1 ತಿಮೋಥಿ 5:3 - ಪೊಸ ಒಡಂಬಡಿಕೆ

^3-4 ದಿಕ್ಕ್‌ದಾಂತಿ ಕಂಡನಿ ಸೈತಿನಾಕುಲೆಗ್ ಆಶ್ರಯ ಕೊರ್ಲ. ಆಂಡ ಒರ್ತಿ ವಿಧವೆಗ್ ಬಾಲೆಲು ಪುಲ್ಲಿಯಾಡ್ಲು ಇತ್ತ್ಂಡ ದುಂಬತ್ತ ಇಲ್ಲದಾಕುಲೆನ್ ಭಕ್ತಿಡ್ ನಡಪಾವುನೆನ್ಲಾ ತನ್ಕುಲೆನ ಅಪ್ಪೆಅಮ್ಮಾಡ್ಲೆಗ್‌ ಉಪಕಾರ ಮಲ್ಪುನೆನ್ಲಾ ಕಲ್ತೊನಡ್. ಉಂದು ದೇವೆರೆನ ದೃಷ್ಟಿಡ್ ಮೆಚ್ಚಿಗೆದವು ಆದುಂಡು.

1 ತಿಮೋಥಿ 5:3 Iomraidhean Croise

ಮತ್ತಾಯೆ 15:6

‘ಆಯೆ ತನ ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುನ ಅಗತ್ಯ ಇಜ್ಜಿ,’ ಅಂದ್‌ದ್ ಪನ್ಪರ್. ಇಂಚ ನಿಕ್ಲೆನ ಸಂಪ್ರದಾಯೊಲೆಡ್ದ್ ದೇವೆರೆ ಅಪ್ಪಣೆನ್ ಅರ್ಥದಾಂತಿಲೆಕ್ಕ ಮಲ್ತ್‌ದರ್.

ಮತ್ತಾಯೆ 23:13

“ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ಪರಲೋಕ ರಾಜ್ಯದ ಬಾಕಿಲ್‌ನ್ ನರಮಾನಿಲೆ ಎದುರು ಮುಚ್ಚಿದ್ ಬುಡ್ಪರ್, ನಿಕುಲಾಂಡಲಾ ಉಲಯಿ ಪೋಪುಜರ್, ಉಲಯಿ ಪೋವೊಡಂದ್ ಉಪ್ಪುನಾಕುಲೆನ್ಲಾ ಪೋಯೆರೆ ಬುಡ್ಪುಜರ್.

ಲೂಕೆ 2:37

ಆಲ್ ದೇವಾಲಯೊಡೇ ಇತ್ತ್‌ದ್ ಉಪವಾಸ ಪ್ರಾರ್ಥನೆ ಮಲ್ತೊಂದು ರಾತ್ರೆ ಪಗೆಲ್ ದೇವೆರೆ ಸೇವೆ ಮಲ್ತೊಂದಿತ್ತಲ್.

ಲೂಕೆ 7:12

ಆಯೆ ಊರುದ ಬಾಕಿಲ್‌ದ ಕೈತಲ್‌ ಬನ್ನಗ ಒರಿ ಸೈತಿನಾಯನ್ ಪಿದಯಿ ಕನವೊಂದಿತ್ತೆರ್. ಉಂಬೆ ತನ ಅಪ್ಪೆಗ್ ಒರಿಯೇ ಮಗೆ; ಆಲ್ ಕಂಡನಿ ಸೈತಿನಾಲಾದಿತ್ತಲ್. ಆಲೆನ ಒಟ್ಟುಗು ಊರುದ ಮಸ್ತ್ ಜನ ಇತ್ತೆರ್.

ಯೋಹಾನೆ 1:47

ಯೇಸು ತನ ಕೈತಲ್‌ ಬರ್ಪಿ ನತಾನಿಯೇಲನ್ ತೂದು ಆಯ ಸಂಗತಿಡ್, “ಇಂದಾ, ಆಯೆ ನಿಜ ಇಸ್ರಾಯೇಲ್ಯೆ, ಆಯಡ ಕಪಟ ಇಜ್ಜಿ!” ಪಂಡೆ.

ಅಪೊ.ಕ್ರಿ 6:1

ಆ ದಿನೊಕುಲೆಡ್ ಯೇಸುನ ಶಿಷ್ಯೆರ್ ಹೆಚ್ಚೊಂದಿತ್ತೆರ್. ಅಕ್ಲೆ ನಡುಟು ಗ್ರೀಕ್ ಭಾಷೆ ಪಾತೆರುನಾಕುಲು ಇಬ್ರಿಯ ಭಾಷೆ ಪಾತೆರುನಾಕುಲೆ ಮಿತ್ತ್ ದಿನದಿನತ ಉಪಚಾರೊಡು ವಿಧವೆರೆನ್ ಸಜ್ಜಿಡ್ ಚಾಕ್ರಿ ಮಲ್ಪುಜೆರ್ ಅಂದ್‌ದ್ ಅಪೊಸ್ತಲೆರೆಡ ದೂರು ಕೊರಿಯೆರ್

ಅಪೊ.ಕ್ರಿ 9:39

ಪೇತ್ರೆ ಲಕ್ಕ್‌ದ್ ಅಕ್ಲೆನ ಒಟ್ಟುಗು ಪೋಯೆ. ಆಯೆ ಬತ್ತಿನೆನ್ ತೂದು ಆಯನ್ ಉಪ್ಪರಿಗೆಗ್ ಲೆತ್ತೊಂದು ಪೋಯೆರ್. ಅಲ್ಪ ಕಂಡನಿದಾಂತಿನಾಕುಲು ಮಾತೆರ್ಲಾ ಬುಲ್ತೊಂದು ಪೇತ್ರನ ಕೈತಲ್‌ ಉಂತೊಂದು ದೊರ್ಕ ಜೀವೊಡುಪ್ಪನಗ ಮಲ್ತ್ ಕೊರ್ತಿನ ಅಂಗಿಲೆನ್ ಕುಂಟುಲೆನ್ ತೋಜಾಯೆರ್.

