1 ತಿಮೋಥಿ 4:3 - ಪೊಸ ಒಡಂಬಡಿಕೆ

³ ಜನೊಕುಲೆನ್ ಮರ್ಲ್ ಮಲ್ಪುನಾಕುಲಾದ್ ಅಕುಲು ಮದ್ಮೆ ಆವೆರೆ ಬಲ್ಲಿ ಪಂಡ್ದ್‌ಲಾ, ಕೆಲವು ತಿನಸ್‌ಲೆನ್ ತಿನಿಯೆರೆ ಬಲ್ಲಿ ಪಂಡ್ದ್‌ಲಾ ಪನ್ಪೆರ್. ಆಂಡ ಏರ್ ದೇವೆರೆನ್ ನಂಬುನಾಕುಲಾದ್ ಸತ್ಯೊನು ತೆರಿಯೊಂದಿನಾಕುಲಾದ್ ಉಲ್ಲೆರಾ ಅಕುಲು ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ತಿನರೆಗಾದ್ ದೇವೆರ್ ಮಾತ ತರತ ತಿನಸ್‌ಲೆನ್ ಉಂಡು ಮಲ್ತ್‌ದೆ.

1 ತಿಮೋಥಿ 4:3 Iomraidhean Croise

ಮತ್ತಾಯೆ 14:19

ಬೊಕ್ಕ ಜನೊಕುಲೆನ್ ಪಜಿರ್‌ದ ಮಿತ್ತ್ ಕುಲ್ಲಿಯೆರೆ ಅಪ್ಪಣೆ ಕೊರ್ದು, ಆ ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ; ಶಿಷ್ಯೆರ್ ಜನೊಕುಲೆಗ್ ಪಟ್ಟಿಯೆರ್.

ಮತ್ತಾಯೆ 15:11

ಬಾಯಿದ ಉಲಯಿ ಪೋಪಿನವು ನರಮಾನಿನ್ ಅಶುದ್ಧ ಮಲ್ಪುಜಿ; ಬಾಯಿದ ಉಲಯಿಡ್ದ್ ಪಿದಯಿ ಬರ್ಪಿನವೇ ನರಮಾನಿನ್ ಅಶುದ್ಧ ಮಲ್ಪುಂಡು,” ಅಂದ್‌ದ್ ಪಂಡೆ.

ಮತ್ತಾಯೆ 15:36

ಆ ಏಳ್ ರೊಟ್ಟಿನ್ಲಾ ಮೀನ್‌ಲೆನ್ಲಾ ದೆತ್ತೊಂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ. ಶಿಷ್ಯೆರ್ ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್.

ಲೂಕೆ 24:30

ಆಯೆ ಅಕ್ಲೆನ ಒಟ್ಟುಗು ವಣಸ್‌ಗ್ ಕುಲ್ಲುದಿನಪಗ ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ತುಂಡು ಮಲ್ತ್‌ದ್,

ಯೋಹಾನೆ 6:23

ಆಂಡ ಆತ್ ಪೊರ್ತುಗು ಬೇತೆ ಓಡೊಲು ತಿಬೇರಿಯೊಡ್ದು ಪಿದಾಡ್ದ್, ಯೇಸು ದೇವೆರೆನ್ ಸುಗಿತ್‌ದ್ ಜನೊಕುಲೆಗ್ ವಣಸ್ ಮಲ್ಪಾಯಿ ಜಾಗ್‌ದ ಕೈತಲ್ ಬತ್ತ್‌ದಿತ್ತ್ಂಡ್.

ಅಪೊ.ಕ್ರಿ 27:35

ಅಂಚ ಪಂಡ್ದ್ ಒಂತೆ ರೊಟ್ಟಿನ್ ದೆತ್ತೊಂದು ಮಾತೆರೆನ ಎದುರುಡು ದೇವೆರೆನ್ ಸುಗಿತ್‌ದ್ ಅವೆನ್ ಪೊಲ್ತುದು ತಿನಿಯೆರೆ ಸುರು ಮಲ್ತೆ.

ರೋಮಾಯೆರೆಗ್ 14:17

ದಾಯೆಗಂದ್ಂಡ ತಿನ್ಪಿನವುಲಾ ಪರ್ಪಿನವುಲಾ ದೇವೆರೆ ರಾಜ್ಯ ಅತ್ತ್. ನೀತಿಲಾ, ಸಮಾಧಾನಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಸಂತೋಷ ಆದುಂಡು.

