MATTHEW 5:3 - Kathara Bible (BSI)

³ “Manglāli kachāmbing chi sokhamina, khikhalajila kazing wungram chi athumwuina!

MATTHEW 5:3 Iomraidhean Croise

2 THOTRINCHĀN 33:12

Chotchanglak kahai tharan awui Proho Varewui phaningkhami ngakaowa, kala avāva̱ ngarāwui Varewui mangāli akhalatta hamsangchaoluishita.

2 THOTRINCHĀN 33:19

Awui seihā kasā, Varena kathāda awui kapo khuisangmi, kala awui morei, mashitkasangwui pong, kala ana ning mangateiranglakha kajujuipam sakakā, Asherahli khokharum, meoma̱ sākakhui, saikora chi marānbingwui Thotrinchānli kapiserhaida lei.

2 THOTRINCHĀN 33:23

Avāva̱ Manassehna Prohowui mangāli ningngateida hamkasang chithāda masāla Amonna zakshikhamei morei sākhangai sai.

2 THOTRINCHĀN 34:27

khikhalajila nathumwui ningkhangateiwui vang kala ngalei hili kala hiwui mibingli makhamayā kashā eina Varewui mangāli nathumna hamkasang, kala iwui mangāli nathumna hamsangda kachon serkhaklaga kachapwui vang, inala shāmihaira da Prohona hānga.

2 THOTRINCHĀN 7:14

iwui ming eina hokhui kahaiya iwui mibingna athum khalatta hamsangakha, kala seihā sāda ili phaakha kala athumwui makhayā apongwui eina ili latungakha, ina kazingramwui eina shāmira, kala athumwui morei pheomida athumwui ngaleiwui kazāt raimira.

JOBWUI LAIRIK 42:6

chiwui vang I khalatta ningkachaiya, kala chifa eina hotlālungli ining ngateili.”

LAA 1:1

Makaphaawui khamachinli makazata, morei kasaawui ngalemli makhanganinga, mana̱shi kazāra mili mangayurkapama mi chi sokhamina;

LAA 112:1

Proholi solu! Proholi khangachee mi sokhamina, awui ningkhamili ningyāngkhaunga chi!

LAA 128:1

Proholi khangachee, awui apongli kazata mi kachiva̱ sokhamina!

LAA 146:5

Jacobwui Varivarali ngachonme sākhangasaka,

LAA 2:12

apheili maya̱lu, maningakha a malungvāthaida, nathum kashuirak thipaishina; kaja a malung thuithaklāka. Ali ngayinkakhuibing sokhamina.

LAA 34:18

Malung sipkasābingli Prohona nganaimi, ningkathengbingli huimi.

LAA 41:1

Kachāmbingli phaningkhamibingli sokhami ngasāranu! Kakhanang atamli Prohona athumli khāngshokmi.

LAA 51:17

Varena khuisangkapai pha̱kaphayā chiya, yurkahaiya kala kakhanang manglā chili O Vare, nana maningkachaimara.

LAA 84:12

O saikorawui Proho, nali shitkasanga mi chi sokhamina.

CHĀNSAM 16:19

Langkasoali ngasoda ngaponkakhui ngayarki kajiwui vanga, kachāmali ngasoda ngahuiri kahai ningngai khalei phāmei.

CHĀNSAM 29:23

Langkasona ali maishi ngasakra, kha ningngai ngahuiri kahai mina maikhayā samphangra.

CHĀNSAM 8:32

“Ara inaomayarabing, ili nganālu: iwui apong khamayonbing chi ringkaphāna.

ISAIAH 30:18

Chiwui vang eina Prohona nathumli lumashanmi khavai ngaraida lei; chiwui vang eina lukhamashan chithei khavai akhalatta khāngchikata. Kaja Vare hiya mashunwui Varena; ali khangaraibing kalā mahai.

ISAIAH 57:15

Kajuiya khamaso kala mashimānda khalei Kathara kahopa china hithāda hānga, “Kajuiya katharapamli ina pama, ning ngateida hamkasanga ali ngasoda; hamkasangabingwui manglā thuimathuk khavai, ning khangateibingwui wuklung mathuk ngasak khavai sāmi.

ISAIAH 61:1

Proho VAREwui Manglā chi iwuitungli lei, khikhalajila Prohona ili thao neomihaira; kaja kakhanang kachotbingli paokaphā khuirāmi khavai, ana ili chihokharāna kaja kaphaning kakaibingli ngahāmi khavai, narkahaibingli ningkhān vaomalānmi khavai, kala khalap kahaibingli phātop shomi khavai,

ISAIAH 66:2

Ot saikora chi ipāng eina sākhui, chieina ot saikora hi iwuina da Prohona hānga. Kha ina yangki kaji mi chiya, malungkhanim kala ningkhangatei, kala iwui tuili ngacheeda kakathira china.

