Sifanaya 2:9 - Udél Dwata: Gna Kesfasad ne Lomi Kesfasad

⁹ Yó gónóm mon, lemwót bè yóm là katayu, yó gónón dohò yóm udél deng monu, Angat genlau yó kem tau Muab ne yó kem tau Amun, lómón yóm tehe tódô sulék keglau yó kem tau bè yóm benwu Sodom ne Gmura. Yó angat kmou yóm kul tonok ni kem tau genlau ni, angat tódô tfeng tahen bnes semnual ne angat baling hono sol gónó le ma kahì, tonok laen dù bud muhen kól bè laen dù tul sónen. Yó kem dou tau dù tebel, angat wen megef yó kem kimu le ne gotu nwa le yó kem tonok le.”

Sifanaya 2:9 Iomraidhean Croise

Isaya 49:18

Ngem, nénégem dé yóm gu hmilolem, deng nbut le gotu stifun yó kem tauhem, gotu le bud mulék ebéléem. Ou se yóm Dwata là matayen, hol tahu yóm tulónu kóm ni. Tey kehyu nawahem bè yó kem tauhem bud mulék ebéléem, hol lómón yóm kehyu nawa yóm libun myehen bè yóm kimuhen mebtes.

Amus 1:13

Yó bud udél yóm sana Dwata hol gónó mogot, monen, “Deng tendo sensulit le mò sidek yó kem tau bè Amun, là gbeku du ke là tnafaku kul. Bè yóm kundug le ebè benwu Gilyad anì hlamang le yóm són tonok le, mom gotu snifal tnibó le yó kem libun mlutut bè yó.

Amus 2:1

Yó bud udél Dwata, monen, “Deng tendo sensulit le mò sidek yó kem tau bè Muab, là kô gbeku du ke là tnafaku kul. Gotu genbà le yóm lebeng yóm tau hol geta bè Idom ne gotu dnutung le kem tiolen efet baling kohù.

Sifanaya 2:14

Angat baling benwu gónó le nô yó kem ubiha ne kem safì ne kdéen kay ógóf lem bnes. Bè yó kem gónô deng gbà, angat gónó le lemóón yó kem kol ne tódô gungolem udél le gu tembó beng. Yóm koyu sidar alì tilob mò beng le, tódô hnas.

Sifanaya 2:7

Bè yó angat gónó le hótób ógóf le yó kem dù tau mowil bè Juda. Ke sok kifu gel le tungô bè yó kem gónô gtebel laen dù tauhen bè Askilun. Abay se yóm sana kul Dwata hol gónó mogot, là kô nan e klifót kul ne bud hen-guléken klowil le.”

Sifanaya 3:13

Yó kem dù tau Israél tebel yó, là kô le mò sidek bè kem dumu le, là kô le mò kéng ne là kô le smukat. Tey menek klowil le ne menek ktungô le ne laen kô dù bud tau hmikò kul.”

Sikaraya 2:13

Yóm kkól Dwata bè ni gu bè yóm kun gónó nô hol mólós, hol bê le abay hebnes bè soluhen yóm kdéen tau.”

Lista 14:21

Okóm ni eles tulónu kóm ne là kóen na a bud mulék elem baku nim monu ni. Tahu se yóm klaen dù sónen yóm klowilu ne bud tahu se yóm tendo kegfanen bè klamangen benwu yóm tey kegetahu.

Sulat Pol Ebè Yó Kem Tau Hemtahu Bè Rom 14:11

Deng wen tehe udél Jisas deng snulat le, monen, “Ou se yóm Dwata là kóen na a matay ne ni se hol udélu. Angat le gotu mtud bukol bè soluhu yóm kdéen tau, ne kdê le se angat mon du, ‘Uu se yóm tahu Dwata.’”