1João 3:2 - Tradução Bíblica Pacaas Novos

² Je ca tomi' xuhu' pain ca tomi' querec te xuhu' ca'. Mana panxica Iri' Jam iri' pain xocori ca', pain ca to to wet xin macan' ca'. Om ca an hwet mi' querec capari' pain ca cwere mama' xi' iri' pain ca to' jimama' xim capari' ca'. Ane taxi' xin i ca' ne: In qui' iri tara Cristo ne, ac wirico pin ac iri' tara, xi om ne ca querec xun ara xi' pain iri' curucun pain iri' ca e' nucun ta.

1João 3:2 Iomraidhean Croise

Mateus 5:8

Param mi' tata pain ca awi wa oro wari' co win xumu e' nonon Iri' Jam ma'. Wiricoco ara xi' nana co querec xun nonon ta.

Lucas 17:30

Ac i ma' tatara oro wari' pain xec nein ca in qui' ta' ne quem. Om ta maqui' ca ma' tatarapa'. Ara ara e' tatarain oro ca ara taxipa' caca ma', ane ane hwet pa' ac toton tara. Wata' pain ca Iri' Wari' ta' ca', ane ane hwet pa' ac toton tara ta.

Lucas 20:36

Om ta cono' mami' ac cacama quem, xi an xiho' ara cocon oro jam co taramaja mi' nonon Iri' Jam ta. Mana panxica Iri' Jam nana, xi om ne ca to' e' mami' ara tococwa ta.

João 1:12

Oro wari' co tomi' querec te nonon ma' iri nana ne, co howa nonon ma', mi' tata pain ca mana panxica Iri' Jam pin caca.

João 11:52

Pain ca mi' pin caho' totoron oro win ma' caca ma', om ca tomi' e' tococwa oro win judeu urut. Tomi' tata oro wari' nucun Iri' Jam co cut in toton ca ma' quem, co wawaran to nanain oro xijein macan' ma' quem. Ma' ta win ma' ne xucucun ta na. Ac ca nari xucucun tara ta na.

João 17:24

Tomi' mi' inem cocon caram cwa' co mi' mapa' cwa' Te ac con na. Param inonon pain ca to ho' cacapa' pain ca pe ne quem. Ma' ta querec cacain ca hwara' opa ne pain ca awi tamana ne ca mi' mapa' ca'. Xi wara tomi' querec te ara mapa' pain ca om tomi' ma' pin querec xine macan' pane ta non.

Romanos 8:16

Pain ca Te pin xun Iri' Jam cwa', je Tamataracon ca tomi' xo' nain ximixi'. To' taxi' napari' pain ca mana panxica Iri' Jam pin iri' ca'.

Romanos 8:18

Ca' na ca coromicat ne ca'. Oro ca jain jain nexi' ca', pain ca to' i'ina capari' oro carawa pain xocori ca', om ca an xiho' camain' nein ca awi wa ca mi' xim capari' Iri' Jam ta. Tiquin' mao pan na ca awi nein oro ca mi' xim capari' ma', pain ca mi' xim capari' pain ca jao jao ma' xun pain ca awi nucun pain ca hwara' opa nucun ma'.

Romanos 8:19

Winim' non Iri' Jam oro carawa ca tomi' ma' pin ca ca'. Winim' non pain ca aram aram cut hwerehwet to xim capari' pain ca aram aram momon cwa' mana panxita' cwa' xim capari' ca'. Mija na ca winim' con, winim' cara non, jain jain na, param tamana non pain ca cut hwerehwet to xim capari' ca'.

Romanos 8:29

Xi wara querec pin' ara capari' pain ca om ma' querec ne macan' pain cara pane, wara tora' napari' pane. Ma' ta main an tan pan hun Panxita' ta napari'. Ma' ta aji' hun pain ca xere xujuhu' ma' napari'.

1 Coríntios 13:12

Ac i ma' iri' con Iri' Jam quem. Om om wet na ca querec pin' xo' xun pain xocori ca'. Ac ca querec e' xin na jamicon pain ca mam' querec ca jamu wa ca om awi ca', querec tocohon na jamicon, ac je paxi' na pain ca om querec xo' xun Iri' Jam pain xocori ca' quem. Ame hwe e', main maqui' tara xec nein ca querec xo' xun quem. Win quima xun, querec xin iri' tocon. Querec pin' wijimain e' urun pain xocori ca'. Ame hwe e', main maqui' tara xec nein ca querec pin' xo' xun. Win ne ca querec pin' pan capari' pain xocori ca', main querec pin' ac i ma' xun quem.

1 Coríntios 15:49

Main cwere an xiho' pin xun wari' co maqui' nain pawin pane. Win ne ca cwere an xiho' xun wari' co macan' curucun pane quem.

1 Coríntios 2:9

Win ne ca xirao' pe xine pain capijacon pane. Ca' na con pane: Oro carawa ca awi ca an to xo' mi' capari' Iri' Jam ma', pain ca om noc xun ca', om na wari' co querec nain. Om na wari' co taraju nain. Om na wari' co coromicat nain quem. Ac i ma' na ca xirao' pe xine pain capijacon Iri' Jam ca'.

