Joel 2:27 - Tedim Bible

²⁷ Tua ciangin, no Israel mite lakah kei ka omna thu, leh keimah Topa in note’ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh kik ngei nawn lo ding hi.

Tedim Bible Revision 2017

²⁷ Tua ciangin no Israel mite lakah kei ka omna thu, keimah Topa pen noteʼ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh nawn lo ding hi.

Joel 2:27 Iomraidhean Croise

Late 46:5

Ama laizangah Pasian om a, amah a kiliing kei ding hi; Pasian in phalvak tungin amah huh ding hi.

Late 68:18

Topa nangmah Pasian tua munah na om theih nadingin a sangna-ah kahto-in salte na paipih a, mite leh mi lehdote’ tung nangawn panin piakkhong nate na ngah hi.

Paunak 1:23

Kong thuhilhna hong ngai un, ka ngaihsutna kong gen ding a, ka theihna kong zasak ding hi.

Isaiah 12:6

Zion-a teeng mite aw, nomau’ lakah Israelte’ Siangtho Pa lianin om ahih manin awng un la, lungdamin la sa un,” a cih hun uh hong tung ding hi.

Isaiah 44:3

Bang hang hiam cih leh a dangtak leitang tungah tui ka sung ding a, leikeu tungah lui tui ka luangsak ding hi; na suan leh khakte tungah ka Kha ka pia ding a, na tu na tate tungah ka thupha ka pia ding hi.

Isaiah 44:8

Lau kei un la, kihta kei un; tanglai pek panin note kiangah hong genin pulak khin hilo ka hi hiam? Note in keima tecite na hi uh hi! Kei sim loh Pasian dang om ahi hiam? Suangpi dang om lo hi; khat beek ka thei kei hi,” ci hi.

Isaiah 45:18

Vantungte a piangsakpa (amah Pasian!) leitung piangsakin a bawlpa (a kipsakpa; a awngthawl dingin bawl loin, teen’ nading a, leitung a piangsakpa!) Topa in hih bangin ci hi: “Keimah in Topa ka hi a, kuamah dang om lo hi.

Isaiah 45:5

Keimah in Topa ka hi hi, kuamah dang om lo a, kei sim loh Pasian om lo hi; nisuahna pan hita leh, nitumna pan hita leh, kei sim loh a dang a om lohna thu mite in a theih nadingin, nong theih loh hangin nangma tungah a kisam thahatna kong guan hi; keimah in Topa ka hi a, a dang om lo hi.

Isaiah 46:9

Hun lui nate phawk un; bang hang hiam cih leh keimah in Pasian ka hi a, a dang om lo hi; keimah in Pasian ka hi a, kei tawh a kibang a dang om lo hi.

Isaiah 49:23

Kumpite pen nang hong kem pate hi ding a, kumpinute pen nang hong khoi na nute hi ding hi. Amaute in a maitang uh lei lak ngatin nang kiangah hong kun ding uh a, na khe-a leivuite liak ding uh hi. Tua ciangin keimah in Topa ka hihna na thei ding hi; kei sungah a lamente maizum lo ding hi,” a ci hi.

Isaiah 53:6

Eite khempeuh in tuu bangin lam i khial khin a, eite khempeuh eimau san ciatah i pai khin hi; Topa in eite khempeuh’ mawhnate ama tungah suan hi.

Ezekiel 37:6

Thagui leh sazang kong guan ding a, vun tawh kong tuam ding hi. Tua ciangin na sung uhah hu hong guan’in, kong nungtasak kik ding hi. Tua ciangin Topa ka hihna nong thei ding uh hi, ci-in gen in,” hong ci hi.

Ezekiel 39:22

Tua khit-a kipanin amaute’ Topa Pasian ka hihna thu, Israel mite in hong thei ding uh hi.

