1 ಥೆಸಲೋನಿಕೆರೆಗ್‌ 4:3 - ಪೊಸ ಒಡಂಬಡಿಕೆ

³ ದೇವೆರೆನ ಚಿತ್ತ ನಿಕುಲು ಪರಿಶುದ್ಧೆರಾದ್ ಉಪ್ಪೊಡು ಪಂಡ್ದೇ. ಅಂಚಾಯಿನೆಡ್ದ್ ನಿಕುಲು ಹಾದ್ರೊಗು ದೂರ ಆದುಪ್ಪೊಡು.

1 ಥೆಸಲೋನಿಕೆರೆಗ್‌ 4:3 Iomraidhean Croise

ಮತ್ತಾಯೆ 12:50

ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತದ ಲೆಕ್ಕ ನಡಪುನಾಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್.”

ಮತ್ತಾಯೆ 15:19

ದಾಯೆಗಂದ್ಂಡ ಉಡಲ್‌ದ ಉಲಯಿಡ್ದ್ ಬೊಡ್ಚಾಂದಿ ಆಲೋಚನೆ, ಮಾನ್ಯ ಕೆರ್ಪಿನವು, ವ್ಯಭಿಚಾರ, ಸೂಳೆಗಾರಿಕೆ, ಕಂಡೊನುನವು, ಸುಳ್ಳು ಸಾಕ್ಷಿ, ದೂಷಣೆ ಪಿದಾಡ್ದ್ ಬರ್ಪುಂಡು.

ಮತ್ತಾಯೆ 5:32

ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ, ಆಲೆನ್ ವ್ಯಭಿಚಾರ ಮಲ್ಪಾವೆರೆ ಕಾರಣ ಆಪೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

ಮತ್ತಾಯೆ 7:21

“ಎನನ್ ಕರ್ತವಾ, ಕರ್ತವಾ! ಪನ್ಪಿನಾಕುಲು ಮಾತೆರ್ ಪರಲೋಕ ರಾಜ್ಯೊಡು ಸೇರುವರಂದ್ ಎನ್ನಡೆ; ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತೊನು ಮಲ್ಪುನಾಯೆನೇ ಪರಲೋಕ ರಾಜ್ಯದ ಉಲಯಿ ಸೇರುವೆ.

ಮಾರ್ಕೆ 3:35

ಏರ್ ದೇವೆರೆ ಚಿತ್ತದ ಲೆಕ್ಕ ನಡಪುವೆನಾ ಆಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್,” ಅಂದ್‌ದ್ ಪಂಡೆ.

ಯೋಹಾನೆ 4:34

ಯೇಸು ಅಕ್ಲೆಡ, “ಎನನ್ ಕಡಪುಡ್ದಿನಾಯನ ಚಿತ್ತದ ಲೆಕ್ಕ ಮಲ್ತ್‌ದ್ ಮಲ್ಪುನವೇ ಎನ ವಣಸ್.

ಯೋಹಾನೆ 7:17

ಆಯ ಚಿತ್ತದ ಲೆಕ್ಕ ನಡಪೆರೆ ಏರೆಗ್ ಮನಸುಂಡಾ ಅಕ್ಲೆಗ್ ಈ ಬೋಧನೆ ದೇವೆರೆಡ್ದ್ ಬೈದಿನವಾ, ಇಜ್ಜಿಂಡ ಎನ ಸ್ವಂತ ಅಧಿಕಾರೊಡ್ದು ಪಂಡಿನವಾ ಅಂದ್‌ದ್ ಗೊತ್ತಾವು.

ಅಪೊ.ಕ್ರಿ 15:20

ಆಂಡ ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪೊಡು ಅಂದ್‌ದ್ ನಮ ಅಕ್ಲೆಗ್ ಕಾಕಜಿ ಬರೆದ್ ಅಪ್ಪಣೆ ಕೊರ್ಕ.

