2 ತಿಮೋಥಿ 2:25 - ಪೊಸ ಒಡಂಬಡಿಕೆ

²⁵ ಎದುರುಂತುನಾಕುಲೆನ್ ನಿಧಾನೊಡು ತಿದ್ದುನಾಯೆ ಆದುಪ್ಪೊಡು. ಒಂಜಿ ವೇಳೆ ದೇವೆರ್ ಎದುರುಂತುನಾಕುಲೆನ ಮನಸ್‌ನ್ ತನ ಕಡೆಕ್ಕ್ ತಿರ್ಗಾದ್ ಅಕ್ಲೆಗ್ ಸತ್ಯದ ಗೇನೊನು ಕೊರಿಯೆರೆ ಯಾವು.

2 ತಿಮೋಥಿ 2:25 Iomraidhean Croise

ಮತ್ತಾಯೆ 11:29

ಯಾನ್ ಸಜ್ಜನೆಲಾ, ತಗ್ಗ್‌ದಿ ಮನಸ್‌ದಾಯೆಲಾ ಆದುಪ್ಪುನೆಡ್ದ್ ಎನ ನುಗೊನು ನಿಕ್ಲೆ ಮಿತ್ತ್ ದೆತ್ತೊಂದು ಎನಡ್ದ್ ಕಲ್ತೊನ್ಲೆ, ಅಪಗ ನಿಕ್ಲೆ ಆತ್ಮೊಗು ಸುಖ ತಿಕ್ಕು.

ಮತ್ತಾಯೆ 21:32

ಯೋಹಾನೆ ನಿಕ್ಲೆಗ್ ನೀತಿದ ಮಾರ್ಗ ತೋಜಪಾಯೆರೆ ನಿಕ್ಲೆ ಕೈತಲ್‌ ಬತ್ತೆ. ನಿಕುಲು ಆಯನ್ ನಂಬಿಜರ್. ಆಂಡ ಸುಂಕದಾಕುಲುಲಾ, ಸೂಳೆಲುಲಾ ಆಯನ್ ನಂಬಿಯೆರ್. ನಿಕುಲು ಉಂದೆನ್ ತೂಯರ್ಡಲಾ ಪಶ್ಚಾತಾಪ ಪಡೆಯಿಜರ್, ಆಯನ್ ನಂಬಿಜರ್.”

ಯೋಹಾನೆ 5:34

ಯಾನ್ ಎನ ಸಂಗತಿಡ್ ಜನೊಕುಲು ಸಾಕ್ಷಿ ಕೊರೊಡು ಅಂದ್‌ದ್ ಬಯಕುಜಿ. ಆಂಡಲಾ ನಿಕ್ಲೆಗ್ ರಕ್ಷಣೆ ಆವೊಡು ಅಂದ್‌ದ್ ಉಂದೆನ್ ಪನ್ತೆ.

ಅಪೊ.ಕ್ರಿ 11:18

ಇಂಚ ಪಂಡಿನ ಪಾತೆರೊಲೆನ್ ಆ ಯೆಹೂದ್ಯೆರ್ ಕೇಂಡ್ದ್ ತರ್ಕ ಮಲ್ಪುನೆನ್ ಉಂತಾಯೆರ್. ಅಂಚಾಂಡ, “ದೇವೆರ್ ಪಿದಯಿದ ಜನೊಕುಲೆಗ್ಲಾ ಜೀವ ಕೊರೊಡು ಅಂದ್‌ದ್ ಅಕ್ಲೆ ಉಡಲ್‌ಡ್ಲಾ ಪಶ್ಚಾತಾಪ ಕೊರಿಯೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್.

ಅಪೊ.ಕ್ರಿ 2:38

ಪೇತ್ರೆ ಅಕ್ಲೆಗ್, “ನಿಕ್ಲೆನ ಪಾಪೊಲು ಪರಿಹಾರ ಆವರೆಗಾದ್ರ ನಿಕುಲು ಮಾತೆರ್ಲಾ ಪಶ್ಚಾತಾಪ ಪಡೆದ್ ಯೇಸು ಕ್ರಿಸ್ತನ ಪುದರ್‌ಡೇ ದೀಕ್ಷಾಸ್ನಾನ ಮಲ್ತೊನ್ಲೆ, ಅಪಗ ನಿಕುಲು ಪರಿಶುದ್ಧಾತ್ಮನ ವರೊನು ಹೊಂದುವರ್, ಅಂದ್‌ದ್ ಪಂಡೆ.

