Tekang Kbuten 41:32 - Udél Dwata: Gna Kesfasad ne Lomi Kesfasad

³² Yó gónó Dwata hekna kóm lewu dulék anì tngónem yóm hol kehdohoen du yóm knahem ne là buden legen ne ksuten.

Tekang Kbuten 41:32 Iomraidhean Croise

Tekang Kbuten 37:7

Knahu gotu benkes tekuy yó kem halay deng kut gnalab bè uma kun. Okóm yóm dou halay benkes, tódô mdà ne fen kudung gu hilolen yó kem kuy halay benkes.”

Tekang Kbuten 37:9

Sotu kifu bè yó, bud kemna Jusif ne bud tulónen yó kem twoguhen, monen, “Wen bud knahu. Tonu kdaw ne bulón ne sfolò sotu blotik, gotu le kóem hegdufok ebéléu.”

Tekang Kbuten 41:25

Ne yó mon Jusif mò ke Faro, “Yóm lewu knahem yó, tek sotu tulónen, eles hetngón Dwata kóm yóm angat nmoen.

Tekang Kbuten 41:28

Yó se yóm monu mò kóm, eles hetngón Dwata kóm yóm angat nmoen.

Tekang Kbuten 41:31

Yóm halayen alì bong nuta le, balù udì ke gtulón nawa le, bà mon yóm tey sidek alì kbel bitil.

Danyél 2:45

Yó se hnigad yóm botu lemkà bè yóm tey léhék, lómón ke wen kemleng du, bede sundu tau du mò du. Bè yóm kegdeken bè yóm lennged wen bala tóken ne tembagahen ne tonok miketen ne blówón bukayen ne tahu blówónen, gotu lenunahen. Yóm ni, mò gónó Dwata eles heglileb du kóm yóm angat hesuten elem hulin kdaw. Tahu se yóm knahem ne dohò yóm hnigaden.”

Lista 23:19

Yóm Dwata kun, là kóen mkél bè tau gel mò kéng. Là mkélen bè tau gel mesfili kehedemen. Ke wen fasad Dwata, sal gel dnohoen. Ke wen udélen, sal dohò.

Matyu 24:35

Angat tódô kmanas yóm longit dalang se yóm tonok. Okóm yóm dou udél,” mon Jisas, “là kóen na a lana.”

Matyu 25:34

Angat monen mò yó kem nô bè kwananen yóm Hol Geta yó, ‘Géhél ye ne, yu kem tau deng tendo gel tnóbóng Mà. Hlós ye ebè yóm benwu deng tehe eles hentifesen bélê ye lemwót bè hol kbut benwu.

Matyu 25:41

Ominen yó mon du mò yó kem tau fi bè iwóngen, monen, ‘Mdó ye béléu bè ni, yu kem tau deng eles golu elem tafak Dwata. Ditu gónó ye nô lem yóm ofi laen dù tul katayen deng hentifes Dwata bè Seitan ne yó kem hógówen.

Mark 10:40

Okóm laen dù kwalisu mélék du yóm tau angat myón fi bè kwananu duhen ke fi bè iwóngu. Dwata se mò du yóm yó. Deng wen eles néléken mò angat hyónen bè yó.”

1 Kurin 2:9

Nim gel tolok me ni, hol segtón bè yóm tehe monen bè Sulat Dwata, yóm monen, “Deng wen hentifes Dwata bè yó kem tau kembong nawa du. Yóm hentifesen yó, là kô deng wen hnikót mton du he, ne là se wen deng mungol du. Là kô deng wen hnikót hemdem du yóm mò kmoen.”

2 Kurin 13:1

Ni se getluhu dulék tô mauy kuy. Ke angat wen hkukum ye dou, tódô lolou yóm tehe hsulat Dwata, yóm monen, “Song hentahuhem yóm duón le yóm sotu tau ke wen lewu duhen ke tlu tau yóm fen gemtanud du.”Yu kem tau deng tehe gel mò sidek ekni, ne yó kem dumu tau bè yó, ni wen eles tulónu kuy. Deng tehe eles tulónu kuy ekni bè yóm gewuhu dulék bud mauy kuy, bede bud nulitu bélê ye nim ni gu laan tekuy là deng bud ston. Yó udélu bélê ye, bè yóm bud kkólu bè yó, laen kô dù tau mò sidek ke là angat tnafaku du.

Deng Hegfan 9:15

Tahu se, gotu hewà le lu, abay se deng hto ne yóm buteng Dwata hewà kul. Deng eles tehe nmoen yóm halayen ne bulónen ne kdawen ne urasen hewà kul anì na le e hmatay botong gbut bè yó kem tau te tonok.