Tekang Kbuten 43:11 - Udél Dwata: Gna Kesfasad ne Lomi Kesfasad

¹¹ Ne mon mà le se mò kul, “Ke lómón se yó kmoen, lemwót ye sen. Bede mit ye yó kem hyu bélê tekuy bè ni mò basa ye tum gubérnor tu. Mit ye béléen yóm litok koyu alì tilob boohen ne wen tneben ne wen yó kem dê kay som ne wen kem bungu koyu ken lemen lemwót bè yó kem koyu pistasyu ne koyu almun.

Tekang Kbuten 43:11 Iomraidhean Croise

Tekang Kbuten 33:10

Okóm yó mon Jakub, “Béem mom tô kenbê. Ke deng mulék hyu se nawahem ebéléu, henmóyóem sen yó kem basahu kóm yó. Bè yóm ktonu lem uyóhem ni, hol lómón ke deng tonu lem uyó Dwata lemwót bè yóm tey kehyu yóm nmoem béléu ni.

Tekang Kbuten 37:25

Bè yóm igò le tolo mken tódô ton le yó kem tau stodol mógów gu ditu, hono kem tau mit udél swa semfu gu bè Ismaél. Bè yóm kógów le yó, lemwót le gu bè Gilyad mógów le ebè Idyip. Sket lenulón le yó kem kamél yóm kdê kay som gel hbalù le ne yó kem litok koyu gel nmò bulung ne nmò yó kem hboo alì tilob boohen.

Tekang Kbuten 43:10

Ke là tlek kum ganggà, deng lewu dulék me ne bud gu ditu.”

Tekang Kbuten 43:14

Yóm Dwata laen dù là gbeken du hol mung kuy anì wen koduhen kuy tum tau tu, anì yó bud huléken ebélê ye Bindyamin ne yóm dumu ye setwoli deng tebel ditu. Ke béléu dou, ke lana béléu se yó kem ngau, laen kem bud kmonu du ne.”

Tekang Kbuten 43:15

Tahu se, tódô lemwót yó kem tau setwoli yó mógów le ebè Idyip, mung kul Bindyamin. Wen basa nwit le ne deng gomong nwit le yóm filak tehe nô lem sakù le. Yóm kkól le bè Idyip, tódô le hlós ebè Jusif.

Tekang Kbuten 43:25

Lemwót yó kem tau setwoli yó, eles hentifes le yóm mò basa le ke Jusif bè yóm kkólen bè yó kemdaw, abay se deng eles tulónen kul yóm tau snalig Jusif yóm kmung le mken bè Jusif.

Tekang Kbuten 43:26

Timbow kól Jusif, omin le ma yó kem mò basa le du ne nit le ebéléen lem gónóen, gotu le hegdufok ebè tonok bè soluhen.

1 Bok Kem Tau Hol Geta 10:15

Lelen yó he wen kem bwis gel gutahen bè yó kem tau gel hembalù, ne bè yó kem tau gel mò udél swa. Ne bud wen gel gutahen lemwót bè yó kem tau hol geta bè benwu Arab, ne dalang se bè yó kem gubérnor bè benwu Israél.

1 Bok Kem Tau Hol Geta 10:25

Ket halayen, yó kem tau gel mógów ebéléen sal wen basa le du blówón bukay ne tahu blówón ne kem nes ne yó kem ngom sfatay, ne yó kem dê kay som ne kem kudà ne yó kem kudà asnu gotu basa le du.

1 Bok Kem Tau Hol Geta 15:19

“Yake hnomi te dé yóm tehe deng senfasad le mà ne yóm tehe maem. Ngem, wen blówón bukay ne tahu blówón deng hwitu mò basahu kóm. Hyu ke genbaem yóm deng kesbilà ye Baasa bè Israél anì huléken yó kem sendaluen gu bè yóm dou benwu.”

1 Bok Kem Tau Hol Geta 4:21

Gotu nogot Selumun yóm tau hol geta yóm klamangen, nbuten bè Él Yufratis fi dmata kdaw efet kól etu bè tonok yó kem tau Flistin bè kilil mohin fi desdef, ne efet bud kól etu fi leged bè kilil Idyip. Lemwót yó kem tau menwu bè yó kem benwu deng gled le, gel le mayad bwis bè Selumun, ne mogot le béléen bè yóm klawihen mowil.