ಅಪೊ.ಕ್ರಿ 20:21

ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ಪಶ್ಚಾತಾಪ ಪಡೆದ್ ದೇವೆರೆನ ಕೈತಲ್‌ ತಿರ್ಗೊಡು, ನಮ ಕರ್ತವೆ ಆದುಪ್ಪು ಯೇಸುನ ಮಿತ್ತ್ ನಂಬಿಕೆ ದೀವೊಡು ಅಂದ್‌ದ್ ಸಾಕ್ಷಿ ಕೊರಿಯೆ; ಉಂದು ಮಾತ ನಿಕ್ಲೆಗೇ ತೆರಿದ್‌ಂಡ್.

ಅಪೊ.ಕ್ರಿ 5:21

ಅಕುಲು ಈ ಅಪ್ಪಣೆನ್ ಕೇಂಡ್ದ್ ಬೊಲ್ಪು ಆವೊಡ್ಡನೇ ದೇವಾಲಯೊಗು ಪೋದು ಬೋಧನೆ ಕೊರಿಯೆರ್. ಇಂಚಿಡ್ದ್ ಪ್ರಧಾನಯಾಜಕೆಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಬತ್ತ್‌ದ್ ಹಿರಿಸಭೆಟುಪ್ಪುನ ಮಾತ ಇಸ್ರಾಯೇಲ್ಯೆರೆ ಮಖ್ಯಸ್ಥೆರೆನ್‌ ಕೂಡಾದ್ ಅಪೊಸ್ತಲೆರೆನ್ ಲೆತ್ತೊಂದು ಬರಿಯೆರೆ ಸೆರೆಮನೆಗ್ ಕಡಪುಡಿಯೆರ್.

ಅಪೊ.ಕ್ರಿ 5:31

ಇಸ್ರಾಯೇಲ್ಯೆರೆಗ್ ಪಶ್ಚಾತಾಪೊನ್ಲಾ ಪಾಪ ಪರಿಹಾರೊನ್ಲಾ ಕೊರಿಯೆರೆ ಬೋಡಾದ್ ದೇವೆರೆ ತನ್ನ ಬಲತ್ತ ಕೈಡ್ದ್ ಮಿತ್ತ್‌ದ ಸ್ಥಾನೊಗು ಏರಾದ್ ಆಯನ್ ನಾಯಕೆಲಾ, ರಕ್ಷಕೆಲಾ ಮಲ್ತೆ.

ಅಪೊ.ಕ್ರಿ 8:22

ಅಂಚಾಯಿನೆಡ್ದ್ ಈ ನಿನ ದುಷ್ಟತನೊಡ್ದು ಪಶ್ಚಾತಾಪ ಪಡೆಲ. ಕರ್ತವೆ ನಿನ ಉಡಲ್‌ದ ದುಷ್ಟ ಆಲೋಚನೆನ್ ಮಾಪು ಮಲ್ಪೆರೆ ಆಯಡ ಪ್ರಾರ್ಥನೆ ಮಲ್ಪುಲ.

ಗಲಾತ್ಯೆರೆಗ್ 6:1

ಸಹೋದ್ರೆರೇ, ಒರಿ ಏರಾಂಡಲಾ ಪಾಪೊಡು ತಿಕ್ಕೊಂಡೆಡ, ಆತ್ಮಭಾವದಾಕುಲಾಯಿ ನಿಕುಲು ಅಂಚಿತ್ತಿನಾಯನ್ ಸಜ್ಜನಿಗೆದ ಆತ್ಮೊಡು ಶಾಂತ ರೀತಿಡ್ ಪಾಪೊಡ್ದು ಪಿದಾಯಿ ಕನವೊಡು. ನಿಕುಲುಲಾ ಅವ್ವೇ ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದುಪ್ಪುಲೆ.

1 ತಿಮೋಥಿ 2:4

ಮಾತ ನರಮಾನಿಲು ರಕ್ಷಣೆ ಹೊಂದುದು ಅಕುಲು ಸತ್ಯದ ಗೇನೊಡು ಸೇರೊಡು ಪನ್ಪಿನ ದೇವೆರೆನ ಚಿತ್ತ.

1 ತಿಮೋಥಿ 6:11

ಆಂಡ ತಿಮೋಥಿ, ಈ ಒರಿ ದೇವೆರೆ ನರಮಾನಿ. ಈ ಮಾತ ಪಡಿಕೆಂತಿನೆಡ್ದ್ ದೂರ ಪಾರ್ದ್ ನೀತಿಗ್, ಭಕ್ತಿಗ್, ನಂಬಿಕೆಗ್, ಪ್ರೀತಿಗ್, ತಾಳ್ಮೆಗ್, ಸಜ್ಜನಿಗೆಗ್ ಪ್ರಯತ್ನ ಮಲ್ಪುಲ.