ರೋಮಾಯೆರೆಗ್ 14:3

ತಿನ್ಪಿನಾಯೆ ತಿನಂದಿನಾಯನ್ ಹೀನ ಮಲ್ಪೆರೆ ಬಲ್ಲಿ. ತಿನಂದಿನಾಯೆ ತಿನ್ಪಿನಾಯನ್‌ ದೋಷಿ ಪಂಡ್ದ್ ಎನ್ನೆರೆ ಬಲ್ಲಿ. ದೇವೆರ್ ಇರ್ವೆರೆನ್ಲಾ ಸೇರಾವೊಂದೆ ಅತ್ತಾ?

ರೋಮಾಯೆರೆಗ್ 14:6

ದಿನೊಲೆನ್ ವಿಶೇಷ ಪಂಡ್ದ್ ಎನ್ನುನಾಯೆ ಕರ್ತವಗಾದ್ ಅಂಚ ಎನ್ನುವೆ. ತಿನ್ಪಿನಾಯೆ ಕರ್ತವಗಾದ್ ತಿನ್ಪೆ. ಆಯೆ ದೇವೆರೆಗ್ ಉಪಕಾರ ಮಲ್ಪುವೆ ಅತ್ತಾ. ತಿನಂದಿನಾಯೆಲಾ ಕರ್ತವಗಾದ್ ತಿನಂದೆ ದೇವೆರೆಗ್ ಉಪಕಾರ ಮಲ್ಪುವೆ.

1 ಕೊರಿಂಥ್ಯೆರೆಗ್ 6:13

ಕೆಲೆವೆರ್ ಇಂಚ ಪನೊಲಿ, “ತಿನ್ಪಿನ ವಸ್ತುಲು ಬಂಜಿಗಾದ್‌ಲಾ ಬಂಜಿ ತಿನ್ಪಿನ ವಸ್ತುಲೆಗಾದ್‌ಲಾ ಉಂಡು.” ಆಂಡ ದೇವೆರ್ ಉಂದೆನ್ಲಾ ಅವೆನ್ಲಾ ದೆತ್ತ್‌ದ್ ಪಾಡ್ವೆ. ಆಂಡ ಶರೀರ ಹಾದ್ರೊಗಾದ್ ಉಪ್ಪುನವು ಅತ್ತ್, ಕರ್ತವಗಾದ್ ಉಂಡು ನಮ ಶರೀರೊಲುಲಾ ಆಯನ ಸೇವೆಗಾದ್ ಉಂಡು.

1 ಕೊರಿಂಥ್ಯೆರೆಗ್ 7:28

ಒಂಜಿ ವೇಳೆ ಈ ಮದ್ಮೆ ಆಂಡಲಾ ಪಾಪ ಅತ್ತ್. ಕನ್ಯಪೊಣ್ಣು ಮದ್ಮೆ ಆಂಡಲಾ ಪಾಪ ಅತ್ತ್. ಆಂಡ ಮದ್ಮೆ ಆಯಿನಾಕುಲೆಗ್ ಶರೀರೊಡು ಕಷ್ಟ ಬರ್ಪುಂಡು. ನಿಕ್ಲೆಗ್ ಅಂಚ ಆವೆರೆ ಬಲ್ಲಿ ಅಂದ್‌ದ್ ಎನ ಆಸೆ.

1 ಕೊರಿಂಥ್ಯೆರೆಗ್ 8:8

ಆಂಡ ತಿನ್ಪಿನವು ಎಂಕ್ಲೆನ್ ದೇವೆರೆ ಸನ್ನಿಧಿಗ್ ಸೇರಾವಂದ್. ತಿಂದ್‌ಜಿಡ ಎಂಕ್ಲೆಗ್ ಕಡಿಮೆ ಇಜ್ಜಿ, ತಿಂದ್‌ಂಡ ನಂಕ್ ಹೆಚ್ಚಿಗೆ ಆಪುಜಿ.

