Paltiing 11:6 - Ti Biblia (1973)

⁶ Dagitoy adda pannacabalinda a mangrikep iti langit, tapno saan a tumudo iti bayat dagiti aldaw ti panagpadtoda; ket adda pannacabalinda cadagiti dandanum, tapno pagbalinenda ida a dara, ken tapno saplitenda toy daga iti isu-amin a kita ti rigat, uray mano a daras ti cayatda.

Ti Baro a Naimbag a Damag Biblia

⁶ Adda pannakabalinda a mangirikep iti langit tapno saan nga agtudo bayat ti panangipakaammoda iti mensahe ti Dios. Adda met pannakabalinda a mamagbalin a dara kadagiti ubbog. Adda pay pannakabalinda a mangyeg iti amin a kita ti didigra iti daga tunggal kayatda nga aramiden ti kasta.

Paltiing 11:6 Iomraidhean Croise

1 Ar-ari 17:1

Ket ni Elias a Tisbita, isu a maysa cadagiti agyan sadi Galaad, kinunana ken Acab, Cas ni Jehova, a Dios ti Israel sibibiag, nga ti sangona agtatacderac, awanto ti linnaaw uray tudo cadagitoy a tawtawen, no saan laeng a mayannurot iti saoc.

San Lucas 4:25

Ngem pudno a cunac cadacayo, nga adu idi ti balo a babbai idiay Israel cadagiti aldaw ni Elias idi napunitan ti langit iti bayat ti tal-lo a tawen ken innem a bulan idi adda dackel a bisin iti amin a daga;

Paltiing 11:3

Ket itdecto ti palubos cadagiti dua a sacsic, ket agipadtodanto cadagiti sangaribo dua gasut ket innem a pulo nga aldaw, a sipapanesda cadagiti lupot a nakersang.

Paltiing 16:3

Ket daydi maicadua imbuyatna daydi malocongna iti baybay, isu a nagbalin a dara a cas la dara ti maysa a natay; ket isu-amin a cararua a sibibiag natay uray pay dagiti adda iti baybay.

Paltiing 16:4

Ket daydi maicatlo imbuyatna daydi malocongna cadagiti carcarayan ken ub-ubbog ti danum, ket nagbalinda a dara.

Paltiing 8:8

Ket daydi maicadua nga angel nagtangguyob: ket maysa a cas la dackel a bantay, a sumsumged iti apuy, naitappuac iti baybay; ket ti apagcatlo ti baybay nagbalin a dara;

1 Samuel 4:8

Asitayopay! asino ti mangisalacanto cadatayo iti ima dagitoy mannacabalin a didios! Dagitoy isuda dagiti didios a nangcabil idi cadagiti Egipcios iti amin a kita dagiti didigra idiay let-ang.