Joshua 21:45 - Tedim Bible

⁴⁵ Topa in Israel mite tungah a ciamsa thuhoih khempeuh khat zong a mawkna om lo hi; a vekpi-in tung kim hi.

Tedim Bible Revision 2017

⁴⁵ Topa in Israel mite tungah a ciam sa thuhoih khempeuh khat zong a mawkna om lo a, a vekpi-in tangtung kim hi.

Joshua 21:45 Iomraidhean Croise

1 KUMPI MASATE 8:15

Tua ciangin amah in, “Izipt panin ka mi Israelte ka paikhiatpih huna kipanin keima Min a om theih nadingin inn khat lam nading Israel minam khempeuh sungah khuapi khat zong ka teel kei hi; ahih hangin ka mi Israelte tungah a uk dingin David ka teel hi,’ ci-in ka pa David tungah a kam tawh a ciamsa thu a tungsak Israel Pasian, Topa in thupha ngah ta hen.

1 KUMPI MASATE 8:20

Tu-in ama bawlsa thuciamna Topa in tungsak khin hi; bang hang hiam cih leh ka pa David’ munah keimah khangin, Topa’ ciamsa bangin Israel kumpi tokhom tungah ka tu a, Israel Pasian, Topa’ min dingin a inn ka lam khin hi.

1 KUMPI MASATE 8:24

na nasem ka pa David tungah na gensa thu na kipsak hi; hi hi, nangmah in na kam tawh na gen a, tu ni-in na tangtungsak hi.

1 KUMPI MASATE 8:56

“Ama hong ciamsa khempeuh tawh kizui-in ama mi Israelte tawlngakna a pia Topa in thupha ngah ta hen; a nasempa Moses tung tawnin a gensa ama thuciamna hoihte khempeuh kam khat zong maimawk lo hi.

Nehemiah 9:8

Nangma tungah amah a cihtakna na mu a, Kanaan mite gam, Hit mite gam Amor mite gam, Perez mite gam, Jebus mite gam, leh Girgash mite gam, amah leh a suan leh khakte tungah piak dingin ama tungah thuciamna khat na bawl hi. Nangmah thuman na hih manin na thuciamna na tungsak hi.

Isaiah 48:3

“A masa lam-a nate thu tanglai-in ka gen a, keima kam panin tuate gingkhia-in ka kithehthang sak hi; tua ciangin thakhat thu-in keimah in ka sem a, hong piang hi.

Gamlak-vakna 23:19

A zuau dingin Pasian in mihing hi lo hi, a kisik dingin mihing’ tapa hi lo hi. Amah in ci khin hi, amah in hih lo ding ahi hiam? Amah in gen khin hi, amah in tangtungsak lo ding ahi hiam?

1 KORIN MASA 1:9

I Topa ahi ama Tapa Zeisu Khazih tawh kipawlna sungah hong sam Pasian in ciam pelh mi ahi kei hi.

1 THESALONIKA MASA 5:24

Note a hong sampa in thuman tawh dim ahih ciangin, tua bangin a hong bawl ding hi.

Hebru 6:18

Bang hang hiam na cih uh leh, Pasian in zuauthu a zang zo lo thu nih hangin eite mai-ah hong kikoih lametna len a, a beel dinga tai eite in hansuahna khauh i ngah nading ahi hi.

1 SAMUEL MASA 3:19

Samuel khang a, amah tawh Topa omin, ama kammalte khat zong lei-ah kia sak lo hi.