Johan 7:28 - Tedim Bible

²⁸ Tua ahih ciangin Zeisu in, “Note in kei nong thei uh hi. Ka pian’na lah nong thei uh hi. Ahih hangin keima ut bangin hong pai ka hi kei hi. Kei hong sawlpa in thuman thutak tawh a dim hi. Tua pa na thei kei uh hi.

Tedim Bible Revision 2017

²⁸ Tua ahih manin biakinn sungah a gen mah bangin mi khempeuh zakin gen khia a, “Kei hong thei tel taktak a, ka hong pian khiatna mun a thei takpi mah na hi uh hiam? Keima thu tawh a hong pai tawm ka hi kei hi; kei a hong sawl a thuman pa a thei lo na hi uh hi.

Johan 7:28 Iomraidhean Croise

Late 9:10

Topa aw, nangmah hong zongte nusia lo na hih manin, na min a theite in nang hong muang hi.

Jeremiah 31:34

Kuamah in midangte leh a sanggamte uh’ kiangah, ‘Topa thei in,’ ci-in a kihilh nawn kei ding uh hi: bang hang hiam cih leh Topa in kong cih-inah, amaute a neupen panin a lianpen dongin, a vekpi-un kei a hong thei ding uh hi. Bang hang hiam cih leh amaute’ khialhnate ka maisak ding a, amaute’ mawhnate zong phawkin ka nei nawn kei ding hi,” a ci hi.

Jeremiah 9:6

Khat khit khat-in mite a bawl sia uh a, zuau zong a phuakphuak uh hi. Kei hong thei nuam lo uh hi, Topa in ci hi.

Hosea 4:1

Israel mite aw, Topa’ thugen ngai un. Hih gamsung a a teeng mite tungah Topa lungkim lo a, hih bangin mawhsak hi: Hih gam sungah cihtakna ahi a, itna ahi zongin om lo a, mite in kei pen Pasian-in hong ngaihsun lo uh hi.

Hosea 5:4

Amaute’ gamtatna in a Pasian kiang uh zuansak thei lo hi. Amaute in nakpi takin biak nopna lungsim nei uh ahih manin Topa phawk kha lo uh hi.

Mattiu 11:27

Ka Pa in na khempeuh kei hong pia zo hi. Pa longal kuamah in Tapa a thei kei hi. Tapa leh Tapa in a theihsak nopte longal kuamah in Pa a thei kei hi.

Mattiu 2:23

Galile gamah pai a, “Khazih in Nazereth mi kici ding hi,” ci-a Pasian’ kamsangte’ gen bangin a tun’ nadingin Nazareth kici khua khatah tungin a teeng hi.

Mattiu 26:55

Tua lai takin Zeisu in, “Note in galgu mat bangin kei man dingin namsau leh molhtum tawi-in hong pai na hi uh hiam? Keimah in nisimin biakna innpi sungah tu a, thu ka hilh lai takin na hong man kei uh hi.

Luka 10:22

Ka Pa in na khempeuh kei hong pia zo hi. Pa longal kuamah in Tapa a thei kei hi. Tapa mahmah leh Tapa in a theihsak nopte longal kuamah in Pa a thei kei hi.” a ci hi.

Luka 2:11

Tuni-in, David’ khua-ah Topa Khazih ahi hong Gumpa in note adingin a suak zo hi.

Luka 2:39

Amaute in Topa’ Thukhamna bangin na khempeuh a bawl khit uh ciangin, Galile gam amau khua Nazareth-ah a ciah uh hi.

Luka 2:4

Josef in zong David’ suan ahih ciangin, a kidongsa a lawmnu Mari tawh kisim dingin, Galile gam Nazareth khua panin Judah gam Bethlehem kici David’ khua-ah a pai uh hi.

Luka 2:51

Amah in amaute tawh ciahsuk khawm a, Nazareth khua-ah tungin amaute thu mangin a om hi. A nu in hih thu khempeuh a lungsim sungah a ciamteh hi.

Johan 1:46

Nathanael in, “Nazareth khua sung pan na hoih khat hong piang thei ding hiam?” ci-in a dot leh, Filip in, “Hong pai in la, hong en in,” a ci hi.

Johan 10:36

Pa in ama adingin a sian’thosak a, leitung ah a paisak keimah in, ‘Pasian’ Tapa ka hi,’ ka cih ciangin, ‘Pasian na gensia hi,’ hong ci na hi uh hiam?

Johan 12:49

Bang hang hiam na cih uh leh, ka ut bangin ka gen kei hi, kei hong sawl Pa kiang panin bangci gen ding, bangci hilh ding ci-in thupiakna ka ngah hi.

Johan 14:10

Pa sungah ka om a, kei sungah Pa a om cih um lo na hi hiam? Note kiangah kong gen thu in keima thu hong hilh ka hi kei hi. Kei sunga teeng ka Pa in na hong sem ahi hi.

Johan 14:31

Ahih hangin keimah in Pa’ hong thupiakna bangin ka hih a, Pa ka it cih leitung mite in a theihtheih nading ahi hi. Tho un, paikhia ni.”

Johan 16:3

Amaute in ka Pa thei loin kei zong hong thei lo uh ahih ciangin, tua thu a bawl ding uh hi.

Johan 17:25

A siangtho ka Pa aw, leitung mite in nang a hong theih loh uh hangin, kei in kong thei hi. Hih mite in kei nong sawlpa ka hihna a thei uh hi.

