MATTHEW 8:27 - Kathara Bible (BSI)

²⁷ Mi kachiva̱ matakhakhaida hāngngaroka, “Hi kachikathā mikhala? Masi kala shamdru eina tangda awui kahāng nganāli.”

MATTHEW 8:27 Iomraidhean Croise

MATTHEW 14:33

Kala marikhongli tongkasa mibingna ali khorumda hānga, “Kachangkhat na Varewui Naomayaralaka.”

MATTHEW 15:31

chieina khangasha̱na matuikapai, pāng katekali raikhami, phei katekana kazat kala mik khangapeoana kathei chi mibing china theilaga matakhakhaowa; kala athumna Israelwui Vareli masochikata.

MATTHEW 8:10

Jishuna chi kashā eina matakhakhaida athi kashurabingli hānga, “Kachangkhat eina ina nathumli kahāngna, Israelnaobingwui alungli ina hikathā shitkasang masamphanglakmana.

MATTHEW 8:26

Ana athumli hānga, “Khisāda nathum ngacheehaokhala? He shitkasang makhalei mibing!” Chiwui thili ana ngakarthuida masi eina shamadru chili chingrihai kharara, chieina va̱rihaowa.

MATTHEW 8:28

Chiwui thili Jishuna lākhavāk kānkālaga Gadarea kaho ngalei chili vākashung tharan kameo kazanga mi khani chikhurpamwui eina shokta ali rāngaroka. Ani sāshilakhaoda mi khipākha shongfa chili mazatlengmana.

MARK 1:27

Mibing chi matakhakhaida akha eina akha ngazek ngaroka. “Hi khikhala? Kadhara tamkachithei tuila? Sashap pangshap eina ngasoda makathar manglālila kasoli kala athumnala awui kahāng nganāli!”

MARK 6:51

Ana athumwuili vālaga marikhonglungli kākatong eina masi chi va̱rihaowa. Sakhangatha̱bing chi matakhakhaowa,

MARK 7:37

Kala athum matakhaknāhaida, “Ot saikora ana phālak eina sāmihaira; ana khangakhoka kala khangasha̱ali eina tangda shāngasak, kala matui ngasakhaira” da hānga.