to' hohot pin capari' ca'. Je ca xirao' pe xine pain capijacon Iri' Jam ca'. Ca' na con: E' cara tara wari' co to' hohot ta' cwa', xi om ne ca howa ara capa' ta, ac i ma' na ca xirao' pe xine pain capijacon Iri' Jam pane.

Romanos 10:15

Ma' tara ca pijim' ac tocwa wari' pain ca om mo pijim' je e' tococwa co pijim' xi' nana ra? Win ne ca xirao' pe xine pain capijacon Iri' Jam ca'. Ca' na con: Querec awi tamana na caximacocon oro wari' co mo pin nanain capija con Jeju ta, ac i ma' na ca xirao' pe nein.

Romanos 15:19

An hwet mi' tata pain ca hwara' opa nucun Iri' Jam Cristo pata' quem. Wa wa ac caca na, querec pin' ac cocon na Iri' Jam, xi hwara' opa ara ne Tamataracon ta. Pijim' inain capijacon Iri' Jam ca tomi' hwet napari' con Cristo pain ca to' witan xim cuhu' Cristo ta capari' ca'. Pijim' pe cain' inain Jerusalém pain oro cidade ca to ja' pan nain pane, pijim' mao ac tain na oro xijein macan', pijim' pijim' hwet ac tain na Ilírico pane.

1 Coríntios 2:10

Ane an hwet mi' capari' pain ca wara coromicat xo' nucun Iri' Jam ne. Je Tamataracon ca an hwet mi' napari' pain. Xi taxi' taxi' xam' pan ara cain oro ca coromicat nucun ta. Taxi' taxi' xam' pan nain oro ca wara coromicat nucun ca joc xim ca pane quem.

2 Coríntios 1:22

Wari' ne napari' quem, ac ca xirao' capari' na pain wixicon ca', pain ca wari' ne xuhu' ta capari'. An pe mi' napari' pain Tamataracon pain ximixi' ca' quem. Je ca to' taxi' napari' pain ca aram aram mi' xim capari' pain oro ca wara tomi' pe mi' capari' quem.

2 Coríntios 6:6

Ca' ac urut na pain ca an hwet pe urut pain ca xuruxut xo' nuxut ca' quem: Om ca quep urut cacam xequem narima'. Taraju pa' urut pain capijacon Iri' Jam. Tomi' pan hot urut cocon oro wari'. Xiram pa' urut cocon quem. Pe ho' naparut Tamataracon Iri' Jam pain xumuxut. Tomi' querec te iri'o' urut cocon oro wari' quem.

Gálatas 1:12

Om ca wari' ca co tomi' hwet napa' pain. Om ca wari' ca co tomi' xo' napa' pain. Wirico Jeju Cristo co an hwet mi' napa' pain ta.

Gálatas 1:16

ca an hwet mi' xim capa' con Panxica ne, mi' ac capa' na pain ca querec pin' ton pain iri' xumu ca'. Ma' ta pijim' hwet momon con oro wari' co om judeu nana ta napa'. Tomi' ac i ma' iri napa' ne, om ca pirao' camain' ton wari' pain ca cain' cain' xita' ne ton, om na.

Efésios 3:10

Ca' na ca coromicat nucun cocon oro jam cocon oro taramaxicon nucucun co hwara' opa to nanain pawin ma': Mo ta querec cocon co howa nonon Panxita' cwa', pain ca win ma' ne pin xucucun ca', querec pin' ac cacapa' tara pain oro ca taxi' tamana ne ca' na ca coromicat nucun.

1 Tessalonicenses 2:9

Om ca mam' pe wet maparut pain ca taramaja tamana nuxut pain ca cut xin urut pain dinheiro ca mam' cut urut pain carawa ca cao' wa pane ra xere? Mam' pe wet maparut pain ma' ira. Jam' tamana urut pane. Ca taramaja urut, ca pijim' pijim' mi' ac urut pahu' na pain capijacon Iri' Jam con Jeju, ca taramaja taramaja urut, ca pijim' pijim' ac urut na pane. Pain xec je pain xim, taramaja tamana urut pane. Ma' ta om to' i'ina xuxun pain ca tama' xiram pa' xut xuxun ta urut pahu'.

1 Timóteo 3:16

Iri' Jam ma', om ca an hwet querec cain ca coromicat an pe xo' nucun ca howa iri' con Cristo Jeju pane. Pain xocori ca' iri na ne, an hwet mi' napari' con. Ca' napari' con: Wari' pin na Cristo. An hwet mi' napari' pain ca awi nucun Tamataracon Iri' Jam. Querec nonon oro jam co taramaja mi' nonon Cote ca. Pijim' hwet ac tocwa na cocon oro wari' co om judeu nana. Mija nana oro wari' co howa nonon pain oro xijein macan'. Piri' in hwet ac con na Cote ca pain pawin. Ac i ma' na tamara' ca com mi' xun ca'.

Hebreus 11:13

Howa howa pi' pin nana oro co wara tomi' pe wawa pane. Howa howa, aram aram cono' pin ac caca na quem. Om paxi' na ca ara mi' tococwa pain oro ca wara tomi' pe mi' tococwa pain ca e' e' wet nucucun pane, ane howa cara caca ne. Main ara mi' tarapari' pain ta nonon Iri' Jam. Ac ca querec pira cacain na. Winim' nanain, tomi' querec te nanain. Tatirim e' urut, om ca wari' nein macan' ca' urut ta nana.

Hebreus 2:4

Iri'o' na ca tomi' nucucun ta ac ca na Iri' Jam quem, ac ca tomi' wi cocon na pain ca mi' tococwa pain ca ara cacain oro ca om ara taxi' ne ca wari' wa, wa wa tamana ac caca na oro wari' ma' quem. Ma' iri na wari' co param pan ca ne, pain ca mi' tocwa pain ca taramaja taxi' wa ca mi' ne Tamataracon ma', mi' ac tocwa pain na quem. Ac i ma' na ca an hwet cain ca tomi' iri'o' nucucun oro co tomi' hwet nanapari' con Jeju pane.

Hebreus 4:2

Taraju ara xi' irin capijacon Iri' Jam pain ca to' witan xuhu' ta capari' quem. Win caca oro hwanana nexi' pane. Taraju paxi' nanain, ane om howa cacain ne. Je ca om ja' tomi' querec te ac tococwa pain oro ca taraju cacain pane.

1Pedro 1:25

Ane to wet cara ne capijacon Taramaxicon nexi' ne. Ac i ma' na ca xirao' pe xine pain capijacon Iri' Jam ma'. Je ca tomi' xuhu' ca'. Je i ma' capijacon Iri' Jam con Jeju ma', ca pijim' hwet xihwe pane.

1Pedro 4:6

Co wara cono' nana pane, wap paxi' tata pain ca to to wet cacain macan'. Win ne ca mi' pin taxipa' ne ca wari' wa ca'. Ane pijim' mi' tococwa con Jeju ne, ma' ta e' cara ne tamatarahu' ta tata. Win ne ca e' cara ca Iri' Jam ta tata.

Apocalipse 5:11

Noro ac ta' na, taraju ac toton na oro jam co taramaja mi' nonon Iri' Jam. Mija tamana nana, om ca tomi' ac tococwa, xi mija tamana ara caca ta. Coco' coco' mam' pin nanain ca mam' xao pe nucun iri' Taramaxicon ma', coco' coco' mam' pin nanain caram ma' co e' nana ma', co ac jam paxi' nana ma', coco' coco' mam' pin nanain oro taramaxicon ma' quem.