ಅಪೊ.ಕ್ರಿ 9:41

ಆಯೆ ಆಲೆಗ್ ಕೈ ನೀಡ್ದ್ ಲಕ್ಕಾಯೆ. ಬೊಕ್ಕ ದೇವಜನೊಕುಲೆನ್ಲಾ ಕಂಡನಿದಾಂತಿನಾಕುಲೆನ್ಲಾ ಲೆತ್ತ್‌ದ್ ಜೀವೊಡು ಲಕ್ಕಿನಲೆನ್ ಅಕ್ಲೆನ ಎದುರು ಉಂತಾಯೆ.

1 ಥೆಸಲೋನಿಕೆರೆಗ್‌ 2:6

ಉಂದತ್ತಂದೆ ಎಂಕುಲು ಕ್ರಿಸ್ತನ ಅಪೊಸ್ತಲೆರಾದುಪ್ಪುನೆಡ್ಡ್ ಎಂಕ್ಲೆಗ್ ಮರ್ಯಾದಿ ಕೊರೊಡು ಅಂದ್‌ದ್ ಪನೊಲಿಯಾಂಡಲಾ ನರಮಾನಿಲೆಡ್ದ್ ಬರ್ಪಿ ಮೈಮೆನ್ ನಿಕ್ಲೆಡ್ದಾವಡ್, ಬೇತೆಕ್ಲೆಡ್ದಾವಡ್ ಆಸೆ ಮಲ್ಪುನಾಕುಲು ಆದಿಜ್ಜ. ಆಂಡ ಅಪ್ಪೆ ತನ ಜೋಕುಲೆನ್ ತಾಂಕುಲೆಕ್ಕನೇ ಎಂಕುಲು ನಿಕ್ಲೆ ನಡುಟು ಸಮಾಧಾನಿಲಾದ್ ಇತ್ತ.

1 ತಿಮೋಥಿ 5:2

ಪ್ರಾಯದ ಪೊಂಜೊವುಲೆನ್ ಅಪ್ಪೆ ಪಂಡ್ದ್, ಜವ್ವಂದಿ ಪೊಣ್ಣುಲೆನ್ ಮೆಗ್ದಿ ಪಲ್ದಿ ಪಂಡ್ದ್‌ಲಾ ಶುದ್ಧ ಭಾವೊಡು ತೂಲ.

ಯಾಕೋಬು 1:27

ಸಂಕಟೊಡು ಬೂರ್ದು ದಿಕ್ಕ್‌ದಾಂತಿನಾಕುಲೆನ್ಲಾ ವಿಧವೆರೆನ್ಲಾ ಪರಾಂಬರಿತ್‌ದ್, ಲೋಕದ ದೋಷ ಆಯಗ್ ತಾಗಂದಿಲೆಕ್ಕ ಕಾಪುನವೇ ಅಮ್ಮೆ ಆದುಪ್ಪು ದೇವೆರೆ ಎದುರುಡು ಶುದ್ಧಲಾ ಮೈಲೆದಾಂತಿನವುಲಾ ಆದುಪ್ಪು ಭಕ್ತಿ.

1 ಪೇತ್ರೆ 2:17

ಮಾತೆರೆಗ್ ಮಾನ ಕೊರ್ಲೆ; ಸಹೋದ್ರೆರೆನ್ ಪ್ರೀತಿ ಮಲ್ಪುಲೆ; ದೇವೆರೆ ಪೋಡಿಗೆಡ್ ನಡಪುಲೆ; ಸರಕಾರೊಗು ಒಳಗಾಲೆ.

1 ಪೇತ್ರೆ 3:7

ಅಂಚೆನೆ ಕಂಡನಿಯಾಡ್ಲೇ, ಪೊಂಜೊವುಲು ನಿಕ್ಲೆಡ್ದ್ ಕಡಿಮೆ ಬಲ ಇತ್ತಿನಾಕುಲು ಅಂದ್‌ದ್ ತೆರಿದ್ ಬೊಡೆದಿಯಾಡ್ಲೆನ್ ಅರ್ಥ ಮಲ್ತೊಂದು ಪೊರ್ಲುಡು ಜೀವನ ನಡಪಾಲೆ. ಅಕುಲು ದಯತ ಜೀವದ ವರೊಕು ನಿಕ್ಲೆನ ಒಟ್ಟುಗು ಪಾಲುದಾರೆರಾದುಲ್ಲೆರ್ ಅಂದ್‌ದ್ ಎನ್ನೊಂದು ಅಕ್ಲೆಗ್ ಮಾನೊನು ಸಂದಾಲೆ. ನಿಕುಲು ಇಂಚ ಮಲ್ತರ್ಡ ನಿಕ್ಲೆ ಪ್ರಾರ್ಥನೆಗ್ ಅಡ್ಡಿ ಆವಂದ್.