MATTHEW 6:19 - Kathara Bible (BSI)

¹⁹ “Nathum khalattawui vang okathuili lan makaziphaialu, aga̱-akaina shaihaipai kala maripaih paida shimānhaipai kala khalebingna shaokhailaga leethuihaipai.

MATTHEW 6:19 Iomraidhean Croise

JOBWUI LAIRIK 24:16

Tangkhamangli athumna miwui shimli leiutkai; ngashunshonga shimli pamda athumna kahor matheimana.

JOBWUI LAIRIK 31:24

Sināli ina ningshai khavai, lah sinā kachangli iwui kachihān ngasāhaiakha,

LAA 39:6

Mi hiya kachangkhat eina akalā thāda zatung-zatva sai! Kachangkhat eina khikha makhaningwui vang athumna khananga; mina sorngasaida hai, kha khipāna chi kazipkhuirada matheimana.

LAA 62:10

Minamda kakhuili akachanga masaalu, likazāli machihānphāphaalu; lan mataikasang tharan, naning chili mahaialu.

SHONGZĀ 22:2

Leekakhui sei nilala, gadhā nilala, yao nilala kharing eina awui pāngli leisakha khale china aman akhashida mataida runkāra.

CHĀNSAM 11:4

Malungkhavat atamli lanwui kānkhanā maleimana; kha khamashung khangarongna kathiwui eina kanmi.

CHĀNSAM 16:16

Sināle thangkhamei samkaphang phāmei, lupāsāle theishingkakhui kapangkhuitha̱ra.

HĀSHOKME 2:26

Kaja ali ningyāng ungkhangasak mi chili Varena thangkhamei, awor kala khamathān mi; kha morei kaphungbingli kazipkhui khavai khami hiya, Vareli ningyāng ungkhangasaka chili mikhavaina. Hila aremana, kala khamasaili kasāna.

ZEPHANIAH 1:18

Prohowui malungkathui zimiksholi, athumwui lupāsānala, sinānala mangatangkhuirarmara, awui yuishātwui malungkhavāt alungli okathui saikora shimān ngasakra. Okathuili khalei saikora kashuirak hunkhawui alungli shimān ngasakra.

MATTHEW 19:21

Jishuna ali hānga, “Nana peichaongaiakha, ungulu, laga nawui khalalei saikora yorserhailaga kachāmnaoli mihaolu. Chieina kazingramli nawui lan leira. Chiwui thili rāda ithi shurlu.”

MATTHEW 6:20

Kha nathum khalattawui vang kazingramli lan kaziphailu, chili aga̱-akainala mashaimara, maripaihla mapaimara kala khalebingnala shaokhaida maleekhuimara.

LUKE 12:21

Chi tākam eina akhalattawui vang lan tarākha kazipsanghailaga Varewui miktāli makashāng mi chi chithai” da Jishuna hānga.

LUKE 12:33

Nathumwui khalalei lan yorhaolu kala kathai-kachāmbingli milu; nathum khalatta kakān makhavai pheisākhao sākhuilu kala nathumwui lan chi kakānla mavailuiki kaji kazingramli phārihailu. Chili khalenala maleethuirarmara kala magungnala mazāmara,

LUKE 12:39

Kha hi theikazaklu kaja shimva̱ china khale china katharān rāra̱khala da theisāsi kaja ana mipā chili rimpamda khale chili awui shim makaizang ngasakmara.

LUKE 18:22

Jishuna chi kashā eina ali hānga, “Nawui khavāt akha leifaya. Nawui khalalei saikora yorhailaga kachāmnaoli yaohaolu, chithākha kazingramli nawui lan leira, laga rālu, ithi shurlu.”

LUKE 18:24

Jishuna ali yangkālaga hānga, “Lan kachungkha khaleinaobingwui vang Vare wungramli zangkida kayākha sakrakhala?

1 TIMOTHY 6:17

Okathuili kashāngbingli malangso khavai kala akachang makhaning lanli machihān khavai, kha ot saikora ithumli ringphā khavai mavātla khame Vareli chihānthei khavai machinlu.

HEBREWNAO 13:5

Nawui khalei chi shapa da phaninglu, lupāli mangamaralu, kaja Varena, “Ina nali mahorhailakmara kala machihohailakmara” da hānghaira.