ಅಪೊ.ಕ್ರಿ 20:32

“ಯಾನ್ ಇತ್ತೆ ನಿಕ್ಲೆನ್ ದೇವೆರೆಗ್ಲಾ ಆಯನ ದಯತ ಪಾತೆರೊಗ್ಲಾ ಒಚ್ಚಿದ್ ಕೊರ್ಪೆ. ಆಯೆ ನಿಕ್ಲೆನ್ ಬಲ ಪಡೆಪಾದ್, ಪರಿಶುದ್ಧ ಆದುಪ್ಪು ಮಾತೆರೆಡೊಪ್ಪ ನಿಕ್ಲೆನ್ ಬಾಧ್ಯಸ್ತಿಗೆ ಕೊರಿಯೆರೆ ಶಕ್ತಿ ಇತ್ತಿನಾಯೆ ಆದುಲ್ಲೆ.

ಅಪೊ.ಕ್ರಿ 26:18

ಅಕುಲು ಕತ್ತಲೆಡ್ದ್ ಬೊಲ್ಪುಗ್ಲಾ ಸೈತಾನ ಅಧಿಕಾರೊಡ್ದು ದೇವೆರೆ ಕಡೆಕ್ಲಾ ತಿರ್ಗ್‌ದ್ ಎನಡ ನಂಬಿಕೆ ದೀಪಿನೆಡ್ದ್ ಪಾಪ ಪರಿಹಾರೊನ್ಲಾ ಪರಿಶುದ್ಧೆರ್ ಆಯಿನಾಕುಲೆಡೊಪ್ಪ ಪಾಲ್‌ಲಾ ತಿಕ್ಕುಲೆಕ್ಕ ಅಕ್ಲೆನ ಕಣ್ಣ್‌ಲೆನ್ ಜಪ್ಪೊಡು ಅಂದ್‌ದ್ ಅಕ್ಲೆನ ಕೈತಲ್‌ ನಿನನ್ ಕಡಪುಡ್ವೆ,’ ಅಂದ್‌ದ್ ಪಂಡೆ.

ರೋಮಾಯೆರೆಗ್ 1:29

ಎಂಚಂದ್ಂಡ ಅಕುಲು ಮಾತ ತರತ ಅನ್ಯಾಯ, ದುರ್ಮಾರ್ಗ, ಲೋಬಿತನೊಡ್ದುಲಾ ದುಷ್ಟತನೊಡ್ದುಲಾ, ಕಿಚ್ಚಿ, ಕೊಲೆ, ಲಡಯಿ, ಮೋಸ, ಪಗೆ ಇಂಚಿತ್ತಿನೆಡ್ದ್ ದಿಂಜಿದಿನಕುಲಾಯೆರ್.

ರೋಮಾಯೆರೆಗ್ 12:2

ಲೋಕದ ನಡತೆಗ್ ಸರಿಯಾದ್ ನಡಪಂದೆ ಪೊಸ ಮನಸ್‌ನ್ ಪಡೆಯೊಂದು ಪರಲೋಕದಾಕುಲಾಲೆ. ಇಂಚಾಂಡ ದೇವೆರೆ ಚಿತ್ತೊಗು ಸರಿಯಾಯಿನವು ಅಂದ್ಂಡ ಎಡ್ಡೆಂತಿನವುಲಾ, ಮೆಚ್ಚಿಗೆ ಆಯಿನವುಲಾ, ದೋಷದಾಂತಿನವುಲಾ ಒವ್ವು ಅಂದ್‌ದ್ ತೆರಿಯೊನ್ವರ್.

ರೋಮಾಯೆರೆಗ್ 6:22

ಇತ್ತೆ ಆಂಡಲಾ ನಿಕುಲು ಪಾಪೊಡ್ದು ಬುಡುಗಡೆ ಪಡೆದ್ ದೇವೆರೆಗ್ ಗುಲಾಮೆರ್ ಆಯಿನೆಡ್ದ್ ಪರಿಶುದ್ಧೆರಾಪಿನವೇ ನಿಕ್ಲೆಗ್ ಫಲ. ಕಡೆಕ್ಕ್ ತಿಕ್ಕುನಂಚಿನವು ನಿತ್ಯಜೀವ.

