Jeremias 2:7 - Ti Biblia (1973)

⁷ Ket inserreccayo iti daga a nabacnang, tapno canenyo ti bungana ken imbagna; ngem idi simreccayo, tinulawanyo ti dagac, ket inaramidyo ti tawidco a kinarimon.

Ti Baro a Naimbag a Damag Biblia

⁷ Impanko ida iti nadam-eg a daga, tapno lak-amenda dagiti bungana ken amin a naimbag a masarakan kenkuana. Ngem idi dimtengda sadiay, tinulawanda dayta a daga. Pinagbalinda a makarimon ti daga nga intedko kadakuada.

Jeremias 2:7 Iomraidhean Croise

Nehemias 9:25

Ket innalada dagiti nasarikedkedan nga il-ili, ken ti nadam-eg a daga, ken tinagicuada dagiti balbalay a napno cadagiti nasayaat a banbanag, bitbito nga inaramid, inuv-uvasan, ken inol-olivaan, ken caycayo nga agbunga a nawadwad: iti casta nanganda, ken napnecda, ket napalucmegda, ken nagrag-oda iti dackel a kinaimbagmo.

Nehemias 9:26

Nupay casta nasungitda, ken simmukirda a maicaniwas kenca, ket impalladawda iti licudanda ti lintegmo, ket pinatayda dagiti mammadtom a nangsacsi iti maibusor cadacuada tapno isublida coma ida manen kenca, ket inaramidda dagiti dadackel a pananggargari.

Isaias 19:25

Agsipud ta ni Jehova dagiti buybuyot binendicionanna ida, a kinunana, Bendito coma ti ilic nga Egipto, ken ti Asiria nga aramid dagiti im-imac, ken ti Israel a cucuac.

Jeremias 16:18

Ket umuna supapacacto ti kinadakesda ken ti basolda iti mamindua, agsipud ta tinulawanda ti dagac cadagiti bangcay dagiti nacarurrurud a banbanagda, ken pinunnoda ti tawidco cadagiti kinarimonda.

Jeremias 3:1

Cuncunada, No ti maysa a lalaki pagtalawenna ni asawana, ket isu sumina kencuana, ket agbalin nga asawa ti sabali a lalaki, isu pasubliennanto aya manen kencuana? saan aya a dayta a daga matulawanto ti dackel? Ngem sica nagbalangcantisca iti adu a caayanayat; nupay casta agsublica manen caniac, cuna ni Jehova.

Jeremias 3:2

Itangadmo dagita matam cadagiti nalucasan a panpantoc, ket kitaem; sadino ti saanmo a nakicaiddaan? Iti arpad dagiti daldalan nagururayca cadacuada, cas maysa a taga Arabia iti let-ang, ket tinulawam ti daga iti pannakicamalalam ken iti kinadangkesmo.

Jeremias 3:9

Ket naaramid gapu iti nalaca a pannakicamalalana, ti daga natulawan, ket isu nakicamalala cadagiti batbato ken cadagiti puon ti cayo.

Jeremias 32:23

Ket simrecda, ket tinagicuada, ngem saanda a nagtulnog iti timecmo, ken dida met nagna iti lintegmo; awan ti inaramidda cadagiti amin nga imbilinmo cadacuada nga aramidenda: gapuna nga inaramidmo a mapasamac cadacuada amin daytoy a dakes.

Jeremias 32:30

Ta dagiti annac ti Israel ken dagiti annac ti Juda nagaramidda laeng cadagiti dakes iti imatangco nanipud iti kinaubingda, ta dagiti annac ti Israel ginargaridac laeng nga agpungtot iti aramid dagiti im-imada, cuna ni Jehova.

Ezekiel 20:24

Agsipud ta dida tinungpal dagiti bilbilinco, no di ket naglictadanda dagiti linlintegco, ket tinabbaawanda dagiti al-aldawco a panaginana, ket dagiti matada sinurotda dagiti didiosen dagiti ammada.

Ezekiel 20:28

Ta idi naipancon ida iti daga nga insapatac nga ited cadacuada, idi nakitadan ti amin a turturod a nangato, ken amin a caycayo a narucbus, ket idiay impaayda dagiti datdatonda, ken idiay indayada ti pananggargari a datonda, idiay met inaramidda ti nabanglo a sayamusomda, ket idiay imbuyatda dagiti datdatonda a mainum.

Ezekiel 20:6

Iti daydi nga aldaw insapatac cadacuada, nga aonec ida idiay daga nga Egipto nga ipan idiay daga a nabirucac a maipaay cadacuada, isu a pagayusan ti gatas ken diro, a pacaidayawan ti isu-amin a daga.

Ezekiel 23:35

Gapuna, castoy ti cuna ni Apo Jehova: Agsipud ta sica linipatannac, ket naglictadannac, awitem met ngarud ti derrep ken kinabalangcantismo.

Ezekiel 36:17

Anac ti tao, idi a ti balay ti Israel nagnaed iti bucodda a daga, isu tulawanda gapu iti dalanda ken babaen cadagiti gapuananda: ti dalanda iti sangoanac cas ti kinarugit ti maysa a babai iti panagcadawyanna.

Oseas 9:3

Saandanto nga agnaed iti daga ni Jehova; no di ket ti Efraim agsublinto idiay Egipto, ket mangandanto iti narugit a taraon idiay Asiria.

Mikias 2:10

Tumacdercayo, ket pumanawcayo; ta daytoy saan nga isu ti paginanaanyo; agsipud iti kinarugit a mangdadael, agraman maysa met laeng a nasaem a pannacarba.

Numero 13:27

Ket sinaritada kencuana, ket kinunada, Napancami iti daga a nangibaonam cadacami, ket pudno nga agayus ti gatas ken diro; ket daytoy ti bungana.

Deuteronomio 21:23

Ti bagina dinto mabati, nga agpatpatnag iti cayo, ngem itabonmonto a di-agcurang iti daydiay met laeng nga aldaw; ta daydiay a nabitay isu ti inlunod ti Dios; tapno dica mulitan ti dagam a ni Jehova a Diosmo intedna kenca a tawiden.

Deuteronomio 32:9

Ta ti bagi ni Jehova isu ti ilina; ni Jacob isu ti bagina a tawid.

Deuteronomio 6:18

Ket sica aramidemto ti nalinteg ken nasayaat iti imatang ni Jehova; tapno naimbagto laeng kenca, ken tapno macastrecca, ken macapagtagicuaca iti naimbag a daga nga ni Jehova insapatana cadagiti ammam,