2 Coríntios 3:18

Taraju pa' taraju pa' pi' pin irin xocori ca tomi' xo' nucun Iri' Jam quem. Ac ca hot ca' capari' na con wom co tatep pa' nain tocoxi' Taramaxicon nexi' cwa', ac ca toha pan iri' na pain ca toha mi' capari' pain ca awi tamana nucun quem. Je ca ha' capari' pain ca taraju pa' wa. Ca to' jimama' ac capari' na, ca to' jimama' ac capari' na, aram aram an xiho' pin ac xun tara quem. Wirico Taramaxicon nexi' ma', co iri' Tamataracon Iri' Jam ma', wirico co ara mi' napari' pain.

2 Coríntios 4:17

Jain jain paxi' urut, ane to' hwara' opa caparut oro ca jain jain nuxut ne, xi winim' ara urut pain ca awi tamana wa ca mi' xim caparut Iri' Jam ta. Awi tamana tara, om ta pi' ra ha' ne quem. Awi tiquin' ca' tarain oro ca jain jain wijimain nuxut pain macan' ca'.

Gálatas 3:26

Je ca tomi' xuhu' ca'. Wahu' pain ca judeu hwe ma', wahu' pain ca om judeu hwe ma' quem, mana panxica Iri' Jam mana panxica Iri' Jam pi' pin hwe, xi om ne ca howa ara hun Cristo Jeju ta.

Gálatas 4:6

Mana panxica Iri' Jam iri' ca' ira. Je ca mam' capari' pain Tamataracon Panxica. Corom pe rain ximicocon ta nain pari'. Je Tamataracon Panxica ca tomi' wi napari' pain ca Te Iri' Jam xun Cotere' cwa' quem.

Filipenses 3:21

To' jimama' tarain oro cwerexi' ca om hwara' opa ca', ca cono' taxipa' ca'. An xiho' ac xin tara curucun ca awi tamana ma', ca om mi' pin camain' ma'. To' jimama' tarapari' pain iri' ca hwara' opa nucun. Ha' toron pain ca to' jimama' capari' quem, xi om ne ca to' jimama' xim ara capari' pain ca hwara' opa nucun ca mam' taramaxicon pe ho' tococwa oro wari' je oro carawa ta.

Colossenses 3:4

In qui' iri tara Cristo co mi' nuhu' pain xocori ca e' nuhu' ma' ne, maqui' wi ac hun tara, an xiho' ac hun tara pain ca awi tamana nucun quem.

Hebreus 9:28

Ac i ma' na Cristo pain ca mi' pin nucun quem. Mi' pan xucun con Iri' Jam, om ca ara mami' cain, om ca mi' pin mami' ca quem. Ma' ta to' om pin tain ca caracat nucucun oro wari' co mija nana ta na. Maqui' mami' tarain macan' quem. Maqui' mami' iri tara ne, om ta to' om mami' cain ca caracat nexi'. To' witan xuhu' pain ca winim' mahu' ta napari'.

2 Pedro 1:4

Je ca mam' ara mi' capari' pain oro ca wara tomi' pe ca pane. Awi tamana na oro ca wara tomi' pe nucun, om ca em' camain' ne, hohot tamana na oro ca param mi' capari'. Ma' ta witan ca' hwein oro ca to' em' nuhu' ma', ca maqui' nein oro ca param pan tem wa pain macan' ca' napari'. Ma' ta an xiho' mahu' pain ca ara xo' ne pain ca Iri' Jam ne ta napari' quem.

1João 2:28

Je ca tomi' xuhu' ca', pain ca ac ca mana panxita' xuhu' ne ca'. Win cwere jun Cristo. Ma' ta quereme iri' pain ca aram aram in qui' ta' nucun. Ma' ta om jin' iri', ma' ta om wixipa' iri' pain ca to quima hwet xun quem.

1João 2:7

Je ca xirao' mi' xuhu' pain ca tomi' querec te xuhu' ca'. Xirao' mi' e' inuhu' pain ca hu nucun Iri' Jam cwa', pain ca om noc caracan xujuhu' ta cuhu' ca'. Om ca xocori ne ca hu nucun quem. Wara hu ac i ma' nuhu' pain cara pane. Wara taraju hwein pain ca xo' pijim' mi' qui' xihwe pain capijacon con Jeju pane.

1João 3:1

Taraju pa' xin i ca' e': Om ca noc camain' capari' Cotere' Iri' Jam ta, xi mana panxita' inuhu' ara capari' ta. Te urun ma' ira! Oro wari' co om howa nonon ma', om ca querec pin' cacapari' pain ca mana panxica Iri' Jam iri' ca', xi querec pin' pan cocon quem.

1João 3:10

Je i ca' ca to' querec pin' napari' ca jimama' ca' xucucun mana panxica Iri' Jam cocon mana panxica Caxicon Jam: Wari' co om ara xo' taxipa' ma', co noc non win howa ca ma' quem, om ca panxica Iri' Jam ca co ma'.

1João 3:21

Je ca tomi' xuhu' pain ca tomi' querec te xuhu' ca'. Om iri na ca wixipa' iri' pain ca tomi' xun Iri' Jam ne, pain ca taxi' xijexi' pain ca caracat iri' ca', om ca hehe iri' pain ca tomi' xun ca'.

1João 5:1

Mana panxica Iri' Jam nana oro wari' co howa nonon Jeju ma', pain ca Cristo ca ma'. Oro wari' co om noc nonon Cotere' Iri' Jam cwa', om ca noc cocon oro win ma' caca co Te nonon quem.

Apocalipse 22:4

Querec pin' tatarain iri' tocon Iri' Jam. Xirao' ac xine tara wixicon pain jitaracocon oro wari' nucun quem.