Ezekiel 39:28

Tua ciangin, minam dangte khut sungah sal-in amaute puakin, tua khit ciangin amaute khat zong siit loin kaikhawm kikin a gam sung uh ka tun’pih kimna hangin amaute Topa Pasian ka hihna thu, keima mite in hong thei ding uh hi.

Ezekiel 39:29

Israel mite tungah ka kha ka pia ding a, amaute ka nungngat nawn kei ding hi. Topa Pasian in hih thu ka gen khin hi,” hong ci hi.

Joel 2:26

“Tu-in nek ding tampi nei-in na gil uh vah ding a, note’ adingin a lamdang nate a hong bawlsak, Topa na Pasian uh na phat ding uh hi. Tua ciangin ka mite hong kisimmawh nawn lo ding hi.

Joel 3:17

Tua ciangin Israelte aw, ka mual siangtho Zion tungah a teeng keimah in, Topa, note’ Pasian ka hihna na thei ding uh hi. Jerusalem in a siangtho biakna khuapi hi ding a, gamdang mite in zo kik ngei nawn lo ding uh hi.

Zefaniah 3:11

Tua hun ciangin, ka mite in kei nong lehdona hangun, maizumna ding bangmah om nawn lo ding hi. Note’ lak panin a kiphasak a kihisak mite ka hawlkhia ding a, Jerusalem khua a, ka mual siangtho tungah kei nong lehdo nawn kei ding uh hi.

Zefaniah 3:17

Topa na Pasian un note hong ompih a, ama vangliatna in hong gualzo sak hi. Note tungah Topa lungkim ding a, ama itna tawh hong thak bawl ding hi. Note hangin Topa lungdamin la sa ding a,

Zekhariah 2:9

Topa mahmah in note hong su ding a, ni danga note’ na hong sepsak mite in tu-in note’ nate hong lehsuh kik ding uh hi,” hong cisak hi. Hih bangin thu hong pian’ ciangin Vanglianpen Topa in kei hong sawl lam tak na thei ding uh hi.

Gamlak-vakna 11:29

Ahih hangin Moses in ama kiangah, “Keima tangin hong hazatsak na hi uh hiam? Topa’ mi khempeuh kamsang hi hen la, Topa in amau sungah ama lungsim guan leh ka cih lai tak hi!” a ci hi.

Gamlak-vakna 23:21

Amah in Jakob mite sungah mawhna mu lo hi; amah in Israel mite sungah zong gamtat siatna mu lo hi. Topa amau’ Pasian in amaute tawh om a, kumpipa phatna awging amaute’ lakah om hi.

2 KORIN NIHNA 6:16

Pasian’ biakinnpi in milimte tawh bangci kizom thei ding hiam? Bang hang hiam cih leh, eite in a nungta Pasian’ biakinnpi i hi hi. Pasian’ thupiakna in: “Amaute sungah ka teeng ding a, amau sungah ka vak kawikawi ding hi; Amau Pasian ka hi ding a, amaute in zong keima mi ahi ding uh hi,” a ci hi.

Thu-hilhkikna 23:14

Bang hang hiam cih leh note hong hon ding leh note mai-a na galte uh hong pia dingin Topa na Pasian uh na giahphual laizang uhah hong pai hi; tua ahih ciangin note lakah a kilawm lo nate a muh loh nading leh note kiang panin amah a paikhiat loh nadingin na giahphual uh siangtho ding hi.

1 PETER MASA 2:6

Bang hang hiam na cih uh leh: “A kiteel a manpha inn kiu khuam bul suangpi, Zion mual tungah ka koih hi. Tua suangpi a beel mi in, Zumna a thuak kei ding hi,” ci-in Lai Siangtho sungah a kigen hi.

Mangmuhna 21:3

Kumpi tokhom sung pan zong, “En in, Pasian buk mite lakah om a, amah in amaute tawh a omkhawm ding hi. Amaute in zong Topa’ mipawlte suakin, Pasian mahmah in amaute tawh omkhawmin amaute Pasian ahi ding hi.