Joel 2:32 - Tedim Bible

³² Tua ciangin Topa’ min tawh thu a ngen khempeuh in, gupkhiatna ngah ding uh hi. Topa’ gensa mah bangin, Zion Mual leh Jerusalem khua sungah a suakta mi om ding uh hi. Topa in a sap mite suakta ding uh hi.

Tedim Bible Revision 2017

³² Ahi zongin Topaʼ tungah huhna a ngen khempeuh in hotkhiatna a ngah ding uh hi. Topaʼ gen sa bangmahin Zion Mual le Jerusalem khua sungah a suakta mi om ding uh hi. Topa in a teel mite, suakta ding uh hi.

Joel 2:32 Iomraidhean Croise

Piancilna 4:26

Seth in zong tapa khat nei a, ama min Enosh ci hi. Tua hun-a kipanin mite in Topa bia-in a min lawh ding kipan uh hi.

Late 50:15

haksat hun ciangin kei tungah hong ko un; note kong honkhia ding a, note in kei nong thangsak ding uh hi.”

Isaiah 10:22

Na mi Israelte pen tuipi sehnel zah bang ahih hangin, amaute a om lai tawm khat bek hong ciahkik ding hi. Thuman mahmahna tawh siatna thu kikhen ahi hi.

Isaiah 11:11

Tua ni ciangin Topa in, Assiria gam, Izipt gam, Pathros gam, Ethiopia gam, Elam gam, Shinar gam, Hamath gam leh tuipi gei-a gamte panin ama mi a om laite a ngahkik nadingin a vangliatna zang kik ding hi.

Isaiah 11:16

Izipt gam panin Israel mite hong paitoh ciangin amau’ ading lam lianpi khat a om mah bangin, ama mi a om laite’ adingin zong Assiria gam panin lam lianpi khat om ding hi.

Isaiah 4:2

Tua ni ciangin Topa’ bulsel pen mel hoihin minthang ding a, leitung pan-a a piang gahte pen, a suakta Israel mite’ kiphatsakna leh minthan’na hi ding hi.

Isaiah 46:13

Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.”

Jeremiah 31:7

Bang hang hiam cih leh Topa in kong cih-inah, “Jakob adingin lungdamna tawh ngaih takin la sa un la, gam khempeuh lak a, gam lianpen adingin awng un. ‘Topa in Israel mi a om laite, ama’ mite hong honkhia khin zo hi,’ ci-in tangko un la, phat un.

Jeremiah 33:3

Kei nong sap leh kong dawngkik ding a, na theih ngei nai loh a ki-im cip thu lianpite kong gen ding hi.

Amos 9:8

Keimah in hih a khial Israel kumpigam ka encik a, hih leitung panin amaute ka susia ding hi. Ahi zongin a vekpi-un susia mang loin, pawlkhat ka siit lai ding hi.

Obadiah 1:17

Ahih hangin Zion mualah pawlkhat a suakta ding uh a, mun siangtho a suak ding hi. Jakob innkuante in amau gam mah a luah kik ding uh hi.

Obadiah 1:21

Esau mual-a thukhen ding, a honkhia ding mite Zion mualah hong paito ding uh a, tua gam in Topa’ gam ahi ding hi.

Micah 5:3

Tua ahih ciangin, numei naupai nu, a nau a suah khit mateng, amau’ galte khut sungah Topa in amaute pia phot hi. Ama hong khan’ ciangin, sal-a om a gam mite, a mipihte uh tawh hong kigawm kik ding hi.

Zekhariah 13:9

Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi.

Johan 10:16

Hih tuukhumna sunga om lo tuute zong ka nei lai hi. Tua tuute zong ka hong paipih lai ding hi. Amaute in ka aw a ngai ding uh a, amaute hon’ khat suakin tuucing khat a om ding hi.

Johan 4:22

Note in na theih lohpi uh na bia uh hi. Kote in ka theih uh ka bia uh hi. Bang hang hiam na cih leh, Judah mite sung pan gupna a piang hi.

Sawltak 15:17

A sia gawpsate zong, ka bawl kik khit ciangin Ka dingsak kik ding hi,

Sawltak 2:39

Bang hang hiam na cih leh, kiciamna in note leh na tate uh ahi zongin, gamla-ah a om Topa i Pasian in a sap ding mi khempeuh ading ahi hi,” ci-in a gen hi.

ROM (Romans) 11:26

Tua ahih ciangin Lai Siangtho sungah a kigelh mah bangin Israel mite khempeuh in gupna a ngah ding uh hi. Tua a kigelhna in: “Zion Mual tungah Gumpa hong pai ding a, Pasian zahtak lohna Jakob’ suante lak pan a lakhia ding hi.

ROM (Romans) 11:5

Tua mah bangin tu lai takin hehpihna hangah a kiteelsa kimkhat a om lai uh hi.

ROM (Romans) 11:7

Tua bang ahih leh, bang ci ahi hiam? Israel mite in a zon’ uh hangin a mu kei uh hi. A teelsate bek in a ngah uh hi. A om lai mite in a lung a khauhsak uh hi.

ROM (Romans) 9:24

Judah mipawl sung pan bek hi lo, Gentailte sung panin zong hong sap eite tungah a kicing vangliatna a kilat nadingin hong bawl leh, bang gen ding a om hiam?

ROM (Romans) 9:27

Isaiah in Israel thu panin, “Israel mipawlte in tuipi sehnel zahin a tam hangin a kimkhat bek in gupna a ngah ding uh hi.

1 KORIN MASA 1:2

Khazih Zeisu hangin mawhna tawh kipelh, misiangtho dinga hong koih ahi Korin khua ah a om Pasian’ pawlpite akipan, mun khempeuh ah eite Topa bek hi lo amau Topa zong ahi, Topa Zeisu Khazih kiangah thu a ngen mi khempeuhte kiangah thu kong zasak uh hi.

Hebru 12:22

Note in Zion Mual ah ahi zongin, a nungta Pasian’ khua ahi vantung Jerusalem khuapi-ah ahi zongin, a kisim zo lo vantungmi tampi kikhopna-ah ahi zongin, vantung lai sungah a kikhum ta-upa pawl a kikhoppina leh pawlpi-ah ahi zongin, mi khempeuh thu a khen ding Pasian kiangah ahi zongin, kicin’na ah a tung midik mite lungsim khate kiangah ahi zongin, thuciamna thak kikham ahi Zeisu kiangah ahi zongin, Abel’ sisan sangin a phazaw a kigen sisan kitheh kiangah ahi zongin, na tung uh hi.