2 ತಿಮೋಥಿ 3:7

ಇಂಚಿತ್ತಿ ಪೊಂಜೊವುಲು ಏಪಲಾ ಪೊಸ ಬೋಧನೆಲೆ ಪಿರವು ಪೋಪೆರ್. ಆಂಡ ಸತ್ಯೊನು ಏಪೊಗ್ಲಾ ಅರ್ಥ ಮಲ್ತೊನ್ಜೆರ್.

ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 1:1

ದೇವೆರೆ ದಾಸೆಲಾ ಯೇಸು ಕ್ರಿಸ್ತನ ಅಪೊಸ್ತಲೆಲಾ ಆಯಿ ಪೌಲು ನಂಕ್ ಒಟ್ಟುಗುಪ್ಪು ನಂಬಿಕೆದ ಬಗೆಟ್ ತನ ನಿಜ ಮಗೆ ಆದುಪ್ಪು ತೀತಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಕ್ ದಯಲಾ, ಸಮಾಧಾನಲಾ ಆವಡ್.

ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 3:2

ಏರೆನ್ಲಾ ದೂಷಣೆ ಮಲ್ಪಂದೆ, ಲಡಯಿ ಮಲ್ಪಂದೆ, ತಗ್ಗ್‌ತನೊಟು ಮಾತೆರೊಟ್ಟುಗು ಸಮಾಧಾನಿಲಾದ್ ನಡಪಡ್.

ಯಾಕೋಬು 1:17

ಮಾತ ಎಡ್ಡೆಂತಿನವುಲಾ ಕುಂದೆಲ್‌ದಾಂತಿ ಉಡಿಗೆರೆಲಾ ಬೊಲ್ಪುಲೆನ್ ಉಂಡು ಮಲ್ತಿ ಪರಲೋಕದ ಅಮ್ಮೆ ಆದುಪ್ಪು ದೇವೆರೆಡ್ದ್ ಜತ್ತ್‌ದ್ ಬರ್ಪುಂಡು. ಆಯೆ ಏಪೊಗ್ಲಾ ಎಡ್ಡೆಂತಿನೆನೇ ಕೊರ್ಪಿನಾಯೆ, ಅತ್ತ್‌ಡ ಆಯೆ ನಿರೆಲ್‌ದ ಲೆಕ್ಕ ದುಂಬು ಪಿರ ಪೋಪಿನಾಯೆ ಅತ್ತ್.

1 ಪೇತ್ರೆ 3:15

ಗಡಿಬಿಡಿ ಆವಡೆ; ಆಂಡ ಕ್ರಿಸ್ತನ್ ನಿಕ್ಲೆ ಉಡಲ್‌ಲೆಡ್ ಪರಿಶುದ್ಧ ಕರ್ತವೆ ಅಂದ್‌ದ್ ದೀವೊನ್ಲೆ. ನಿಕ್ಲೆಡುಪ್ಪುನ ಕ್ರಿಸ್ತನ ನಿರೀಕ್ಷೆಗ್ ಎಂಚಿನ ಆಧಾರ ಅಂದ್‌ದ್ ಕೇನುನಾಕುಲೆಗ್ ಉತ್ತರ ಕೊರಿಯೆರೆ ಏಪಲಾ ತಯಾರಾದುಪ್ಪುಲೆ. ಆಂಡ ಅವೆನ್ ತಾಳ್ಮೆಡ್ಲಾ ಮರ್ಯಾದಿಡ್ಲಾ ಪನ್ಲೆ.

1 ಯೋಹಾನೆ 5:16

ಏರಾಂಡಲಾ ಒರಿ ಸಹೋದರೆ ಮರಣೊಗು ಕಾರಣ ಅತ್ತಂದಿನ ಪಾಪ ಮಲ್ಪುನೆನ್ ತೂಂಡ, ಆಯೆ ಅಂಚಿತ್ತಿನಾಯಗ್ ಪ್ರಾರ್ಥನೆ ಮಲ್ಪಡ್. ಅಪಗ ದೇವೆರ್ ಆ ನರಮಾನಿಗ್ ಜೀವ ಕೊರ್ಪೆ. ಆಂಡ ಮರಣೊಗು ಕಾರಣ ಅತ್ತಂದಿ ಪಾಪದ ವಿಷಯೊಡೇ ಯಾನ್ ಪನೊಂದುಲ್ಲೆ. ಮರಣೊಗು ಕಾರಣ ಆದುಪ್ಪು ಪಾಪಲಾ ಉಂಡು, ಐಕ್ ಬೋಡಾದ್ ನಿಕುಲು ಪ್ರಾರ್ಥನೆ ಮಲ್ಪೊಡಂದ್‌ದ್ ಯಾನ್ ಪನ್ಪುಜಿ.