1João 2:8 - Tradução Bíblica Pacaas Novos

⁸ Ane xocori ne ca hu nucun ca xirao' mi' xuhu' ca' ne, ac je na. Querec pin' urun Cristo pain ca om noc iri'o' capari', querec pin' xihwe pain ca om noc iri'o' xujuhu' ma' quem. To' om pin ara xi' nain ca jitacat nein xim pain xumuhu' ta. Toha pin nuhu' iri' naran ca iri'o' ta.

1João 2:8 Iomraidhean Croise

Efésios 5:8

To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

Romanos 13:12

Ac ca xim pin ne na pain macan' ca', xi om ne ca pan teretem ara caca oro wari' ta. Ane wara pi' pin ta' ne xim ne. Ac ca wara xec pin ta' ne na quem, xi in qui' ta' ara ca Cristo ta. Je ta maho' qui' xin oro ca pan teretem wa ca ara towa taxipa' caca oro caracat ma'. Noro jujun oro soldado co to nonon womicocon ma', pain ca mixita xi' caca pain oro xec. Mam' mixita xin oro ca pan teretem wa pain naran nucun Iri' Jam quem.

João 13:34

Je i ca' xocori ca tomi' ne ca tomi' ha' je xuhu' ca' ac caparut na. Ta noc camain' xujuhu' me ta. Win ne ca om noc camain' xuhu' ca', ac i ma' tara ca om noc camain' xujuhu' quem.

João 8:12

Tomi' mami' ac cocon na oro wari' Jeju: Wata' co Iri' Naran cwa' ta ac ca na. Toha mi' inonon oro wari' pain ximicocon ma', pain ca mi' toton pain ca taraju pa' wa oro caramaxicon Iri' Jam. Wari' co ja' ja' napa' ma', om pin na ca jitacat nein pain ximicon. Xi toha mi' ara ton pain naran ne ca mi' non pain ca e' cara wa ta na ca tomi' tococwa ma'.

João 1:9

Co ac iri' naran ma', hwet hwet xam' napari' pain ca wari' nexi'. Toha mi' napari' pain ximixi' ca'.

João 12:46

Ac naran ina pain ca maqui' tain macan' ca', toha mi' inonon pain ximicocon oro wari'. Ma' ta om to cara cacain ca jitacat nein oro wari' co howa nanapa' ta ina.

1João 4:21

Je ca ara je capari' quem. Wari' co om noc napa' ma', om ta noc cocon oro win howa ca ta, ac i ma' na ca tomi' capari' Iri' Jam.

1João 4:11

Je ca tomi' xuhu' pain ca tomi' querec te xuhu' ca'. Ac i ma' na ca om noc capari' Iri' Jam cwa'. Je ta om noc qui' xijexi' ca' quem.

2 Timóteo 1:10

Je win an hwet mi' capari' pain ca xiram pa' nucun quem. Xi maqui' pin ara ca Cristo Jeju co to' witan pin napari' cwa'. To' om pin nain ca hwara' opa nein ca mi' pin wa. An hwet mi' ac capari' na pain ca e' nucun quem. To' querec pin' napari' pain i ca' quem: Mo ta howa xin capijacon Iri' Jam ca tomi' hwet napari' pain ca to' witan xim capari' Cristo Jeju cwa', e' cara ac iri' tara pain pawin ta.

2 Coríntios 8:9

Win ca Taramaxicon nexi' Jeju Cristo cwa'. Taxi' ara xi' hun pain ca xiram pa' tamana capari'. Caramaju tamana paxi' na pain ca hwara' opa tamana nucun pain ca taramaxicon nucun pane, je pain ca Iri' Jam nucun pane. Ane an pe pin tain pahu' ta capari' ne. An pe pin iri nain ne, wari' pin ac ca na, ximin pin ac ca na quem. Ma' ta to' caramaju pin xuhu' pain ca mi' xim xuhu' pain oro ca awi wa con Te ta napari'.

Atos 26:18

Ac ca to' querec pin momon tara pain tococon ma', ma' ta querec pin' cacapa'. Ac ca to' xuruxut ni ca' momon tara pain ca jitacat nein ma', pain ca xuruxut pin xin cacain naran ne ca', pain ca an to pin xin cacain ca caracat nucucun ma' quem. Taramaxicon pe ho' taramaxicon pe ho' om pin ac cocon tara Caxicon Jam, taramaxicon pe ho' pin ac cocon tara Iri' Jam ma' quem. Howa iri tatarapa' ne, xic am pin ac tococwa tara pain ca caracat nucucun, aram aram mi' mi' ac tococwa tara pain oro ca param nucun Iri' Jam ca cut to xo' mi' xun tococwa pain oro wari' nucun co to' hohot pin ca ma'. Ac i ma' na ca tomi' capa' Jeju pane.

Atos 17:30

Iri' Jam ma', om ca wap hap cocon oro hwanana pain cara pane, om ca wap hap cocon pain oro ca coromicat ximama' nucucun pain ca om taxi' querec cocon pane. Ane cwirin' pin jein ca caracat nuhu' pain xocori ca' capari' ne, tomi' tomi' xam' napari' pain oro xijein macan' ca to iri'.

Lucas 1:79

Ac ca toha mi' tococwa tara oro wari' co to pira ca' nonon Iri' Jam ma', pain ca to cacain ca jitacat nein xim ca', pain ca jin' cacain ca cono' wa ca'. Mi' totoron pain ca taraju pa' wa, to' querec pin' totoron con Iri' Jam. Ca' na tarapari' pain ca xuruxut xo' wa quem. Ma' ta om toron ne xumuhu' ta napari'. Ac i ma' na ca tomi' ca Zacarias pane, pain ca tomi' hwet cain capijacon Iri' Jam con panxica pane.

João 12:35

Tomi' ac tococwa na: Pe ho' pe ho' wet paxi' inuhu' pain ca ac iri' naran ta' ca'. Ane om pe ho' cara xim xuhu' ne. Toha mi' xut pain xumuxut ta xine pain ca pe ho' pe ho' wet xuhu' ca'. Ma' ta taraju pa' hwe inuhu'. Ma' ta om ane ane hwet pa' cuhu' ca jitacat nein ta inuhu'. Wari' co xut nain ca jitacat nein ma', om ca taxi' cain ca mao ta' nucun.

Mateus 4:16

To paxi' nanain ca jitacat nein xim ira, ane querec cacain cote ne naran ne. Jin' paxi' nanain ca cono' wa ira, ane toha pin cocon naran ne. Ac i ma' na ca xirao' pe ca profeta Isaías pane.

1Pedro 1:21

Je ca howa pin hun Iri' Jam ma', xi om ca Cristo co to' e' mami' ca pane, co to' hwara' opa ca pain ca mi' con pain ca in ac in ac pi' pin cocon oro wari' quem. Je ca howa hun Iri' Jam ma'. Howa hun pain ca winim' hun ma', pain ca mi' xim cuhu' pain oro ca wara tomi' pe mi' cuhu' ma'.

1João 3:23

Je i ca' ca ara je capari': Howa jun Panxita' Jeju Cristo cwa' napari'. Tomi' querec te taxipa' xujuhu' ta napari' quem. Je ca ara je capari'.