2 Bok Kem Tau Hol Geta 20:12

Bè yóm kdaw yó, gungol yóm ngà yóm tau hol geta bè Babilun boluyen Mirudak-baladan yóm alì kleed des Hisikaya. Yó gónón wen kem tau hógówen mò henwiten sulat ne basa.

Istér 4:16

“Gotu sentifunem kdéen Ju bè Susa anì gotu ye fasting. Hol bê ye tagad mken duhen ke minum lem yóm tlu buteng. Senged se dou ne yó kem ngà libun gel tóbóng lówóhu bud nmò me se kum. Sok deng yó, mógówe ebè tum tau hol geta baluen ke nuléhu yóm udinen. Ke mataye du nim nmou ni kem kunen ne.”

Kem Lingón 68:29

Wen tey basa nwit le ebéléem ebè Gónóem bè Jirusalim yó kem tau hol geta lemwót bè klamangen benwu.

Kem Lingón 72:10

Yó kem tau hol geta bè kem Kestilà, ne yó kem tau hol geta bè yó kem hungul te mohin, gotu le angat mógów ebéléen na le e benlay basa. Dalang se yóm tau hol geta bè benwu Syiba ne yóm tau hol geta bè benwu Siba, gotu le angat mógów ebéléen na le e benlay basa.

Kem Lingón 76:11

Mò ye fasad bè yóm sana kuy Dwata hol gónó mogot, ne hol dnohò ye yóm fasad ye yó. Yu kem kdéen tau bè kem benwu hmilol, hol ye mit basa ebè Dwata yóm Dwata hol knikò.

Kehewà 3:8

Ne ni, denge mnaul elaan anì naw e lenwà lu lem tdok yó kem tau Idyip, nitu lu hewà gu bè yó. Nitu lu ebè yóm tonok hyu ne lamang, yóm tonok alì hyu mò du hulu ne angat tey wen tbasen. Ni kmoen ni, hanà le tolo menwu tahen yó kem tau Kanan ne kem tau Hitayt ne yó kem tau Amurayt ne kem tau Pirisayt ne kem tau Hibayt ne yó kem tau Jibusayt.Gungolu yóm alì ktaba le ebéléu yó kem dou tau ne tonu se yóm tendo kehdes le kul yó kem tau Idyip.

Kem Udél Hlalak Tehe Selumun 17:18

Yóm tau fmasad mayad utóng dumu tau là kóen hulung hedem ne wen senblay le mò gónón tahu.

Kem Udél Hlalak Tehe Selumun 18:16

Yóm basa hennasen lan yóm tau bemlay ne niten bè solu yó kem tau bong boluy le.

Kem Udél Hlalak Tehe Selumun 19:6

Yóm tau masa tey dê tau móyô mit du swè ne yóm tau gel bemlay tey dê tau swè du.

Kem Udél Hlalak Tehe Selumun 21:14

Yóm kimu lifut blay hebóhen lebut ne yóm kimu mò wa nawa lifut blay, hkóhen yóm sidek kebut.

Jirimaya 8:22

Laen dù bud bulung kô ditu bè benwu Gilyad? Laen dù bud tau mulung bè yó kô? Moen se ke laen dù hkó du yó kem halì yó kem tauhu?”

Kul Nmò 21:14

Timbow là gbólów me du, tódô bayà me, olo me mon du mò du, “Dwata he mò du béléem yóm kun kóyô.”

Dwata 33:14

Hol tendo tnóbóng Dwata he yóm tonok le anì tendo gengón yó kem bungu koyu alì mnóm bélê le ne tódô ket bulónen tendo setgafit mungu yó kem koyu alì hyu bélê le.

1 Samwél 25:27

Ne ni, henmóyóem nim basahu kóm dalang se yó kem tauhem.

1 Samwél 9:7

Omin Sol mon du bè yóm tóbóng lówóhen yó, “Ke mógów te ebéléen, tedu se tô blay te du? Balù sem ken te, deng gotu ne laen dù mò nwit te ebéléen yóm tau Dwata yó. Tedu se tô nwit te ebéléen du?”