Tekang Kbuten 31:1 - Udél Dwata: Gna Kesfasad ne Lomi Kesfasad

¹ Gotu gungol Jakub udél yó kem ngà Laban logi, yóm kmon le du, “Deng gotu nwa Jakub yóm kdê ógóf mà. Kdê yó kem kun kendengen yó, hono lemwót bè yó kem ógóf mà.”

Tekang Kbuten 31:1 Iomraidhean Croise

Tekang Kbuten 31:2

Bud ton Jakub snéen yóm là bud hol kgulit Laban yóm gna kmoen ebéléen.

Tekang Kbuten 31:43

Omin Laban malà ke Jakub, monen, “Ni kem libun yehenem ni, hono dou ngà. Yó kem ngà le, hono dou. Ne ni kem ógóf ni, hono bud dou. Bè ktahuhen, tódô kdê ni kem tonem bè ni ni, hono dou. Okóm ni, là kô gmou du ke tô nalihu kóm yó kem ngau libun ne yó kem téméu.

Tekang Kbuten 45:13

Tulón ye ke mà yóm tey kfasangu bè ni bè Idyip ne tulón ye du se yóm kdê deng ton ye. Omin ye géhél mit du edini.”

Istér 5:11

Ya tey ksaluen knóen. Gotu tulónen kul yóm alì kbong kendengenen ne yóm alì wadag ngaen. Bud tulónen snéen yóm deng kehegeta Sérksis glalen ne yóm alì kehegetahen du senta yó kem dumu tau genlalen.

Job 31:31

Tódô kdê yó kem tau mò nmò béléu, gotu tngón le yóm tey kehdufu yó kem dumu tau gel sut béléu.

Kem Lingón 17:14

Hol lenwaem ou, Dwata, mlan bè yóm alì kegbek sigelem. Lenwaem ou bè yó kem tau són hendeen le ke wen gel guta le yóm igò le mowil. Hol tnafakem lu, Dwata. Ne yóm ktafakem kul yó, yake hol gefet bè yó kem ngà le efet bud kól bè yó kem lugod le.

Kem Lingón 57:4

Tódô snibut le ou yó kem hohonu, hol lómó kmò le, lómón yó kem liyun alì bitil móyô msék tau. Yóm ktelem yó kem nihi le, hol lómón ktelem yó kem buyus ne yó kem hanak. Tey telem kudél le, hol lómón ktelem yó kem sudeng sbalà bak.

Kem Udél Hlalak Tehe Selumun 14:30

Yóm tau menek kehedemen hyu klówóhen, okóm yóm klenget tau hengoken lem tiolen.

Kem Udél Hlalak Tehe Selumun 27:4

Yóm kebut tau tey sidek ne tey te glayam du okóm udì he nim ni ke hsenged te bè yóm keglayam te du yóm klenget tau.

Jirimaya 9:23

Yó bud udél Dwata, monen, “Yóm tau hulung hedem, hol béen abay salù yóm khulungen hedem yó. Dalang se yóm tau alì kemgis, hol béen abay salù yóm kekgisen. Yóm tau wen kendengenen, hol béen abay salù yóm kwen kendengenen.

Matyu 4:8

Omin Seitan bud mit ke Jisas eta tfusù yóm tey bulul geta, ne gotu toloken du kdê yó kem benwu talak tonok ne yóm tey kehyuhen.

1 Timuti 6:4

yó se yóm tau heklabak, laen tngónen. Són skuya mon nô bè nawahen. Senkuya le lan yó kem udél, ne yó gónón wen sélés nawa, ne sfatay, ne sedekà, ne sdelem.

Taytus 3:3

Tehe yu ekni, tehe wen se kut gel ungel, là kô te gel himón, là se dilô te du yóm ktahuhen. Tey kegfét te bè yóm sidek knóyô lówó te, ne bè yóm dê kenbeyen nawa te. Deng te gu lemen se kut yóm sdù ne yóm sélés nawa ne yóm sutó nawa.

1 Pitér 1:24

Lómón se yóm monen bè Sulat Dwata, yóm monen, “Là kóen té kun yóm klowil tau, hol lómón ke bnes. Ne yóm któtól yóm tau, lómón ke bulók lem bnes. Mahil menes yóm bnes, ne mahil mifù yóm bulók.