ಕೊಲೊಸ್ಸಿಯೆರೆಗ್ 2:16

ಅಂಚಾದ್ ತಿನ್ಪಿನ, ಪರ್ಪಿನ ಸಂಗತಿಗಾವಡ್, ಅತ್ತ್‌ಡ ಪರ್ಬ, ಅಮಾಸೆ, ಅಂಚೆನೆ ಸಬ್ಬತ್ತ್‌ನ್ ಆಚರಣೆ ಮಲ್ಪಂದಿನೆಕ್ಕಾವಡ್ ಏರ್ಲಾ ನಿಕ್ಲೆನ್ ತೀರ್ಪು ಮಲ್ಪಂದಿಲೆಕ್ಕ ತೂವೊನ್ಲೆ.

ಕೊಲೊಸ್ಸಿಯೆರೆಗ್ 3:17

ಬೊಕ್ಕ ನಿಕುಲು ಬಾಯಿದ ಪಾತೆರೊಡಾವಡ್ ನಡಾವಳಿಕೆಡಾವಡ್ ಎಂಚಿನ ಮಲ್ತರ್ಡಲಾ ಮಾತೆನ್ಲಾ ಕರ್ತವೆ ಆದುಪ್ಪು ಯೇಸುನ ಪುದರ್‌ಡೇ ಮಲ್ಪುಲೆ. ಆಯಡ್ದ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಸಂದಾಲೆ.

1 ತಿಮೋಥಿ 2:4

ಮಾತ ನರಮಾನಿಲು ರಕ್ಷಣೆ ಹೊಂದುದು ಅಕುಲು ಸತ್ಯದ ಗೇನೊಡು ಸೇರೊಡು ಪನ್ಪಿನ ದೇವೆರೆನ ಚಿತ್ತ.

1 ತಿಮೋಥಿ 4:4

ದೇವೆರ್ ಉಂಡು ಮಲ್ತಿನವು ಮಾತಲಾ ಎಡ್ಡೆಂತಿನವು ಆಯಿನೆಡ್ದ್, ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ದೆತ್ತೊಂಡ, ಒವೆನ್ಲಾ ಬೊಡ್ಚಿ ಅಂದ್‌ದ್ ಪನಿಯೆರೆ ಬಲ್ಲಿ.

1 ತಿಮೋಥಿ 5:14

ಅಂಚಾದ್ ಜವ್ವಂದಿ ವಿಧವೆ ಮದ್ಮೆ ಆದ್ ಜೋಕುಲೆನ್ ಪೆದ್ದ್‌ದ್ ಇಲ್ಲದ ಯಜಮಾನಿ ಆದುಪ್ಪುನ ಎಡ್ಡೆ ಅಂದ್‌ದ್ ಎಂಕ್ ತೋಜುಂಡು. ಅಪಗ ಅಕ್ಲೆಗ್ ವಿರೋಧಿಲೆನ ನಿಂದನೆಗ್ ಅವಕಾಸ ಉಪ್ಪುಜಿ.

ಇಬ್ರಿಯೆರೆಗ್ 13:4

ಮದ್ಮೆನ್ ಮಾನ್ಯದವು ಪಂಡ್ದ್ ಎನ್ನೊಡು. ಕಂಡನಿ ಬೊಡೆದಿನ ಸಮ್ಮಂಧೊಲು ಮೈಲೆದಾಂತಿನವು ಆದುಪ್ಪೊಡು. ದಾಯೆಗ್ ಪಂಡ ನಡತೆ ಸರಿದಾಂತಿನಾಕುಲೆಗ್ಲಾ ವ್ಯಭಿಚಾರಿಲೆಗ್ಲಾ ದೇವೆರ್ ನ್ಯಾಯತೀರ್ಪು ಕೊರುವೆ ಅಂದ್‌ದ್ ತೆರಿಯೊನ್ಲೆ.

ಇಬ್ರಿಯೆರೆಗ್ 13:9

ನಾನಾ ತರತ ಬೋಧನೆಲೆ ಸುಳಿಕ್ ತಿಕ್ಕ್‌ದ್ ಬೂರಡೆ. ದೇವೆರೆ ದಯೊನು ಪಡೆವೊಂದು ಉಡಲ್‌ನ್ ಗಟ್ಟಿ ಮಲ್ತೊನವು ಎಡ್ಡೆನೇ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ಪಡೆ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ತಿನಾಕುಲು ವಾ ಪ್ರಯೋಜನಲಾ ಪಡೆಯಿಜೆರ್.