Levitico 4:3 - Ti Biblia (1973)

³ No ti napulotan a padi macabasolto isu a pacairamananto ti ili, mangidaton ngarud gapu iti basolna nga inaramidna, iti maysa a bumaro a vaca nga awan pacapilawanna ken Jehova, a maipaay a daton gapu iti basol.

Ti Baro a Naimbag a Damag Biblia

³ No ti Kangatoan a Padi ti agbasol a pakairamanan met dagiti tattao, masapul a mangidatag iti bumaro a baka nga awan depektona ket idatonna iti Apo gapu iti basolna.

Levitico 4:3 Iomraidhean Croise

2 Cronicas 29:21

Ket inyegda ti pito a vaca a lallaki, ken pito a carnero a lallaki, ken pito a cordero, ken pito a calding a lallaki a maipaay a daton gapu iti basol gapu iti pagarian ken gapu iti santuario ken gapu iti Juda. Ket binilinna dagiti papadi nga annac a lallaki ni Aaron a mangidatag cadacuada iti rabaw ti altar ni Jehova.

ESDRAS 8:35

Ket dagiti annac ti pannacacayaw, a rimmuar a naggapu ti pannacaibelleng, indatagda dagiti datdaton a mapuuran iti Dios ti Israel, sangapulo ket dua a vaca a lallaki gapu iti amin nga Israel, siam a pulo ket innem a carnero, pitopulo ket pito a cordero, sangapulo ket dua a calding a lallaki a maipaay iti daton ti basol: amin daytoy daton a mapuuran ken Jehova.

Exodo 29:14

Ngem ti lasag ti vaca ken ti lalatna, ken ti tackina puuramto iti apuy iti ruar ti pacarso: isu ti maysa a daton iti basol.

Exodo 29:21

Ket mangalacanto iti dara nga adda iti rabaw ti altar, ken iti lana a pagsapsapo ket iwarsim ken Aaron, ken cadagiti cawesna, ken cadagiti annacna, ken cadagiti cawcawes dagiti annacna agraman kencuana: ket mapasantonto, ken dagiti cawesna, ken dagiti annacna, ken dagiti cawcawes dagiti annacna agraman kencuana.

Exodo 29:7

Iti casta alaemto ti lana a pangpulot, ket ibuyatmo iti olona, ket pulotam.

Exodo 30:10

Ket ni Aaron aramidennanto ti pannacaabbong a maipanggep cadagiti sarana maminsan iti macatawen; aramatennanto ti dara ti daton gapu iti basol ti pannacaabbong maminsan iti macatawen iti panangaramidna iti pacaabbongan iti dayta cadagiti caputotanyo: casantoan unay ken Jehova daytoy.

Ezekiel 40:39

Ket iti balcon ti ruangan adda idi dua a lamesaan iti daytoy a sikigan, ken dua a lamesaan iti dayta a sikigan tapno patayen idiay ti daton a mapuuran ken ti daton gapu iti basol ken ti daton gapu iti salungasing.

Ezekiel 43:19

Itedmonto cadagiti papadi a Levitas nga adda iti capuonan ni Sadoc, isuda nga asideg caniac, nga agannong caniac, cuna ni Apo Jehova, maysa nga urbon a vaca a maipaay a daton gapu iti basol.

Ezekiel 44:27

Ket inton aldaw nga iseserrecna iti santuario, iti makinuneg a paraangan tapno agannong iti santuario, ipaaynanto ti datonna a maipaay iti basol, cuna ni Apo Jehova.

Levitico 1:10

Ket no ti idatonna aggapu iti pangen, cadagiti carcarnero, wenno cadagiti calcalding, a daton a mapuuran; iti lalaki nga awan pilawna ti idatonnanto.

Levitico 1:3

No vaca ti mapuuran a pagdatonna, idatonnanto ti lalaki nga awan pacapilawanna: ti pangidatonannanto iti ruangan ti tolda ti gimong, tapno maawat iti saclang ni Jehova.

Levitico 16:11

Ket ni Aaron idatagnanto ti lalaki a vaca a daton gapu iti basol, isu a maipaay kencuana, ket aramidenna ti pannacaabbongna agraman balayna, ket patayennanto ti lalaki a vaca a daton gapu iti basol a maipaay kencuana:

Levitico 16:3

Cadagitoy sumrecto ni Aaron iti tugaw a nasantoan: agraman maysa a lalaki a vaca, nga idaton gapu iti basol, ken maysa a carnero a lalaki a daton a mapuuran.