1 ಕೊರಿಂಥ್ಯೆರೆಗ್ 1:30

ದೇವೆರ್ ಈ ರೀತಿ ಮಲ್ತಿನೆಡ್ದಾವರನೇ ಇತ್ತೆ ನಿಕುಲು ಕ್ರಿಸ್ತ ಯೇಸುಡು ಜೀವನ ಮಲ್ತೊಂದುಲ್ಲರ್; ಆಯೆ ನಂಕ್ ದೇವೆರೆಡ್ ಬುದ್ಧಿಲಾ ನೀತಿಲಾ ಪರಿಶುದ್ಧತೆಲಾ ಅತ್ತಂದೆ ಪಾಪೊಡ್ದು ಬುಡುಗಡೆ ಮಲ್ಪುನಾಯೆಲಾ ಆದುಲ್ಲೆ. ಪುಗರೊನುನಾಯೆ ಕರ್ತವಡೇ ಪುಗರೊನಡ್ ಪನ್ಪಿನ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಯೆರೆ ಸಾದಿ ಆಂಡ್.

1 ಕೊರಿಂಥ್ಯೆರೆಗ್ 7:2

ಆಂಡ ಹಾದ್ರೊಗು ಶೋಧನೆ ಆವಂದಿಲೆಕ್ಕ ಪ್ರತಿ ಒರಿಯಗ್ ಸ್ವಂತ ಬೊಡೆದಿ ಉಪ್ಪಡ್; ಪ್ರತಿ ಪೊಂಜೊವುಗು ಆಲೆನ ಸ್ವಂತ ಕಂಡನಿ ಉಪ್ಪಡ್.

2 ಕೊರಿಂಥ್ಯೆರೆಗ್ 12:21

ಯಾನ್ ಕುಡೊರ ಬನ್ನಗ ಎನ ದೇವೆರ್ ನಿಕ್ಲೆ ಎದುರುಡು ಎನನ್ ತಗ್ಗಾವೆ. ದಾಯೆಗ್ ಪಂಡ ನಿಕ್ಲೆ ನಡುಟು ದುಂಬುದಲೆಕ್ಕ ಪಾಪ ಮಲ್ತ್‌ದ್ ಬಂಡ್‌ತನ, ಹಾದ್ರ, ಸೂಳೆಗಾರಿಕೆ ಮಲ್ತ್‌ದ್‌ಲಾ ಪಶ್ಚಾತಾಪ ಮಲ್ಪಂದಿನ ಮಸ್ತ್ ಜನೊಕುಲೆ ಸಂಗತಿಡ್ ದುಃಖ ಮಲ್ಪೊಡಾವು ಪನ್ಪಿನ ಪೋಡಿಗೆ ಎಂಕುಂಡು.

ಗಲಾತ್ಯೆರೆಗ್ 5:19

ಶರೀರಭಾವದ ಸ್ವಭಾವೊಲು ಬಯಲಾದುಂಡು; ಅವು ಒವು ಪಂಡ, ಹಾದ್ರ, ಬಂಡ್‌ತನ, ನಾಚಿಗೆದಾಂತಿನವು

ಎಫೆಸ್ಯೆರೆಗ್ 5:17

ಬುದ್ಧಿಕೆಟ್ಟಿನಾಕುಲು ಆದುಪ್ಪಂದೆ, ಕರ್ತವ ಚಿತ್ತ ಎಂಚಿನ ಅಂದ್‌ದ್ ತೆರಿಯೊಂದು ಐಕ್ ಸರಿಯಾದ್ ನಡಪುಲೆ.

