Juan 8:40 - Tagbanwa Calamian

⁴⁰ Piru simanyan pagbalakamung magpaimatay tung yeen, ang yuu ka man sasang taung nagpakaw̱ut tung numyu yang kamatuuran ang nagngelu tung Dios! Belag maning tia yang binuat ni dipuntu apu tang Abraham.

Juan 8:40 Iomraidhean Croise

Juan 7:1

Pagkatapus tia, duun da ilem tung Galilea nagliliw̱utun ti Jesus. Ay ya pa ag̱ari, anday gustu nang magliliw̱utun duun tung Judea natetenged agtimaan dang imatayen yang mga pamagpakigmaepet duun.

Juan 8:26

Duru pa rin ang puiding masambitu natetenged tung numyu ang nunut pa ka rin ta pagsintinsiaw tung numyu, piru indi ilem buatenu numanyan. Kung indi, yang sarang ang ipagpakaw̱utu tung mga tau taa tung kaliw̱utan, kumpurmi ra ilem yang nag̱agngelu tung nagpangay tung yeen ang pagkatapus tanya talagang matalig̱an ang pulus matuud yang nag̱ianing na,” mag̱aning.

Juan 8:56

Kung natetenged tung kinaampu tang atiang nag̱asambit mi ang ti dipuntu apu tang Abraham, durung pisan agkasadya yang isip nang nagpakbat din tung uras ang ipag̱ingtauu taa tung kaliw̱utan. Ang pagkatapus numanyan, naita na ra ka man ang duun da nagkalipay yang isip na ta mupia.”

Roma 4:12

Belag̱an ilem tanirang anday tanda ay pinamuaran na, kung indi, pati yang may mga tanda ang simanyan belag dang yay panalig̱an nira, kung indi, nagtalig da yang mga sadili nirang bug̱us tung ni Jesu-Cristo ang asan da ka nasug̱ut tung ni Abraham ang kinaampu nira ang yay tukaw ang nagtalig yang sadili nang bug̱us tung Dios, atiing indi pa nganing nag̱apabuatan ta tanda.

Galacia 4:16

Ayw̱a, numaan basu ag̱ipabtangaw ra ilem numyung sasang kasuay mi natetenged pagpadayunaw pang pagpadapat tung numyu yang kamatuuran?

Galacia 4:29

Dispuis pa kung balikan ta yang kapanawan yang nagkainabu tung mga ana ni Abraham ang atiing durua, yang sam bilug ang inana na tung pastikular ka ilem ang papanaw dineeg-deeg̱an na yang sam bilug ang inana na ekel tung kagaeman yang Espiritu Santo. Maning ka tia yang nag̱ainabu numanyan. Ay itang pagtalig tung sasang kanubli ni Abraham ang ti Jesu-Cristo nag̱adeeg-deeg̱anita ka yang duma ang yang nag̱apapaktelan nira ya ra yang ipinagpakigpaig̱ung atiing sam bilug sigun tung mga katuw̱ulan.

Ipinag̱ubligar 12:17

Pagkatapus yang dragun, nasilag da ta duru tung baw̱ay. Purisu naningayaw ra ang para kuntraen na ra ta maayen yang kadaklan ang mga kanubli yang baw̱ay ang naa ang ya ra ka man yang pamagtuman yang mga katuw̱ulan yang Dios ig pamag̱ubligar ang ultimu ilem ti Jesus yang dapat tingaraen nirang may kalalangan tung nira.

Ipinag̱ubligar 12:4

Simanyan yang ikuy na ya ray ikinaliweswes na tung yaklung parti yang mga dumakel tung langit ang pagkatapus ya ray gulping ipinabungsad na tung katanekan. Dispuis pa yag tatalunga tung baw̱ay ang atia ang ya rang ya rang mangana, ug̱ud kung maluangan da nganing, panganen na rang lag̱i yang mula.