Levitico 16:5

Ket mangalanto iti gimong dagiti annac ti Israel dagiti dua a calding a lallaki nga idaton gapu iti basol, ken maysa a carnero a lalaki a daton a mapuuran.

Levitico 16:6

Ket ni Aaron idatagnanto ti lalaki a vaca a daton gapu iti basol isu a maipaay kencuana, ket aramidennanto ti pannacaabbongna agraman balayna.

Levitico 4:14

No ti basol a nacabiddutanda maammoan, ti gimong ngarud idatonnanto ti maysa a vaca a bumaro nga agservi a daton gapu iti basol, ket yegna iti sango ti tolda ti gimong.

Levitico 4:23

No ti babacna a nacabasolanna maipacaammo kencuana, yegnanto a datonna ti maysa a calding, a lalaki nga awan pilawna;

Levitico 4:28

No ti basolna a nacabiddutanna maipacaammo kencuana, yegnanto ngarud a datonna ti maysa a calding, cabayan nga awan pacapilawanna, gapu iti basol a nacabiddutanna.

Levitico 4:5

Ket ti napulotan a padi alaennanto ti dara ti vaca, ket yegnanto iti tolda ti gimong:

Levitico 5:6

Ket yegnanto a datonna gapu iti salungasing ken Jehova nga agservi iti basol a nacabasolanna, ti maysa a cabayan iti pangen, maysa a cordero wenno maysa a calding, a daton gapu iti basol; ket ti padi aramidennanto a paccaabbonganna a maipanggep iti basolna.

Levitico 6:18

Tumunggal maysa a lalaki cadagiti annac ni Aaron canennanto cas bagina nga agnanayon cadagiti putputotyo, cadagiti datdaton ken Jehova iti maramid iti apuy: ti mangsagid cadagidiay nasantoanto.

Levitico 8:12

Ket binuyatanna ti olo ni Aaron iti lana a pagsapsapo, ket pinulotanna tapno pasantoenna.

Levitico 9:2

Ket kinunana ken Aaron, Alaem ti maysa nga urbon cadagiti vacvaca a maipaay a daton gapu iti basol, ken ti maysa a carnero a lalaki a maipaay a daton a mapuuran, nga awan pacapilawanda, ket idatonmo ida iti saclang ni Jehova.

Levitico 9:3

Ket ibagamto cadagiti annac ti Israel ket cunam, Mangalacayo iti maysa a calding a lalaki a daton gapu iti basol; ken maysa nga urbon a vaca ken maysa a cordero nga awan pacapilawanda, a saggaysa ti tawenda nga agservi a daton a mapuuran;

Numero 16:22

Ket nagpaclebda ket kinunada, O Dios, a Dios dagiti espiritu ti isu-amin a lasag, macabasolto ti maysa a tao, ket sica pagungtamto iti dagup ti gimong?

Numero 8:8

Sada alaen ti maysa a bumaro a vaca ken ti datonda a macan, a namayecmec a bellaay a nagamayan iti lana; ken sabali a bumaro a vaca ti alaemto a daton gapu iti basol.

Taga-Roma 8:3

Ta ti saan a mabalinan ti linteg, idinto a napacapuy gapu iti lasag, inaramid ti Dios, nga imbaonna ti Anacna a caasping ti lasag a managbasol ket gapu iti basol, impatayna ti dusa ti basol iti lasag:

2 Taga-Corinto 5:21

Daydi saan a nacaammo ti basol, inaramidna a basol gapu cadatayo, tapno macapagbalintayo a kinalinteg ti Dios gapu kencuana.

Hebreo 5:3

Ket gapu itoy, rebbengna ti mangidaton gapu cadagiti basbasol maipoon iti ili ken castamet maipoon iti bagina met laeng.

Hebreo 9:12

Ket saan met a gapu iti dara dagiti toro a calding ken dagiti toro, a vaca no di ket gapu iti darana met laeng, simrec iti naminpinsan a maipaay iti agnanayonen idiay santo a disso a nagun-odanna ti agnanayon a pannacasubbot.