Johan 17:3

Amaute in nang Pasian taktak khat bek leh na sawlpa Zeisu Khazih a theihna un nuntak tawntungna ahi hi.

Johan 3:2

Tua pa zan lai takin Zeisu kiangah pai a, “Rabbi aw, nangmah in Pasian kiang pan hong pai thuhilhpa na hi cih kote in ka thei uh hi. Bang hang hiam na cih leh, na bawl nalamdangte Pasian in nangmah tawh a omkhawm kei leh, kuamah in a bawl thei kei ding hi,” a ci hi.

Johan 3:33

Ama teci pan’na thu a mangte in, Pasian in thuman thutak hi ci-in a ciamteh hi.

Johan 5:32

Kei ading teci pang ding mi khat a om hi. Kei adinga ama teci pan’na thu in aman hi ci-in ka thei hi.

Johan 5:43

Kei in ka Pa’ min tawh kong pai hangin nong sang kei uh hi. Midang khatpeuh amahmah min tawh hong pai leh, na sang ding uh hi.

Johan 6:42

Judah mite in, “Hih pa in Josef’ tapa Zeisu hilo ahi hiam? A nu leh pa thei hilo i hi hiam? Tua ahih leh, ‘Vantung pan kong paisuk zo hi,’ bang hangin ci thei hiam?” ci-in a gensia uh hi.

Johan 7:14

Pawikhamna a kimkhat a bawl lai takun, Zeisu biakna innpi-ah paito-a thu a hilh hi.

Johan 8:14

Zeisu in, “Keimah in kei ading teci ka pan’ hangin ka teci pan’na a man hi. Bang hang hiam na cih uh leh, keimah in koi lam pan hong pai a, koi lamah ka pai ding cih ka thei hi. Note in ahih leh, koi lam pan hong pai a, koi lamah ka pai ding cih na thei kei uh hi.

Johan 8:16

Ahi hi. Keimah in thu ka khen zongin ka thukhenna a man hi. Bang hang hiam na cih uh leh, keimah guak ka hi kei hi; kei hong sawl Pa in kei tawh a omkhawm hi.

Johan 8:19

Tua hi-a amaute in, “Na Pa koi lai-ah om hiam?” ci-a a dot uh ciangin Zeisu in, “Note in kei nong theih kei uh leh, ka Pa zong na thei kei ding uh hi. Kei nong theih uh leh, ka Pa zong na thei ding uh hi,” a ci kik hi.

Johan 8:26

Note tungah gen ding leh khen ding thu tampi ka nei hi; ahih hangin kei hong sawlpa in thumanpa ahi hi. Ama kiang pan ka zak bang bekin leitung mite kiangah ka hilh hi,” a ci hi.

Johan 8:42

Zeisu in, “Pasian in note’ Pa ahih takpi leh, note in kei nong it ding uh hi. Bang hang hiam na cih uh leh, keimah in Pasian kiang pan hong pusuakin kong pai hi. Keima ut bangin kong pai kei hi, Amah in kei hong sawl hi.

Johan 9:29

Pasian in Moses kiangah thu pia zo cih ka thei uh hi. Ahih hangin hih pa ahih leh, koi pan hong piang hiam ka thei kei uh hi,” ci-in a gensia uh hi.

Sawltak 17:23

Bang hang hiam na cih uh leh, lampi-ah ka pai lai takin, na biaknate uh ka et ciangin, ‘Kithei-lo Pasian Ading,’ ci-a kigelh biakna tau khat ka mu hi. Note in na theih lohpi uh a, na biak uh Pasian’ thu kong hilh ding hi.

ROM (Romans) 1:28

Amaute in Pasian thei nuam lo uh ahih ciangin a kituak lo nate ahih nading Pasian in amaute gitlohna lungsim sungah a piak mah bangin,

ROM (Romans) 3:4

Tua bang hi lo ding hi! “Na thupiakna in na thutan’na kilangsak hi, Thukhenna na thuak ciangin na gualzo ding hi,” ci-in Lai Siangtho sungah a kigelh mah bangin mi khempeuhte in thuciamna a pelh mi a kicih uh hangin, Pasian in thuman thutakpa hi ta hen.

2 KORIN NIHNA 1:18

Pasian in dikna tawh a dim bangin note kiangah ka kam in, “Ahi hi,” ci ding ahi zongin, “Ahi kei hi,” ci ding ahi zongin ahi kei hi.

2 KORIN NIHNA 4:6

“Khua mial sungah khuavak a hong taang ding hi” a ci Pasian in Zeisu Khazih’ maitangah Pasian’ minthan’na theihna a vang hong piak nadingin kote lungsim uhah khuavak a hong tangsak hi.

Hebru 6:18

Bang hang hiam na cih uh leh, Pasian in zuauthu a zang zo lo thu nih hangin eite mai-ah hong kikoih lametna len a, a beel dinga tai eite in hansuahna khauh i ngah nading ahi hi.

1 JOHAN MASA 5:10

Pasian’ Tapa a um mi in ama sungah teci pan’na a ngah hi. Pasian a um lo mi in Pasian pen zuau gen mi hi cih a suaksak hi. Bang hang hiam na cih uh leh, Pasian in ama Tapa ading a teci pan’na thu, tua mi in a um kei hi.

1 SAMUEL MASA 2:12

Tu-in Eli’ tapate in bangmah man lo mite ahi uh hi; amaute in Topa zahtakna nei lo uh hi.