Hosea 4:3 - Tedim Bible

³ Tua ahih ciangin leitang keugaw-in a tunga teeng khempeuh tawh si ding a, leitunga om gamsa khempeuh leh huih lak a, leeng vasa khempeuh tawh si mang ding uh a, tuipi sunga om ngasate nangawn si mang ding hi.

Tedim Bible Revision 2017

³ Tua ahih ciangin leitang keugaw-in a tunga teng khempeuh si dinga, leitung a om gamsa khempeuh le huihlak a leeng vasa khempeuh tawh si mang ding uh a, tuipi sunga om ngasate nangawn si mang ding hi.

Hosea 4:3 Iomraidhean Croise

Isaiah 33:9

Leitang kinusia cipin ommawk hi. Lebanon mual-a tulak singte vulgawp a, Sharon gam leihoih pen sehnel gam bang ta hi; Bashan mual leh Karmel mual-a singtehte pulh mang khin ta uh hi.

Jeremiah 12:4

Ka gam bang tanvei a thuum ding hiam? Mun khempeuhah lopate bang tan vei a keu ding hiam? A teeng mite’ gitlohna hangin, gamsate leh vasate a mangthang sak khin uh hi. Bang hang hiam cih leh amau in, “I gamtatnate Pasian in hong mu kei ngawn,” a ci uh hi.

Jeremiah 23:10

Bang hang hiam cih leh mun khempeuh ah angkawmte dim hi. Topa’ haamsiatna hangin gamsung tengah kahna dim a, gamlak lonona munte a keumang hi. Amaute gitlohna lamah pai uh a, a thuneih theihnate uh a man lopi-in a zang uh hi.

Jeremiah 4:25

Ka khuadak leh mi khat beek ka mu kei a, van-a vasate zong a leeng mang khin uh hi.

Jeremiah 9:10

“Mualte adingin kap-in tau un la, gamlak lo nona munte adingin thuum un. Bang hang hiam cih leh tuate keu gawp a, kuamah pai nawn lo hi, bawng ham zong kiza nawn lo hi; van-a leeng vasate leh gamsate a taimang ta uh hi.

Jeremiah 9:9

Hih thute hangin daantat lo ding ka hi hiam? Topa in kong ci hi. Hih bang minam khat tungah ka phu la lo ding ka hi hiam?

Ezekiel 38:20

Ngasate leh vasate, ganhing a neu a lian, leh leitunga om mi khempeuh, keimah kihtakna hangin lau-in liing ding uh hi. Mualte pukin, keente cimin, kulh leh phung khempeuh kicim mang ding hi.

Joel 1:18

A gilkial tuu leh bawngte cimawhin ham uh a, lonona mun om nawn lo ahih manin ganhing honte cimawh uh a, tuuhonte in zong haksatna thuak uh hi.

Amos 1:2

Amos in, “Zion Mual panin Topa hong hawksuk a, Jerusalem khua panin hong awngkek hi. Tua ahih manin, lonona gam teng keugawp a, Karmel mual dawn dum dide teng kausan ta hi,” a ci hi.

Amos 5:16

Tua ahih ciangin Topa, mihonpite’ Pasian in hih bangin ci hi: Mihon omna lamkabom khempeuh ah, mite in nasa-in thuumin tau ding uh a, kongzing khempeuh ah kap ding uh hi. Khua neu-a mite a thuum dingin kisam ding a, a kah siam mite a kap dingin kicial ding hi.

Amos 8:8

Tua ahih manin ziin hong liing ding a, leitunga om mi khempeuh kap ding uh hi. Nail Gunpi bangin leitung khempeuh khang toin kiamsuk ding hi.

Nahum 1:4

Amah in tuipi a taii ciangin tuipi kangcip pah a, gunpite zong kangcip sak hi. Bashan gam keu gawpin, Karmel Mual kausan a, Lebanon Mual-a pakpalhte vul hi.

Zefaniah 1:3

Mihing leh ganhing, van-a leeng vasa leh tui sunga ngasa, a vekpi-in ka susia ding hi. Mi gilote ka susia ding a, leitunga om mihing khempeuh ka susia ding hi. Topa ahi keimah in hih thu ka gen khin hi.

Zekhariah 5:4

Vanglianpen Topa in hih samsiatna a khahkhiatna ding thu gen a, guta mite khempeuh leh a man loin ka min tawh thuciam mite khempeuh’ inn sungah lut ding hi. Tua bang mite’ inn sungah a tawntungin hamsiatna omin, amaute-a kipan a sing a suang, a vekpi-in kisumai ding hi,” hong ci hi.