ಎಫೆಸ್ಯೆರೆಗ್ 6:6

ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕ್ರಿಸ್ತನ ಚಾಕ್ರಿದಾಕುಲಾದ್ ದೇವೆರೆನ ಚಿತ್ತೊಗು ಸರಿಯಾದ್ ಉಡಲ್ ದಿಂಜಿದ್ ಚಾಕ್ರಿ ಮಲ್ಪುಲೆ.

ಕೊಲೊಸ್ಸಿಯೆರೆಗ್ 1:9

ಅಂಚಾಯಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಲೆನ್ ಕೇಂಡ್ದಿನ ದಿನೊಡ್ದಿಂಚಿ ನಿಕ್ಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ತೊಂದುಲ್ಲ. ನಿಕುಲು ಮಾತ ಆತ್ಮೀಕ ಗೇನೊನ್ಲಾ ಗ್ರಹಿಕೆನ್ಲಾ ಪಡೆಯೊಂದು ದೇವೆರೆ ಚಿತ್ತದ ತಿಳುವಳಿಕೆಡ್ ದಿಂಜೊಂದು ಬರೊಡು

ಕೊಲೊಸ್ಸಿಯೆರೆಗ್ 3:5

ಅಂಚಾಯಿನೆಡ್ದ್ ನಿಕ್ಲೆ ಉಡಲ್‌ಡುಪ್ಪು ಲೌಕೀಕ ಆಸೆಲೆನ್ ಕೆರ್ದ್ ಪಾಡ್ಲೆ. ಹಾದ್ರೊನು, ಬಂಡ್‌ತನೊನು, ಕಾಮೊನು, ಹಾಳ್ ಆಸೆನ್ ಬೊಕ್ಕ ಮೂರ್ತಿಪೂಜೆಗ್ ಸಮಾನಾದುಪ್ಪು ಕಾಸ್‌ದ ಆಸೆನ್ ಮಾತೆನ್ಲಾ ದೆತ್ತ್‌ದ್ ಪಾಡ್ಲೆ.

ಕೊಲೊಸ್ಸಿಯೆರೆಗ್ 4:12

ಕ್ರಿಸ್ತ ಯೇಸುನ ಸೇವಕೆ ಆಯಿ ನಿಕ್ಲೆ ಊರುದಾಯೆ ಎಪಫ್ರೆ ತನ ವಂದನೆಲೆನ್ ತೆರಿಪಾದೆ. ಆಯೆ ಪ್ರಾರ್ಥನೆ ಮಲ್ತೊಂದುಪ್ಪುನಗ ನಿಕ್ಲೆಗ್ ಬೋಡಾದ್ ಹೋರಾಟ ಮಲ್ತೊಂದು ನಿಕುಲು ತಿಳುವಳಿಕೆ ಇತ್ತಿನಕುಲಾದ್ ಮಾತೆಟ್ಟ್ ದೇವೆರೆ ಚಿತ್ತೊಗು ಒಳಗಾದ್ ದೃಢ ನಿಚ್ಚಯೊಡು ನಿಲೆ ಆಪಿಲೆಕ್ಕ ಆಸಕ್ತಿಡ್ ನಟ್ಟೊಂದುಲ್ಲೆ.

1 ಥೆಸಲೋನಿಕೆರೆಗ್‌ 4:2

ಅಂಚೆನೇ ಎಂಕುಲು ಕರ್ತವೆ ಆದುಪ್ಪು ಯೇಸುನ ಅಧಿಕಾರೊಡು ನಿಕ್ಲೆಗ್ ಕೊರ್ತಿನ ಅಪ್ಪಣೆಲೆನ್ ನಿಕುಲು ತೆರಿದರತ್ತಾ.

