Husiya 3:1 - Udél Dwata: Gna Kesfasad ne Lomi Kesfasad

¹ Omin Dwata bud mudél ebè Husiya, monen mò du, “Yó ne, Husiya, lemwóti nam e nangay yehenem. Bud hulékem ebéléem ne hol kenbong nawahem balù yóm deng kmungen bè yóm logi hemdóyón du, baluen ke deng ndaen uu. Hol kenbong nawam lómón yóm kbong nawahu yó kem tau Israél, balù yóm deng kebeklil le ebè yó kem dwata kéng ne yóm deng kedsù le ebélê le yó kem dsù alì megélék.”

Husiya 3:1 Iomraidhean Croise

2 Samwél 6:19

Ominen bemlay yóm kdéen tau Israél, logi duhen libun, ket sotu mambang tahà, ne wen ngà utónen, ne ket sfunges yóm bungu grép deng hendaw. Omin le gotu mulék yóm kdê le.

2 Bok Kem Tau Hol Geta 13:23

Okóm yóm Dwata, tey kkoduhen kul yó kem tau Israél, ne yó gónó le là gotu meglà. Knoduhen lu lemwót bè yóm deng kesfasad le Dwata Abraham ne Isak ne Jakub. Efet ni kmoen ni, là kô sulék genlaen kul yó kem tauhen, ne là se kô tebelen kul.

1 Tutul Israél 16:3

Tódô ket tau bè Israél, logi duhen libun, benlay Dabid basa mò ken le, benlayen lu ket na sotu mambang ne wen utónen ne sfunges kem bungu grép deng hendaw.

Nihimaya 9:31

Okóm lemwót bè yóm alì kkoduhem kul, là kô dog bayaem kul ne là se dog genlaem kul. Tey minggel nawam yóm uu, Dwata, ne tey kkoduhem tau.

Kem Lingón 123:2

Yóm klengalau ni, hol lómón ke yóm ngà logi gel tóbóng lówó, sónmoen lengalà ebè yóm gónóhen mogot, duhen ke yóm ngà libun gel tóbóng lówó, sónmoen lengalà ebè yóm gónóhen mogot se kun. Lómón yó se kum klengalà ebéléem, Dwata yóm hol kum gónô mogot, nangat me yóm kkoduhem kum.

Kehewà 32:6

Timbow hol hlafus bè yó, wen kem ógóf nwit le mò dsù hkekeb le ebè Dwata ne wen kem dumu nwit le mò ken le bè yóm kessotu nawa le. Tikóng deng deng yóm kedsù le, omin le gotu stifun mken ne omin le gotu hlengel ne hbusaw mò samuk.

Isaya 45:22

Beklil ye ebéléu dé anì lenwau yu, yu kem tau bè klamangen benwu. Tek són ou yóm Dwata, laen dù dumuhen.

Jirimaya 3:20

Okóm kem tau Israél, deng mom tebel ye ou. Deng ye mkél bè yóm libun tebelen yehenen,” mon Dwata.

Jirimaya 31:20

Yó bud udél Dwata, monen, “Ó Israél, uu se yóm ngà kenbong nawahu yóm hol gónón nô nawahu. Là gbeku du ke là tehe tnafaku kóm, okóm là kô kó nawahu kóm. Són uu yóm tendo nô bè nawahu ne tey kkoduhu kóm.

Husiya 11:8

Ó kem tau Israél, mò tô keblayu kuy elem hólól yó kem hohon ye du? Mò tô kbayau kuy bélê le du? Là gbeku du ke sulék genlau yu lómón yóm tehe keglau yóm lewu kem benwu Adma ne Sibuim. Lebà nawaw ke yó tô nmou. Tey mget yóm kbong nawaw kuy.

Husiya 2:5

Abay se yóm yê le, libun hdóyón deng tódô mlutut hkawang, laen kô dog yaken. Yó tehe gel monen, ‘Mebele kem logi hemdóyón do, hbaluu knóu bélê le mò lanu bè kkenu ne bè kinumu, ne bè knesu yó kem nes mfól ne nes bukay mebtes ne mò lanu bè hnolo ulib.’

Husiya 4:11

Là bud le hulung hedem ne yó kem dou tau lan le tendo gel minum ninum lóbô ne lan le tendo smamuk.

Amus 2:8

Bè yóm gel ktaba le ebè yó kem dwata le, deng le mom tungô klohok yó kem gónó gel demsù, igam le yóm nes sandà le bélê le yó kem tau élél. Mom ninum le lem gónô dwata lennged yóm tifas grép nwa le gu bè yó kem tau mutóng filak bélê le.

Amus 6:6

Minum ye tifas grép lem tukung ne lunol ye bè lówó ye yóm hboo alì minggel boohen, okóm là kô dog knangag ye du yóm móyón keglà yó kem tau Israél.

Mika 7:7

Okóm béléu do, són bè Dwata gónów htóbóng. Là kóen megewu nawahu du yóm angat kehewaen dou. Gel hnungolen ou yóm dou Dwata.

Sikaraya 1:16

Yó gónóm mon, yó bud udél Dwata, monen, Denge bud mulék ebè Jirusalim lanu kmodu yó kem dou tau. Angat bud tenlob le yóm dou Gónô bè yó, dalang se yóm dou syudad, angat bud hdà le. Yóm Dwata laen dù là gbeken du nim mudél ni.’

Matyu 26:50

Omin Jisas mudél ebè Judas, “Yó ne, Wè, géhél nmoem yóm nógówem.” Omin le gotu demlu kemfô ke Jisas, ya tey kget kogot le du.

1 Kurin 10:21

Bélê tekuy kem tau hemtahu, ke deng tekuy gbót minum bè kun ninum yóm gónó tekuy mogot, là kô gbek tekuy du ke gbót tekuy minum bè kul ninum yó kem busaw. Ne ke deng tekuy gbót mken bè kun lemisa yóm gónó tekuy mogot, là kô gbek tekuy du ke gbót tekuy mken bè kul lemisa yó kem busaw.

1 Kurin 10:7

Hol bê tekuy abay hemtahu bè yóm dwata kéng. Wen se bélê le tehe mò du ekni, lómón yóm monen bè Sulat Dwata, yóm monen, “Gotu le stifun mken, ne omin le gotu hlengel ne hbusaw mò samuk.”Hol bê tekuy abay mò samuk. Wen se bélê le tehe mò du ekni, ya tey ktafak Dwata kul. Botong lewu folò tlu libu kwen le segeng hnatay Dwata bè yóm kdaw yó.

1 Pitér 4:3

Geblaen ne yóm kmò ye du yó kem sidek gel nóyô yó kem tau là temngón ke Dwata. Tehe gel nmò ye yóm gel hemyak knô. Tehe nmung ye yó kem sidek knóyô lówó. Ne lel ye tehe gel hlengel, ne dê sidek nmò ye lemwót bè klengel ye. Ne dê sidek tehe nmò ye bè yóm klolò ye yó kem dwata kéng.