Lucas 18:23 - Tagbanwa Calamian

²³ Numanyan pagkagngel na tia inampayan da ta kapupungawen nang duru. Ay ya pa ag̱ari, durung kamanggaran na.

Lucas 18:23 Iomraidhean Croise

Mateo 19:22

Numanyan pagkagngel yang kaw̱ataan yang itinuw̱al ni Jesus ang atia tung anya, dayun da ilem ang nagliit ang duru rag kapungaw yang isip na. Ay ya pa ag̱ari, durung kamanggaran na.

Marcos 10:22

Pagkagngel na tia, gulpi rang natalmed yang ityura nang nanluluw̱ay. Dayun da ilem ang nagliit ang duru rag kapungaw yang isip na. Ay ya pa ag̱ari, durung kamanggaran na.

Lucas 12:15

Pagkatapus tia, dayun dang nagbira tung mga tau ang nagpasanag tung nirang mag̱aning, “Yamung tanan asan, mangamanamu ang indiamu mag̱amluk ang kuw̱ali manalensenamu tung maskin unu pang bag̱ayay! Kipurki yang matinlung pagpangabui yang sasang tau, belag̱an liit tung mga kaayenan ang sarang maeklan na tung kaliw̱utan ang naa, maskin unu pag kadakel,” ag̱aaning.

Lucas 18:22

Pagkagngel ni Jesus yang tuw̱al na, mag̱aning tung anya, “Ya ra ilem taa yang pagkakulang tung nuyu. Mulika ra kanay. Yang tanan ang kamanggaran mu ipaalang mu ra. Yang kabayaran nang kuarta ipamakdul-pakdul mu ra tung mga maliliwag̱en. Kung yay tumanen mu, ay tia simpanana ra yang Dios ta kamanggaran mu duun tung langit. Pagkatapus ta pamakdul-pakdul mu, magbalika ra ka tani ang magpaugyat tung yeen,” mag̱aning.

Lucas 18:24

Numanyan pagkaita ni Jesus tung anyang magpungawen da, dayun dang nagbitala tung mga tau ang mag̱aning, “Durug liwag ang yang sasang manggaranen magpalamtuk yang pundu yang kinaisipan nang magpagaem ta bug̱us tung Dios.

Lucas 19:8

Taa simanyan, buay-w̱uay ra ta gesye, nagkereng da ti Zaqueo ang nagbitala tung ni Ginuu ta ang mag̱aning, “Buinu, Ginuu, binilug̱u ra yang isipu. Anday dumang buatenu, ya ra taa: Yang katengaan yang kamanggaranu ipamakdul-pakdulu ra tung mga maliliwag̱en. Kung tinu pay nadayaanung pinanukutan ta subra, paulikanu ra ka ta epat ang dubli,” ag̱aaning.

Lucas 21:34

“Ug̱aring ta yamung mga tauanu, kaministiran ang insapuen ming pirmi yang mga sadili mi. Indiamu enged magpakalingat tung pagpakasadyang subrang pagpabuu. Pati yang pagpangabui mi tung kaliw̱utan ang naa, indi mi ka paliw̱eg̱an ta mga kulu mi. Muya kaw̱utanamu ra yang uras ang atiang makakaeled ang belag̱anamu riparasiun ang yang kaalimbawaan na maning pa tung sasang balatik ang inali ra ilem ang meyas. Kipurki yang tanan ang mga tau tung sagpaw yang kaliw̱utan, luw̱us ang mangasapul tung uras ang atia.

Lucas 8:14

Yang linegdangan yang tanek ang atiang may mga laskaw ang masapiniten, ya ra yang duma ang maskin pamati tung bitala yang Dios, piru tung pagpanaw yang uras, kumus durung pagpakabegbeg nira tung pagpangabui nira ubin may gustu nirang magmanggad ubin may gustu nirang magpapsaw ra ilem tung mga kalelyag̱an nirang sadili, yang bitalang nagngel nira maning pa tung asan da ilem nga kipit ang asta anday pinakaw̱ut na.

Efeso 5:5

Kipurki papatandaan mi ta maayen yang bitalaung naa. Kumpurming tinu pay kumbaw̱aynen ubin kunlaliien, ubin kadagmitan ang paggamit yang pagkalalii na ubin pagkabaw̱ay na ang baliskad tung katuyuan yang Dios, ubin kadagmitan ang pag̱amluk tung mga kaayenan ang pangkaliw̱utanen ka ilem ang ya si ay nag̱ipakli na tung Dios ang yay nag̱apalusuan na ta gegma na, yang mga taung maning tia yang pag̱urubraen nira, indi ra enged pampaintraen yang Dios tung paggaraemen nira ni Jesu-Cristo tung kaliw̱utan ang baklu.

Filipos 3:8

Belag ilem nuntukaw yang pagpabetangung anday kuinta yang mga bag̱ay ang atia, kung indi, ang asta ra ilem simanyan, maskin unu pa man ang bag̱ayay ang midyu pag̱atelengan ta duma may ruma ang maayen ang panalig̱an, luw̱us dang ag̱ipabtangung anday kuinta na natetenged landaw rang pisan yang kamamaalen yang pagkinapulitay yamen ang naa ni Jesu-Cristo ang yay sadiling Ginuuu. Arangan da ilem tung anya pinaw̱ayaanu ra ilem ta paplek yang tanan ang atiang minaalu ra rin. Ya ra ilem ag̱ipabtangayung basura ug̱ud ti Jesu-Cristo mismu ya ray pakigkapulitanu kag yadwa pa ug̱ud masadiliaw ra anyang pisan. Indiaw ra pagtalig ang puidiaung risibien yang Dios natetenged tung sadiling pag̱urubraenung pagtuman yang mga katuw̱ulan na, kung indi, bug̱us da yang pagtalig̱u tung ni Jesu-Cristo. Kipurki yang papanaw yang Dios ang mag̱usgad tung yaten ang saluita rang pisan tung pagterelengen na ay ekel ilem tung pagtalig ta tung ni Jesu-Cristo.

Colosas 3:5

Kapurisu kumus maning da ka man tia yang mabtangan mi tung uri, tabtaw̱en mi ra enged yang pag̱urubraen ming mga malalain ang katulad ka tung sasang taung napatay ra ang natabtab da ka yang pag̱urubraen na. Pariu ra asan tung pangumbaw̱ay may pangunlalii. Asan da ka ta paggaramiten yang pagkalalii nira ubin pagkabaw̱ay nira ang baliskad tung natural kang lag̱i nirang disti pa tung primiru. Asan da ka ta isip nang indi ra temegka ang indi na buaten yang malain. Indiamu ra ka mag̱amluk tung mga kaayenan ang pangkaliw̱utanen ka ilem. Ay kipurki kung mag̱amlukamu, katimbang nang ya si ay nag̱ipakli mi tung Dios ang nag̱apalusuan ta gegma mi.

1 Juan 2:15

Indiamu enged magpagamen yang mga isip mi tung sistimang pangkaliw̱utan ubin yang maskin unu pang mga palaksuay na. Ay kung tinu pay magpagamen yang isip na asan, indi ra ka enged masarang ang magegma tung Ama tang Dios.