1 ಥೆಸಲೋನಿಕೆರೆಗ್‌ 4:4

ದೇವೆರೆನ್ ತೆರಿಯಂದಿನ ಪಿದಯಿದ ಜನೊಕುಲೆ ಲೆಕ್ಕ ಕಾಮದಾಶೆಗ್ ಒಳಗಾವೆರೆ ಬಲ್ಲಿ. ಪ್ರತಿ ಒರಿಲಾ ಮದ್ಮೆ ಆದ್ ಬೊಡೆದಿ ಒಟ್ಟುಗು ಪರಿಶುದ್ಧತೆಡ್ಲಾ ಮರ್ಯಾದಿಡ್ಲಾ ಉಪ್ಪೊಡು.

1 ಥೆಸಲೋನಿಕೆರೆಗ್‌ 5:18

ಮಾತ ವಿಷಯೊಡ್ಲಾ ಉಪಕಾರ ಸ್ತುತಿ ಮಲ್ಪುಲೆ. ಉಂದೇ ನಿಕ್ಲೆನ ಸಂಗತಿಡ್ ಕ್ರಿಸ್ತ ಯೇಸುಡ್ದು ತೋಜಿದ್ ಬರ್ಪಿನ ದೇವೆರೆನ ಚಿತ್ತ ಆದುಂಡು.

1 ಥೆಸಲೋನಿಕೆರೆಗ್‌ 5:23

ಸಮಾಧಾನದ ದೇವೆರ್ ತಾನೇ ನಿಕ್ಲೆನ್ ಪೂರ್ತಿ ಆದ್ ಪರಿಶುದ್ಧ ಮಲ್ಪಡ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನ ಸಮಯೊಡು, ನಿಕ್ಲೆ ಆತ್ಮ, ಪ್ರಾಣ, ಶರೀರ, ತಪ್ಪುದಾಂತೆ ಪರಿಪೂರ್ಣ ಆದ್ ತೋಜುಲೆಕ್ಕ ಕಾಪಡ್.

2 ಥೆಸಲೋನಿಕೆರೆಗ್‌ 2:13

ಆಂಡ ಕರ್ತವಗ್ ಪ್ರೀತಿ ಇತ್ತಿ ಸಹೋದ್ರೆರೇ, ದೇವೆರ್ ಸುರುಡ್ದು ನಿಕ್ಲೆನ್ ಪರಿಶುದ್ಧಾತ್ಮಡ್ ಶುದ್ಧ ಮಲ್ತ್‌ದ್ ಸತ್ಯದ ನಂಬಿಕೆಡ್ ತಿಕ್ಕು ರಕ್ಷಣೆಗ್ ಆದಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು.

ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 2:14

ನಮನ್ ಮಾತ ಅನ್ಯಾಯೊಡ್ದು ಬುಡುಗಡೆ ಮಲ್ಪೆರೆಗಾದ್‌ಲಾ, ಎಡ್ಡೆ ಕೆಲಸೊಲೆಡ್ ಆಸಕ್ತಿ ಇತ್ತಿ ಜನೊಕುಲು ಆದುಪ್ಪೊಡಂದ್‌ದ್‌ಲಾ, ತನ ಸ್ವಂತ ಜನ ಆದ್ ಶುದ್ಧ ಮಲ್ಪುನೆಕ್ಕಾದ್‌ಲಾ ಯೇಸು ತನನ್ ತಾನೆ ನಂಕ್ ಬೋಡಾದ್ ಒಚ್ಚಿದ್ ಕೊರಿಯೆ.

ಇಬ್ರಿಯೆರೆಗ್ 10:36

ದೇವೆರೆ ಚಿತ್ತೊನು ತೀರಿಸಾದ್ ವಾಗ್ದಾನದ ಫಲೊನು ಪಡೆವೊಡಾಂಡ ನಿಕ್ಲೆಗ್ ತಾಳ್ಮೆ ಬೋಡು.

