Sulat Pol Ebè Yó Kem Tau Hemtahu Bè Rom 8:3 - Udél Dwata: Gna Kesfasad ne Lomi Kesfasad

³ Yóm hlau, là kô gbeken mkó du yóm kfasang yóm salà bè klowil tekuy abay se laen dù tau tódô gembek lemolò du lemwót bè yóm tey klunog tekuy. Okóm wen kun atul Dwata, hógówen yóm Ngaen na a hbaling bè lówó tau, lómón yóm lówó tekuy kem tau gemsalà na a matay mò lanen tmuled yóm salà.

Sulat Pol Ebè Yó Kem Tau Hemtahu Bè Rom 8:3 Iomraidhean Croise

Lista 21:9

Tahu se, wen ulal tenwél Musis ne suen bè yóm hteg nmoen. Yóm tau deng nékét ulal ke temngel ebè yóm ulal hteg Musis yó, tódô mowil. Là gomongen bè nili yóm bérs 10 efet kól bè bérs 20. Hono boluy yó kem benwu tehe gónó le kmamfù yó kem tau Israél lemwót le bè Bulul Hor efet le kól bè Datal Muab.

Mark 15:27

Ne wen lewu tau gel mò sidek homong tnutuk le, sotu hteg le fi bè kwananen, ne sotu fi bè iwóngen.

Kun Snulat Jan 1:14

Yóm Udél yó koni, deng baling tau, ne mnô bélê tekuy. Laen kô dù sónen yóm klinggel nawahen ebè tau, ne hono tahu yóm gel tulónen kul. Deng hyu na me ton se yóm kegeta deng blay Maen du, yóm kegeta hol knóón bè yóm Ngaen tek sotu.

Kun Snulat Jan 9:24

Ne bud tnaba yó kem Farisi bè gewuhen dulék yóm tau tehe butô yó koni, mon le mò du, “Hol tulónem ktahuhen dé, abay se wen Dwata. Tngón me tau gemsalà tum tau hton kóm tu.”

Sulat Pol Ebè Yó Kem Tau Hemtahu Bè Rom 3:20

Abay se laen dù tau tedeng kton Dwata du lemwót bè kloloen yóm hlau. Yó muhen yóm hlau mò hdilô du bè tau yóm kegsalaen.

Sulat Pol Ebè Yó Kem Tau Hemtahu Bè Rom 6:6

Tngón tekuy se yóm gna klowil tekuy gu laan tekuy là deng hemtahu, tu se yóm klowil deng gomong bè Jisas bè yóm ktutuk le du bè kros, anì gomong tekuy matay ne laen dù bud kegbeken bélê tekuy yóm óyô mò sidek, ne là bud tekuy ghesek lem salà.

Sulat Pol Ebè Yó Kem Tau Hemtahu Bè Rom 7:18

Deng hónô tngónu yóm dou ktau, laen kô dù hyu nô béléu. Balù yóm kwen óyóu mò du yóm hyu, ewenem yó là kô dog gmou du.

Sulat Pol Ebè Yó Kem Tau Hemtahu Bè Rom 8:32

Ke là nalihen du yóm hol tek sotu Ngaen, tódô hamaen klowilen bélê tekuy, sélét mom yó ne là blayen du tekuy yóm kdê deng tehe fasaden tekuy.

Sulat Pol Ebè Yó Kem Tau Hemtahu Bè Rom 9:3

bè yó kem dou dumu Ju, yó kem tau hol dou litô. Sidek kegnómu du abay se là kô le hemtahu bè Krays. Ke yó dum gmò, mom hyu dé ke ou fen tnafak Dwata mò tles lówó le, ne ke ou fen glayuk bè Krays anì lu yóm gewà gu lem tafak.

2 Kurin 5:21

Yóm Krays, laen kô bang salaen kun. Okóm lemwót bè yóm któbóng Dwata tekuy, yó gónón fen hbô du ke Krays yó kem salà tekuy. Lemwót bè yóm deng kessotu tekuy bè Krays, deng tekuy gomong ne bè yóm kun ktedeng Dwata.

Glasya 3:13

Okóm laen kô dù tau gembek lemolò du nim ni. Yó gónóm mon, deng tekuy mom megtafak du. Okóm ke Krays, du fen megtafak lanen msok tekuy bè yóm deng kegtafak tekuy yó. Abay se deng monen bè Sulat Dwata, yó monen, “Ke wen tau matay bè kros, yó se ilô yóm ktafak Dwata du.”

Glasya 3:21

Déke ofo kuy mon du là segmung le hlau Musis yóm fasad Dwata. Là kô yó du. Ke gbek yóm hlau bemlay tekuy yóm klowil laen dù sónen, deng duhen yó ne yóm lan tekuy baling tedeng bè kton Dwata tekuy. Okóm là kô yó du.

Flipay 2:7

Okóm lemwót bè kun kóyô, gloken tódô tmebel du yóm kun kegeta na a hbaling bè kun kmò yóm tau tóbóng lówó. Tódô baling tau te tonok.

Hibru 10:12

Okóm ke Krays, tek suléken demsù klowilen mò hkó salà yó kem tau, ne wen ktueden yóm dsuen yó efet kól bè hol sónen. Ne kogol yóm kedsuen, ominen tódô myón fi bè kwanan Dwata,

Hibru 10:14

Duhen yó, olo tek suléken demsù, sana gotu hguliten yó kem tau deng hólósen bè yó kem salà le. Bè yóm kehguliten kul yó, laen dù tul sónen.

Hibru 2:14

Yó kem ngà mon Jisas yó koni, kem tau te tonok se yó, wen unged le ne wen litô le. Ne ke Jisas kun, hbaling tau mkél bélê tekuy. Yó gónón mò du anì fen matay bélê tekuy. Lemwót bè yóm katayen yó mò lanen gemlà ke Seitan, yóm fen mogot yóm hatay.

Hibru 2:17

Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy.

Hibru 4:15

Yóm gel blóng tekuy ebè Dwata yó, deng gotu tngónen yóm gónó tekuy gel lunog, ne tey kkoduhen tekuy. Abay se bè yóm tehe knóen te tonok, deng gnómen se kun yóm kdéen sindil lómón yóm tekuy, okóm là gemsalaen yó yóm kun.

1 Pitér 2:24

Bè yóm tehe ktutuk le ke Krays bè yóm kros, deng nwiten ne yó kem salà tekuy, ne deng mom du tnafak bè salà tekuy. Yó gónón mò du yóm yó anì tnagak tekuy yó kem sidek gel nmò tekuy, ne anì hol nô bè nawa tekuy mò du yóm hyu. Du se yóm tehe alì glayam, ne yu se yóm fen hyu bè kililen.