MICAH 6:8

O mikumo, kaphā chi khikhala; kaji Prohona chitheimihaira kala Prohona nawui eina khi ningkachāngkhala kaji chiya mashun eina kasā, lukhamashanli kakahao, kala ningmazingda Vareli ngasokazat maningmala?

MATTHEW 11:25

Atam chili Jishuna phongshoka, “Ina nali ningshili Avā, kazing eina ngaleiwui Proho, khiwui vangkhala kaja nana otbing hi thangkhamei kala katheiabingwui eina thummihailaga angangnaobingli chitheimi,

MATTHEW 11:6

Ili ningkhamaong makhalei a chi sokhamina.”

MATTHEW 13:16

“Kha nathumwui mik kala khanā sokhami ngasaranu, kaja mikna thei, kala khanāna shai.

MATTHEW 19:14

Kha Jishuna hānga, “Naoshinaobingli iwuili rāngasaklu, athumli mahaphaialu, khikhalajila wungram hiya athum kathāwuina.”

MATTHEW 24:46

Akhavāna kharā tharan chithada sāsāda rātheikakhuia rao chi sokhamina.

MATTHEW 25:34

Chiwui thili Awungana awui yāshong khaleibing chili hāngra, ‘Rālu, ishāvāna sokhamebing, okathui sākaphokwui eina nathumwui vang ngarān kahai wungram chi mathunkhuilu;

MATTHEW 3:2

“Ningngateilu, kaja kazing wungram nganaishunhaira.”

MATTHEW 8:11

Ina nathumli kahāngna, mi kachungkha zingsho zingtunwui eina rāda kazing wungramli Abraham, Isaac kala Jacobli phazārumra,

MARK 10:14

Jishuna chi kathei tharan malungvāthaowa kala athumli hānga, “Naoshinaobingli iwuili rāngasaklu; mahaphailu; kaja Varewui wungram chi chikathābingwuina.

LUKE 11:28

Kha Jishuna ngahānkai, “Varewui tui nganākhuida chi khamayonbing sokhami ngasāranu.”

LUKE 18:14

Ina nathumli kahāngna, “Phariseepā maningla khāshinā khalokapāna pheokhami samphangda shimli hanunghaowa; kaja khalatta hakkakhui mi kachiva̱li teongasakra kala khalatta kateowana da kaphaninga mi chili hakngasakra.”

LUKE 22:29

iwui Avāna ili mungkhavai mashun khami chithada ina nathumlila chi khamina.

LUKE 22:30

Chiya nathumna iwui wungramli phāshak-phazāpamra kala wungpamkhongli pamlaga Israelwui shang tharāda khaniwuitungli nathumna mungra.”

LUKE 4:18

“Prohowui Manglā chi iwuitungli lei. Khikhalajila kachāmabingli paokaphā hashok khavai, ana ili thao neomihaira. Narkahaibingli chihomi khavai, khangapeobing theiluishit khavai, chāngkhareng kahaibing ningkhān khavai.

JOHN 20:29

Jishuna ali hānga, “Ili theihaoda ara nana shitkasangla? Mik eina matheila shitkasanga athum chi sokhamina.”

KHALATLUI 8:2

Kala malangso khavai, nathumwui ning yangkhui khavai kala Varewui ningkhami mamayonnikhalada yangkhui khavai, zingkum hangmati lamhāngli Prohona thānkazat nathumna phaningungra.

JAMES 1:10

kashānga chinala nemkatā tharan ringphāranu, khikhalajila kashāng kaho hila awon thada ja̱tāhaora.

JAMES 1:12

Chāng khayangli shitkasang makhangachei mi chi sokhamina, kaja ana chāng khayangli nganingshapakha ishameili leikashebingli ngashitmi kahai kharingwui wungkuihon chi awui sāman sāda samphangra.

JAMES 2:5

Nganāmilu, leikashiya ivānaobing, Vareli leikashebingli ana ngashitmi kahai wungram chiwui shimluikat kala shitkasangli kashānga mi ngasā khavai okathuili kachāmabingli Varena kapangkhui.

PHONGKHAMI 19:9

Kala kazingraona ili hānga, “Hi kapikhuilu: Yaonaowui shakazā zātkhānli kahobing chi sokhami ngasāranu” kala ana ili hānga, “Hi Varewui tuilaka.”

PHONGKHAMI 22:14

Kashankachon tharzā eina ngasa̱kahaibing sokhami ngasāranu! Athumna kharinga thingrongwui athei chi shaipaira, kala keinungli ngavei chieina zangpaira.

PHONGKHAMI 3:17

Nakhalatta ‘I shāngshuna, ringphāshuna, kala khavāt akhala meleimana’ da hānga kha na makathuka, khikha masā khavai, kachāma khangapeowa, kala kachon makhangavaiana kajiva matheimana.