Johan 15:11 - Tedim Bible

¹¹ Note sungah ka lungdamna om a, note lungdamna a kicin’ nadingin hih thute note kiangah kong gen zo hi.”

Tedim Bible Revision 2017

¹¹ Note hangin kei ka lungdam theih nading le noteʼ lungdamna a cingtaak a suah theih nadingin hih thute a hong gen ka hi hi.

Johan 15:11 Iomraidhean Croise

Isaiah 53:11

Amah in a thuak khit ciangin nuntakna khuavak mu-in, a lungkim ding hi; ama theihna tawh a dik ka nasempa in mi tampi diktangsak ding a,, amah in amaute’ mawhnate pua ding hi.

Isaiah 62:4

Nang pen a kinusia, hong kici nawn lo ding a, na leitang pen Gamkhing, kici nawn lo ding hi. Nang pen ama tungah ka lungkimna om, hong kici a, na leitang pen Kiten’pih, kici ding hi; bang hang hiam cih leh nangma tungah Topa lungkim a, na leitang pen a kiten’pih zi bang ding hi.

Jeremiah 32:41

Amaute’ tungah hoihna ka bawl manin ka lungdam ding a, ka lungsim khempeuh leh ka kha khempeuh tawh thuman takin hih gamah amaute ka phut ding hi.

Jeremiah 33:9

Jerusalem khuapi in kei adingin lungdamna, minphatna leh minthan’na ahi ding hi. A sunga om mite tungah hoihna leh hauhna ka tun’sakna thu a za minam dangte in lau-in a liing ding uh hi.

Zefaniah 3:17

Topa na Pasian un note hong ompih a, ama vangliatna in hong gualzo sak hi. Note tungah Topa lungkim ding a, ama itna tawh hong thak bawl ding hi. Note hangin Topa lungdamin la sa ding a,

Luka 15:23

Khedap zong bulhsak un. Bawngno a thau hong paipihin go un la, an ne-in nuamsa ni.

Luka 15:32

Ahih hangin, na nau ahih leh tuma-in a si hi, tu-in a nungta kik hi. Tuma-in a mang hi, tu-in a kimu kik ahih man-inah nopna leh lungdamna bawl tuak hi,’ ci-in a gen hi,” ci-in a hilh hi.

Luka 15:5

A muh kik ciangin lungdamin a liangko ah pua a, inn a tun’ ciangin,

Luka 15:9

A muhkik ciangin a lawmte leh a inn veengte sam a, ‘Hong lungdampih ta un. Bang hang hiam na cih uh leh, ka man’suahsa dangka ka mukik zo hi,’ a ci hi.

Johan 16:24

Tudongin ka min suangin bangmah na ngen kei uh hi. Na lungdamna uh a kicin’ nadingin ngen un, na ngah ding uh hi.”

Johan 16:33

Note in keima sungah nopna na neih nadingun hih thute kong genkhol hi. Note in leitungah gimna na thuak ding uh hi. Ahih hangin lunghimawh kei un, leitung ka zozo hi,” ci-in a gen hi.

Johan 17:13

Tu-in keimah in nangma kiangah kong pai ding hi. Keima lungdamna hih mite sungah a dim nadingin hih thute leitungah ka om lai-in ka gen hi.

Johan 3:29

Zipipa in zi neipa ahi hi. Ahih hangin zi neipa kiangah ding a, ama thu a za a lawmpa in zi pipa’ aw a zak manin a lungdam mahmah hi. Tua mah bangin keima lungdamna a kicing hi.

ROM (Romans) 15:13

Note in Kha Siangtho’ vangliatna hangah lametna pha tawh na dim nadingun, upna nei-in lungdamna, noptuamna a pawlpawlte tawh na dim nadingun, muan’na hong pia Pasian in hong pia ta hen.

2 KORIN NIHNA 1:24

Tua bang ka cih ciangin kote in note’ upna uk ka hi kei uh hi. Note lungdam nading huhin nasemte bek ka hi uh hi. Bang hang hiam na cih uh leh, upna hangah note kipin na om uh hi.

Efesa 5:18

Hong khamsak thei leenggahzu tangin, Kha Siangtho tawh kidimin om un.

Filippi 1:25

Tua bangin pumpi cidamin ka om ding um ka hih ciangin nomau omna-ah khatvei ka hong pai ding maninah, note in Khazih Zeisu sungah keimah hangin lungdam kisathei zaw-in na om nadingun, note in upna-ah khangin na lungdam nading uh, kei in pumpi sungah omin note khempeuh tawh omkhawm nading thu ka ngah ding hi ci-in ka thei hi.

1 THESALONIKA MASA 5:16

A tawntungin na lungdam ta un.

1 PETER MASA 1:8

Tua Topa note in na muh ngeiloh uh hangin na it uh hi. Tu-in zong na muh theih loh uh hangin umin, vangliatna tawh kipawl a kigen thei lo nopna lungsim tawh lungdamin, na kha uh gupkhiatna ahi note upna’ tupna mun na ngah uh hi.

1 JOHAN MASA 1:4

Note lungdamna a kicin’ nadingin hih thute ka hong gelh uh hi.

2 JOHAN NIHNA 1:12

No kiangah ka hong gelh nop thu tampi a om hangin lai tungah laitui tawh gelh ding ka deih kei hi. Note kiangah hong pai-in, khat leh khat lungdamna a kicin’ nadingin note tawh maitang kimu-a kihopih ding ka lamen hi.