Mattiu 5:19 - Tedim Bible

¹⁹ Tua ahih ciangin, mi khatpeuh mah in Thukham a neupen khial a, midangte zong hilh a, a khialhsak leh, tua mi, Vantung Gam sungah mi neupen a kici ding hi. Mi khatpeuh mah in thukham zui a, midangte hilh a, a zuih sak leh, tua mi, Vantung Gam sungah milian a kici ding hi.

Tedim Bible Revision 2017

¹⁹ Tua ahih manin hih thukhamte lak pan a neu pente khat bek nangawn zui kha loin, midangte in zong a zuih loh nadingin a gen mite pen vantung ki-ukna sungah mi neu pen hi ding uh hi. Ahi zongin hih thukhamte zui-in, midangte in zong a zuih nadingin a hilh mite pen vantung ki-ukna sungah mi lian hi ding uh hi.

Mattiu 5:19 Iomraidhean Croise

Late 119:128

Tua ahih ciangin na thuhilhte khempeuh tawh kituakin kei ka gamta hi; a man lo lampi khempeuh ka mudah hi.

Late 119:6

Tua ciangin, nangma thupiakte khempeuh mitsuanin nei khin ka hih manin, kei ka maizum kei ding hi.

Daniel 12:3

A pilte ahih uh leh vantung khuavak tawh a taang khawm ding uh hi. A pha-a a gamtat nading uh mi tampi thu a hilhte in aksi bangin a taang tawntung ding uh hi.

Mattiu 11:11

Ke’n aman takpi kong cih-inah, numei sung pan a suakte lakah Baptaizpa Johan sanga lianzaw khat beek a om kei hi. Ahih hangin Vantung Gam sungah a neupen in tuapa sangin a lianzaw hi.

Mattiu 19:28

Zeisu in, “Ke’n aman takpi kong cih-inah, na khempeuh a thak kibawl kik a, Mihing Tapa in vangliatna tokhom tungah a tut ciangin ka nung hong zui note in thukhen tokhom sawm leh nih tungah tu-in, Israel mipawl sawm leh nihte tungah thu na khen ding uh hi.

Mattiu 20:26

Note laka tua bang ahi kei hi. Note laka milian a suak nuamte in nomau’ na sem uh hen.

Mattiu 28:20

Keimah in note kong piak thukham khempeuh a tan’ dingun na hilh ta un. Keimah in leitung a bei dongin note tawh ka omkhawm tawntung ding hi,” ci-in a vaikhak hi.

Luka 1:15

Bang hang hiam na cih leh, tua tapa in Topa mai-ah milian ahi ding hi. Amah in leenggahtui leh zu neukha beek dawn loin, a nu gil sung pan akipan Kha Siangtho tawh a kidim ding hi.

Luka 11:42

“Farisaite aw, note in gimna na thuak ding uh hi. Bang hang hiam na cih uh leh, leengmasel leh anis leh meh namkim sehsawm suah sehkhat na piak uh hangin, aman thukhenna leh Pasian itna na nusia uh hi. Adangte tang lo tuan loin, hihte zong tan’ ding kilawm hi.

Luka 9:48

“Keima min tawh hih naupangno a ngai peuhmah in, kei zong hong ngai hi. Bang hang hiam na cih uh leh, note lakah a neu penpa in milian ahi ding hi,” a ci hi.

Sawltak 1:1

Theofilas aw, Zeisu in ama teelsa sawltakte Kha Siangtho tawh a vaikhak khit ciangin,

ROM (Romans) 3:8

Phatna a pian’ nadingin phat lohna gamta ni ci-in mi kimkhatte in hong kosia uh a, komau kam hong dawn’ kik uh mah bangin ka gen kik lai ding uh hiam? Tua bang a gente in thuman daan a thuak ding uh hi.

ROM (Romans) 6:1

Tua ahih ciangin bang i ci gen ding hiam? Hehpihna a khan’ theih nadingin mawhna hihin i om ding hiam? Tua bang hi zenzen lo ding hi!

ROM (Romans) 6:15

Tua bang ahih leh, bang i ci hih ding hiam? Thukham nuai-ah om loin, hehpihna nuai-ah i om ahih ciangin khialhna i hih ding hiam? Tua bang hi zenzen lo ding hi.

Thu-hilhkikna 12:32

“Note kong thupiak khempeuh na hih ding uh na lim ngaihsut ding uh hi; na behlap kei ding uh a, zong na khiam kei ding uh hi.

Thu-hilhkikna 27:26

“‘Hih thute zuihna tawh hih thu a kipsak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

1 TIMOTI MASA 6:11

Pasian’ mi aw, nang na hih leh, tua mawhnate pel in la, dikna, Pasian biakna lamah nopsakna, upna, itna, thuakzawhna, lungnemnate na phak matengin na delh in.

Titu 3:8

Hih thu in thuman thutak ahi hi. Hih thu ngaihsunin Pasian a um mite in gamtatna ahoihte ahih tawntung nading a kikep nadingun, hahkatin na hilh nading ka hong deih hi. Hih thute a pha uh tham loin mite’ phattuamna a piangsak thei uh hi.

1 PETER MASA 5:4

Tua bang ahih leh, Tuucing Ukpa hong kilat ciangin note in, a vul thei lo vangliatna lukhu na ngah ding uh hi.

1 JOHAN MASA 3:4

Mawhna ahih mi khempeuh in thukham a kan uh hi. Khialhna in thukham kanna ahi hi.

Mangmuhna 2:20

Ahih hangin nang tungah gen ding thu ka nei hi. ‘Kamsang numei ka hi’ a ci Jezebel nang in na nial kei a, numei leh pasal khialhna gamtat nading ahi zongin, milim mai-ah biakna sa nek nading ahi zongin tua numei in ka silate hilhin a zol hi.

1 SAMUEL MASA 2:30

Tua ahih ciangin Israelte’ Pasian, Topa in thu genin: ‘Nangma innkuan leh na behte in keima mai-ah sung tumin pusuak tawntung ding hi, ci-in thu ka ciam hi,’ a ci hi; ahih hangin tu-in Topa in thu genin: ‘Tua bang hi het lo ding hi: bang hang hiam cih leh kei hong pahtawite ka pahtawi ding a, kei hong simmawhte ka simmawhbawl ding hi.