ಇಬ್ರಿಯೆರೆಗ್ 12:16

ವಾ ಹಾದ್ರದಾಯೆ ಆವಡ್, ಏಸಾವಲೆಕ್ಕ ಲೋಕದಾಯೆ ಆವಡ್ ನಿಕ್ಲೆಡ್ ಇಜ್ಜಂದಿಲೆಕ್ಕ ಜಾಗ್ರತೆಡ್ ತೂವೊನ್ಲೆ. ಆ ಏಸಾವೆ ಒಂಜೇ ಒಂಜಿ ವಣಸ್‌ಗಾದ್ ತನ ಕಡೀರ್‌ದ ಹಕ್ಕ್‌ನ್ ಕೊರ್ದು ಬುಡಿಯೆ.

ಇಬ್ರಿಯೆರೆಗ್ 13:4

ಮದ್ಮೆನ್ ಮಾನ್ಯದವು ಪಂಡ್ದ್ ಎನ್ನೊಡು. ಕಂಡನಿ ಬೊಡೆದಿನ ಸಮ್ಮಂಧೊಲು ಮೈಲೆದಾಂತಿನವು ಆದುಪ್ಪೊಡು. ದಾಯೆಗ್ ಪಂಡ ನಡತೆ ಸರಿದಾಂತಿನಾಕುಲೆಗ್ಲಾ ವ್ಯಭಿಚಾರಿಲೆಗ್ಲಾ ದೇವೆರ್ ನ್ಯಾಯತೀರ್ಪು ಕೊರುವೆ ಅಂದ್‌ದ್ ತೆರಿಯೊನ್ಲೆ.

1 ಪೇತ್ರೆ 4:2

ಒರಿದಿನ ಜೀವಮಾನ ಕಾಲೊಡು ನಿಕುಲು ಶರೀರೊಡು ನರಮಾನಿಲೆ ಆಸೆಗ್ ಬೋಡಾದ್ ಬದ್‌ಕಂದೆ ದೇವೆರೆ ಚಿತ್ತೊಗು ಬೋಡಾದ್ ಬದ್‌ಕಿಯೆರೆ ಪ್ರಯತ್ನ ಮಲ್ಪುಲೆ.

1 ಯೋಹಾನೆ 2:17

ಲೋಕಲಾ ಐತ ಮಾತ ಆಸೆಲಾ ಇಜ್ಜಾಂದೆ ಪೋಪುಂಡು. ಆಂಡ ದೇವೆರೆ ಚಿತ್ತೊನು ಮಲ್ಪುನಾಯೆ ಏಪೊಗ್ಲಾ ಬದುಕುವೆ.

ಪ್ರಕಟಣೆ 21:8

ಆಂಡ ಪುಕ್ಕೆಲೆರ್, ನಂಬಿಕೆದಾಂತಿನಾಕುಲು, ಭ್ರಷ್ಟೆರ್, ಮಾನ್ಯ ಕೆರ್ಪಿನಾಕುಲು, ಹಾದ್ರದಾಕುಲು, ಮಾಟಮಂತ್ರ ಮಲ್ಪುನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಮಾತ ಸುಳ್ಳು ಪನ್ಪಿನಾಕುಲು ಮೊಕ್ಲೆಗ್ ತಿಕ್ಕುನ ಪಾಲ್ ತೂ ಗಂಧಕೊಡು ಅರ್ಲೊಂದುಪ್ಪುನ ತೂತ ಕೆರೆನೇ. ಉಂದು ರಡ್ಡನೆ ಮರಣ,” ಅಂದ್‌ದ್ ಎಂಕ್ ಪಂಡೆ.

ಪ್ರಕಟಣೆ 22:15

ನಾಯಿಲು, ಮಾಟಮಂತ್ರ ಮಲ್ಪುನಾಕುಲು, ಹಾದ್ರದಾಕುಲು, ಮಾನ್ಯ ಕೆರ್ಪಿನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಬೊಕ್ಕ ಸುಳ್ಳುನು ಪ್ರೀತಿ ಮಲ್ಪುನಾಕುಲು ಮಾತೆರ್ಲಾ ಪಟ್ಟಣದ ಪಿದಯಿಡ್ ಉಲ್ಲೆರ್.