Husiya 1:10 - Udél Dwata: Gna Kesfasad ne Lomi Kesfasad

¹⁰ Okóm angat kól yóm kdawen bè yó kem tau Israél yó, angat tey kwen le lómón helek bè kilil mohin, là gbekem msó kul. Ominen bè yóm benwu tehe gónó Dwata mon du mò kul, ‘Là do tau du,’ bud bè yó se angat gónó Dwata mon du mò kul, ‘Yu se hol kun ngà yóm Dwata laen tul katayen.’

Husiya 1:10 Iomraidhean Croise

Tekang Kbuten 13:16

Angat hol hwenu bólem, laen kô dù gembek msó kul yóm kdê le, lómón ke nsóhem kfung te tonok.

Tekang Kbuten 22:17

Ne angat hol hwenu bólem, lómón kwen le blotik bè longit ne lómón kwen le helek bè kilil mohin. Ne angat le gel matù bè yó kem hohon le.

Tekang Kbuten 32:12

Hol béem klifót yóm deng kfasadem du dou yóm klaen dù hemenu bè yóm bud kuléku ne yóm kehwenem bólu là gbek tau msó kul, lómón kwen le helek bè kilil mohin.”

2 Samwél 7:24

Ne deng hbegelem yó kem tauhem Israél mò hol kóm nfun ne laen dù tul sónen, ne deng uu se baling hol kul Dwata.

Isaya 43:6

Angat dóku yó kem benwu fi debwak anì hulék le lu. Senged se yó kem benwu tofi leged anì là nali le kul. Angat dóku yó kem tau bè benwu mayuk anì hulék le lu yó kem dou tau lemwót le gu bè kdéen benwu talak tonok.

Isaya 48:19

Ke deng tehe hnungol ye, deng le tey mobung ne yó kem sfu ye lómón kwen le helek. Ne lemwót bè yóm kofinu kul laen dù tau gembek gemlà kul.”

Isaya 63:16

Uu se yóm hol kum mà. Yó kem tehe fù me Abraham ne Jakub, là bud tenngón le kum. Okóm uu se hol kum mà yóm gónó me mogot, yóm tehe gel lemwà kum.

Isaya 64:8

Okóm uu se, Dwata, kum mà. Lómón ke mi yóm tonok gel nmò le kuleng ne uu se yóm mifil kum. Uu se tehe dmimun kum.

Isaya 65:1

Yó udél Dwata, monen, “Deng eles hendemu ne kbalau du ke mni le béléu yó kem dou tau, okóm là sem dog le mni béléu. Deng eles nangatu ne yóm kebel le do, okóm là sem dog nebel le do. Là kô le dog mni béléu yó kem tau bè dou benwu, igou sem deng eles mangat kul anì yó tô monu mò kul, ‘Ni ou. Angat tnóbóngu yu.’

Jirimaya 33:22

Angat hbólu yó kem sfu Dabid yóm tau tóbóng lówóhu, dalang se yó kem sfu Libay mò blóng ebéléu. Yóm kmò kehbólu kul, hol lómó kwen le blotik bè longit ne lómón kwen le helek bè kilil mohin, là kô gbek msó kul.”

Danyél 6:26

Wen udinu bè kdéen tau balù kihu gónó le nô lem nim benwu knamalu, kóyóu ke hol knikò ye yóm kun Dwata Danyél. Yakà du se yóm Dwata laen tul katayen, laen se dù sónen yóm kun klowil. Yóm kogoten tau, laen kô dù tau gembek gembà du ne laen kô dù sónen yóm kun kogot.

Husiya 1:9

Ne yó mon Dwata mò ke Husiya, “Boluyem du Lo-ammi yóm ngà sut yó, abay se là do tau du yó kem tau Israél ne là se kô ou du yóm kul Dwata.

Husiya 2:23

Bè yóm kdaw yó, hol lómón ke huluhu lu yó kem tau Israél ta yóm dou tonok mò hol dou nfun. Yó kem tau tehe bnoluyu ‘Là kenbong nawa’ hol hegfanu bélê le yóm kbong nawahu kul. Ne yó kem tau tehe bnoluyu ‘Là dou tau du’ yó se angat monu mò kul, ‘Yu se kem dou tau.’ Ne yó se kul balà do, mon le, ‘Uu se yóm kum Dwata.’ ”

Kun Snulat Jan 1:12

Okóm kdê yó kem tau hemmóyô du, ne hemtahu béléen tódô benlayen lu kwalis baling ngà Dwata.

Sulat Pol Ebè Yó Kem Tau Hemtahu Bè Rom 8:19

Tódô kdê yó kem deng dlimun Dwata, tey kessangat le du se kul yóm kdaw angat kehegfan Dwata du yóm deng kngaen tekuy.

2 Kurin 6:18

Ou se baling Mà ye, ne yu baling kem dou ngà. Ni se udél yóm gónó tekuy mogot yóm laen dù là gbeken du.”

Hibru 11:12

Balù yóm deng ktuha Abraham, lómón ke là bud gbeken du mngà, okóm deng mom du yóm alì mobung bólen. Yó kwen le, lómón blotik bè longit, ne lómón helek bè kilil mohin, là gbekem msó kul.