MISHĀN 16:13 - Kathara Bible (BSI)

¹³ Nana ithumli seina̱ eina khuira̱ khalonga ngaleiwui eina hoshoklaga lamhāngli chithit khavai kala nakhalatta ithumwui wungnao sākhavai kasā hi kapai otla?

MISHĀN 16:13 Iomraidhean Croise

SHONGZĀ 1:11

Chiwui vang eina athum ot chotlak eina sākhavai kashina phāsanga, kala Pharaohwui lanshim keinung khani, Pithom eina Ra-amses sākhui.

SHONGZĀ 1:22

Chiwui thili Pharaohna awui mi saikorali kasoi, “Hebrew shimkhurli kapharā mayarnao saikora Nile kongli horsanghaolu, kha sha̱naobinga ringranu.”

SHONGZĀ 16:3

“Egypt ngaleili khaih, sāmāng shaida kashakazā mavātlakla thoting eina pamda Prohowui pāngli thihaisasi kaje phāra; khikhala jila mi hiyākha lamhāngli kathai eina thikhavai nanina ithumli thānkashokna.”

SHONGZĀ 17:3

Kha mibingna ra̱changnā kahaiwui vang Mosesli kharopta hānga, “Ithumla, naongarāla, sha̱keila ra̱kachang eina thikhavai khisāda Egyptwui eina thānshoksākhala?”

SHONGZĀ 2:14

Ana ngahānkai, “Ithumwuitungli bichar sākhavai nali khipāna wungnao kala mashunwo sāngasakkhala? Egyptnaoli shaokathat thāda ilila shaothatki kajila?” Chiwui vang Mosesna ngacheehaida phaninga, “Kachangkhat eina otsak hi theihaira.”

SHONGZĀ 2:23

Atam kasāngkhawui thili Egyptwui awunga thihaowa. Kala Israelnaobingna raopamwui lungli khanangda ringkhangā khangahui, kala ngachonmi khavai khangakao chi Varewuili shākai.

EZEKIEL 34:18

Wonui khamathāli nathumna phākazā chi mashapthuda seizat kateibing chi phei eina naikazamra, kala khamathinga tara̱ mangrada katei chi nathumwui phei eina naimakhuira kajila?

MISHĀN 11:20

kha nganamkashina mamalongairanglakha eina tangda kachāng peida shaira, kaja nathumli khangayur Proholi nathumna mamayāmada “Kachiwui vang eina ithum Egyptwui eina shoksākhala?” da chapa.’”

MISHĀN 11:4

Chitharan ngaunlop kahai Israel mibingwui alungli kha̱minao sā shaingaihaida; kala chili Israelwui mibingla zangda chaplaga hānga, “O ithum sā shaikhavai leisasi kaja chāng!

MISHĀN 11:5

Ithumna Egyptli leilakha khalem eina khaih kashai chi phaningunga, karoptheibing, khaimaithei, shomri, pyas, janam shaisai;

MISHĀN 13:27

Kala athumna Mosesli hānga, “Nana ithumli kachiho ngalei chili vai; ngalei chi seina̱ eina khuira̱ longa, kala hi chiwui atheina.

MISHĀN 14:2

Kala Israelwui mibingna Moses eina Aaronwuitungli kharopa; yarui ashangva̱na anili hānga, “Ithum Egypt ngaleili lah lamhāng hili thihaisasi kaje phameira!

MISHĀN 14:3

Prohona kachiwui vang eina ithumli raighaili thisang khavai ngalei hili thānkharākhala? Ithumwui preiva̱ kala naongarā athumwui sāshai ngasāhaora; ithumwui vanga Egyptli latung kahaina maphāmeimarala?”

MISHĀN 16:12

Chieina Mosesna Eliabwui naomayara Dathan eina Abiramli aho ngasaka, kha anina hānga, “Ini marāmara.

LUKE 19:14

Kha aramnaobingna ali yangkharinghaoda a zatthui kahaiwui thili, ‘Ithumwuitungli mipā hina khamung maningchāngmana’ da ahāng khavai minganin chihovai.

OTSAK 7:35

“‘Nali khipāna akhavā kala bicharwo sāngasakhala’ da mibingna makhamayā Moses hili, Varena thing khangapompamli theikhangasak kazingrao chiwui khangachon eina akhavāla kala kankhamela sāngasakta chihovai.