Mark 11:18 - Udél Dwata: Gna Kesfasad ne Lomi Kesfasad

¹⁸ Ne gungol le se kul yó kem geta bè yó kem gel demsù ebè Dwata, ne yó kem tau gel tmolok hlau yóm deng nmò Jisas yó. Yó nmò le, mebel le lan le hmatay du, okóm likò le béléen, abay se tey tau wen gel hmungol du yóm ktoloken, ne tey kehtaw le du.

Mark 11:18 Iomraidhean Croise

1 Bok Kem Tau Hol Geta 21:20

Timbow ton Ahab Ilaydya, yó monen mò du, “Na, deng tonen o yóm hohonu.” Bnalà Ilaydya se, monen, “Él, tonu uu. Ni gónów mógów edini, abay se deng mom hotuhem nawam mò du yóm sidek bè kton Dwata kóm.

1 Bok Kem Tau Hol Geta 22:18

Yó mon Ahab mò ke Jihusafat, “Deng tulónu kóm se yóm klaen dù hyu gel tulónen gbak ebéléu. Són tulónen, són sidek.”

1 Bok Kem Tau Hol Geta 22:8

Bnalà Ahab se, monen, “Wen sotu duen tugod Dwata, okóm tey keklitu du. Laen kô dù hyu deng tulónen do, són yóm sidek. Yó boluyen Mikaya ngà Imla.” Bnalà Jihusafat se, monen, “Béem abay mon yóm yó. Na te na hnungol ke tedu yóm kun tulón.”

Isaya 49:7

Wen udél Dwata ebè yó kem tauhen Israél yóm Dwata laen dù belenen yóm lemwà kul. Abay se ni kem tauhen ni, hono tau kenhisik kem dumu tau ne gel knutó nawa le lu yó kem dumu benwu, deng le baling hesek bè yó kem tau mogot benwu. Yó udél Dwata ebélê le, monen, “Angat ton yó kem tau hol geta yóm kegewà ye. Bè yóm kton le kuy tódô le hteneng mdà, botong lan le hol madat kuy. Gotu ton le yu se kul yó kem ngà tau hol geta. Tey keheglaan le bélê ye, botong lan le madat kuy.” Hol tahu dohò nim ni, abay se deng nélék Dwata yóm mò tóbóng lówóhen. Yóm fmasad du kuy nim ni, duhen yóm Dwata yó kem tau Israél, yóm laen kô dù belenen. Là kóen bud mulék elem baken yóm deng fasaden yó.

Matyu 21:15

Okóm yó kem geta bè yó kem gel demsù ebè Dwata ne yó kem gel tmolok hlau, gotu le mom lembut bè yóm kton le yó kem hentaw ton nmò Jisas ne bè yóm kungol le yó kem ngà tendo dmóyón du bè yó lem Gónô Dwata. Yó tendo mon le, “Hol dóyón tekuy dé yóm sfu yóm tehe Dabid.”

Matyu 7:28

Yóm deng ktulón Jisas du kdê ni kem ni, tey kehtaw le du yó kem tau sbung,

Mark 1:22

Tey keseftaw le du yó kem tau hmungol du, abay se là mkélen bè yóm kul ktolok yó kem tau gel tmolok hlau bélê le. Alì mfasang yóm kun ktolok Jisas.

Mark 11:32

Bud là hyuhen se ke mon tekuy lemwót bè tau.” Yó gónó le mon du yóm yó, abay se likò le bè yó kem tau, yakà bè kul kehedem du hol tau tugod Dwata yóm Jan.

Mark 12:12

Tódô tngón yó kem tau gónó le galak yó kem Ju yóm kegbaken ebélê le yóm deng hningón Jisas yó. Yó nmò le, tódô tô kendel kenfô le, okóm likò le yó kem tey tau wen sbung bè yó. Tódô sentagak le Jisas bè yó, ne mulék le.

Mark 3:6

Okóm yó kem Farisi, tódô le lemwót bè yó, mógów le ebè yó kem tau genlal bè Hirod, sensatul le yóm kmò khatay le ke Jisas.

Mark 6:20

Abay se ke Hirod, wen klikoen ke Jan. Tódô tngónen tau tedeng kmoen, bà udì ke wen belenen, yó gónón gel mofin du. Tey móyô Hirod hmungol du yóm gel tulón Jan, okóm deng mom sónmoen sbeweg kehedemen bè yóm gel khungolen du.

Kun Snulat Luk 19:47

Kewóten bè yó ne, ket kdaw Jisas gel tmolok lem yóm Gónô Dwata. Ne ya tey kesefebut le du yó kem geta bè yó kem gel demsù ebè Dwata, dalang se yó kem tau tmolok hlau, kkólen bè yó kem dumu tau gónó le gel galak yó kem Ju. Hol kóyô le ke hnatay le Jisas.

Kun Snulat Luk 2:47

Tey ketnga le du yó kem hmungol du bè yóm khulungen malà kul.

Kun Snulat Luk 20:19

Tódô tngón yó kem tau gel tmolok hlau ne yó kem geta bè yó kem tau gel demsù ebè Dwata yóm kegbaken ebélê le yóm hningón Jisas yó. Ne tódô tô kendel kenfô le bè yó, okóm knikò le yó kem dumu tau.

Kun Snulat Luk 4:22

Tódô kdê le gotu beyen hmungol du. Tey keseftaw le du yóm klinggel yó kem udél gel btang gu bè sumóngen, mon le, “Igò sem ni du yóm ngà Jusif.”

Kun Snulat Jan 7:1

Kogolen bè yó, són bè yó kem benwu snakuf Galili gónó Jisas e gel mógów na a tmolok. Là móyóen mógów bè yó kem benwu snakuf Judiya abay se sónmò le móló hmatay du yó kem Ju wen glal le bè yó.

Kun Snulat Jan 7:19

Igò Musis se deng bemlay du kuy yó kem hlau, là sem dog nimón ye du. Moen de ke sónmò ye móló hmatay dou?”

Kun Snulat Jan 7:46

Mon le se, “Laen kô dù tau gemsenged du udélen tum tau tu.”

Kul Nmò 24:25

Bè yóm igò Pol mudél, wen gtóngen bè yóm kebtol nawa, ne bè yóm khulung mafas nawa, ne yóm angat kehdà Dwata kdéen tau bè soluhen. Botong likò Filik bè yóm kungolen du, tódô tenfloken kudél Pol, monen, “Nan geblà yó he. Tódô bud tinoku uu he ke wen urasu.”