Lucas 3:14 - Tagbanwa Calamian

¹⁴ Taa numanyan may mga sundalu ka asan ang pamamati ang ya si kay namagdasun ang namagtalimaan tung anyang mag̱aning, “Maskin yami pa rin, kung puidiami ka rin nuyung mapainunukuan, unu pa w̱asu ay dapat ang buaten yamen ang para indiami ka magkamaningan ang katulad ka tung inaning mu nungayna?” Mag̱aning ti Juan ang minles, “Tabtaw̱en mi ra atiang panlepes mi tung mga tau ang yang duma ya rag paleg̱ay mi ang para mamakdul ta kuarta tung numyu, ang yang duma kung indi mamakdul, ya ra ileg dataay mi ta kasalanan ang para ipakaw̱ut tung abwat. Dispuis yang magkatama, kumpurmi ra ilem yang nag̱isuildu tung numyu, ya ra ilem ay pasalamatan ming risibien,” mag̱aning ti Juan tung nira.

Lucas 3:14 Iomraidhean Croise

Mateo 8:5

Taa numanyan, atiing ti Jesus kuminaw̱ut da duun tung lansangan ang Capernaum, may nagpakigbag̱as tung anyang sasang kapitan tung sang grupung mga sundalung atiang mga tag̱a Roma. Durung pakiildaw na tung ni Jesus ang mag̱aning, “Ameey, yang turuw̱ulunu paglaru. Ya ra ileg lalakday takaa tung balay ang indi ra mapangimi-kimi. Durug liwag yang pagkabetang na.”

Lucas 19:8

Taa simanyan, buay-w̱uay ra ta gesye, nagkereng da ti Zaqueo ang nagbitala tung ni Ginuu ta ang mag̱aning, “Buinu, Ginuu, binilug̱u ra yang isipu. Anday dumang buatenu, ya ra taa: Yang katengaan yang kamanggaranu ipamakdul-pakdulu ra tung mga maliliwag̱en. Kung tinu pay nadayaanung pinanukutan ta subra, paulikanu ra ka ta epat ang dubli,” ag̱aaning.

Lucas 3:10

Atii muya-muyang mamagtalimaan yang mga tau tung anya ang mag̱aning, “Tay kung maning tii yang bitala mu, unu pa w̱asu ay dapat ang buaten yamen ang para indiami ka magkamaningan?”

Lucas 3:13

Mag̱aning ka ti Juan ang nagtimales, “Indi mi ra pagsukutun yang mga taung subra ra tung urdinansang ipinakdul tung numyu,” mag̱aning.

Mga Binuat-buatan 10:7

Pagkatapus dayun dang nagliit yang angil ang atiang nagpaske tung anya. Numanyan ti Cornelio tanya, dayun dang nangguuy tung duruang bilug ang turuw̱ulun na may tung sam bilug ang sundalu nang nag̱atalig̱an na ang ya kay matinumanen tung mga katuw̱ulan yang Dios.

Filipos 4:11

Nag̱apagbitalaw ta maning tia belag̱an ang mag̱aning ang natetenged ang begbeg da yang kuluu natetenged tung mga kaministiranu. Ay kipurki ta yeen, maskin unu pay mabtanganu, sanayaw rang manalunga ang kuntintu tung isipu.

Tito 2:3

Asta mga mamaepet ang mga baw̱ay ya ka. Pademdemen mu ka ang yang tanan ang mga pag̱urulag̱en nira dapat ang eklan ka nira tung ikadengeg yang Dios. Bilang belag̱an kunliw̱aknen, indi ka magpagamen ang subra tung irinemen ang binu. Kaministiran kang magturuldukun tung mga kaarumanan nirang mga baw̱ay ang mga kinamamulaan pa natetenged tung pagburuaten ang matitinlu.

Ipinag̱ubligar 12:10

Pagkatapus may nagngelung busis ang durug tunul tung langit ang nagbitala ang mag̱aning, “Ay salamat! Yang Dios ang naang pag̱atuuan ta, talagang ipampalibri na ra ka enged yang mga tauan na, ay ipalua na ra ka enged yang paggaraemen nang durug puirsa ekel tung pag̱aningen ang Cristong pinagpilik na ang ya ray talig̱an nang magpapanaw tung paggaraemen nang baklu tung bilug ang kaliw̱utan. Siguradung ya ray mainabu natetenged anda ra taa tung katalungaan yang Dios yang manigpamangdan tung mga kaputulan ta law̱iig kaldaw natetenged tung mga kasalanan nira. Kinaskas dang pinaliit taa tung langit.