Kmukum 6:21 - Udél Dwata: Gna Kesfasad ne Lomi Kesfasad

²¹ Omin yóm hógów Dwata mdù du bè yóm utón yó ne yóm mambang yóm tukô tugeden. Tódô sen-gengen se yóm tey dilóf ofi hesut gu lem yóm botu yó, gotu mkekeb yóm utón ne yóm mambang. Ne sen-gengen se tódô lana yóm hógów Dwata yó koni.

Kmukum 6:21 Iomraidhean Croise

1 Bok Kem Tau Hol Geta 18:38

Sen-gengen se wen ofi hwit Dwata gu bè longit, gotu kenen yóm dsù Ilaydya, ne yóm koyu snuken, ne yó kem botu ne yóm tonok. Ne bud gotu hektihen se yóm él leminu lem kanal.

1 Tutul Israél 21:26

Hdà Dabid bè yó yóm gónó demsù ebè Dwata, ominen demsù yóm dsù hkekeb ne yóm dsù mit sefyu ebè Dwata. Ominen mni bè Dwata, ne bnalà Dwata yóm hnihen hlanen bè yóm tey ofi hwiten gu bè longit mò hmekeb yóm dsù eles nô ta yóm gónó demsù.

2 Tutul Israél 7:1

Timbow deng kni Selumun bè Dwata, tódô wen ofi mkal lemwót gu bè longit, gotu kenen yóm dsù hkekeb le ebè Dwata, ne yó kem dumu dsù le ebéléen, ne tódô tfengen lem yóm Gónô Dwata yó yóm tey keslinang Dwata.

Kmukum 13:19

Omin Manu ma yóm ngà kambing ne wen halay suen bè yó ta botu, ominen demsù du ebè Dwata. Ne wen tey hentaw ton nmò Dwata igò le temngel le Manu lewu le yehenen.

Kmukum 13:20

Yóm igoen dmilóf eta yóm ofi lemwót bè yóm gónô Manu demsù, tódô ton le Manu ne yehenen yóm hógów Dwata yó koni haway etta bè longit, mung bè dilóf ofi efet tódô lana lem mata le. Timbow tngón le hógów Dwata gu bè longit yóm tau yó koni, tódô le hegluduk bè tonok lewu le yehenen. Ne là bud ton le du ne yóm hógów Dwata yó.

Kmukum 6:20

Yó monen mò du yóm hógów Dwata, “Suem ta nim botu nii yóm utón ne yóm mambang nwitem, kokem etahen yóm sóbów.” Tahu se, nmò Gidyun yóm hmoen du yó.