MATTHEW 5:16 - Kathara Bible (BSI)

¹⁶ Nathumwui kahor chi mibingwui mangāli horngasaklu, chithākha athumna nathumwui kaphā otsak chi theilaga kazingramli khalei nathumwui Avāli masochikatra.

MATTHEW 5:16 Iomraidhean Croise

SHONGZĀ 34:35

Israelwui mibingna Moseswui amai horra kaji theiya kala Mosesna ali mazang ngazekranglakha eina tangda amaili mairār farorpama.

CHĀNSAM 4:18

Kha khangarongbingwui shongfava zingthanlamwui kahor thāda, mangashunranglakha eina tangda horkhangai hora.

ISAIAH 58:8

“Chithākha nawui kahor ngathor thāda shokra, kala nawui kharai thaklāk eina rāra; nawui khamashung khangarong china namangāli zatra, Prohowui tekhamateina nakhanukli khamayona sāra.”

ISAIAH 61:3

Zionli chapkhangachā athumli— hotlāwui mahut wonrui ngachāmi khavai, chapkhangachāwui mahutli ringkaphā thao neomi khavai, ning vānkahaiwui mahutli masotwui kashankachon ngavaimi khavai; kaja athumli khangarongwui shirimthing hokhavai, Prohowui lingsang kahai, chieina ali tekmateingasak khavaiwui vangna.

MATTHEW 23:5

Athumna athumwui kasāsā ot chi mina theikhavai sai; athumwui pāsi eina hār pākta sākhui kala chontheira̱ sānglak eina khanonga,

MATTHEW 23:9

Kala okathuili mi khipālikha avā mahoalu, khikhalajila nathumwui Avā akhamanga, ava kazingramli lei.

MATTHEW 5:45

Chithākha nathum kazingramli khaleiya nathumwui Avāwui naongarā ngasāpaira; kaja ana kaphālila makaphālila zimik shokmi kala khamashungalila, makhamashungalila kazing rotāmi.

MATTHEW 6:16

“Nathumna kakhum tharan khanangzan eina phākakhaningbingna kasā thada mapamchitheialu, kaja athuma athumwui kakhum chi mibingna theivairanu da zakmai ngatei ngasaka. Ina nathumli kachangkhat kahāngna, athumna athumwui samphangrān chi samphanghaira.

MATTHEW 6:9

Chieina hithada seihā sālu: ‘Kazingramli khaleia ithumwui Avā, Naming tharmathengmeiranu,

MATTHEW 9:8

Yaruina chi kathei tharan athum ngacheehaowa kala mikumoli hikathā sāshap-pangshap khame Vareli athumna masochikata.

LUKE 11:2

Chieina Jishuna athumli hānga, “Nathumna seihā kasā tharan hithada sālu: “Avā, naming tharmathengmeiranu. Nawui wungram shokmilu,

JOHN 15:8

Hithada nathumwui athei tarākha khamathei china iwui Avāwui tekhamatei phongshoka, kala china nathum iwui sākhangatha̱bingna da chithei.

OTSAK 9:36

Joppali Tabitha, chiwui kakhalata Dorcas kaho sākhangatha̱va sha̱nao akha okthuisai. Ana kaphā ot kala ngachonkhami ot kachungkha sai.

1 CORINTHNAO 14:25

Awui ngathum kahai kaphaning chi phongyānghaora, kala kui mashungzangda Vareli khorumra kala “Kachangkhat Varena nathumli ngasoda lei” da ana hāngphatra.

2 CORINTHNAO 9:13

Nathumwui hikathā otram khangatha̱ hi theilaga nathumna mayāda Khristawui paokaphāli shitsangtit kaji kala mi saikorali sailāmlak eina khamiwui vang mi kachungkhana Vareli sochikata tekmatei ngasaka.

GALATIANAO 1:24

Kala hithada iwui vang eina athumna Vareli sochikata.

EPHESIANAO 2:10

Ithum hi Varewui pāngthemna kala kaphā ot sākhavai Khrista Jishuwui lungli ithumli Varena sākahaina kala kaphā ot chi sākhavai ana rilāk eina ngarānpinghaikasāna.

EPHESIANAO 5:8

Nathum tangkhamangli okthuida leisai, kha Prohowui mi sākahaiwui vang, nathum kahorli okthuihaira. Chiwui vang eina nathum kahorli okthuida khalei mibing thāphalungra.

1 THESSALONICANAO 2:12

Nathumli awui khamung kala tekhamatei chili zangrum khavai kaho Varewui ningyāngkhaung mirin chikathā ringkhavai ithumna kasatta ninglum ngasaka kala hāngchithei.

1 TIMOTHY 2:10

Kha dharma khalei matik kachā sha̱nao thada sāranu,

1 TIMOTHY 5:10

kala kaphā otsak kasava̱; misui morei makaphungva̱, nao nganaokatheiva̱, shitkasangbingli phei pheokhamiva̱, kakhanangbingli ngachonkhamiva̱ kala kaphā ot kasāli ningkasangva̱ ngasāphalungra.

1 TIMOTHY 5:25

Chithada sāda kaphā otsakbing chi thatheihai; ngalāngda matheisālala mangathumpaimana.

1 TIMOTHY 6:18

Kaphā ot sākhavai kala kaphā ot kasāli ngachāng kāmei khavai, sailamlak eina kateibingli mithei khavai athumli machinlu.

TITUS 2:14

makaphā makhayāwui eina ngatangkhuida awui kathara kala khamareka mi sākhavai a khalatta ithumwui vang chigatmi.

TITUS 2:7

Apong saikorali na khalatta acham-aram kaphāwui ngayoyan sāphalungra. Nawui tamkachitheili ningkathar kala ningkasang eina sālu.

TITUS 3:14

Kachangkhat darkar khalei chi mishap khavai ithumwui mibingna kaphā ot kasāli ngalang chigathei khavai tamkhuiphalungra kala aremawui mirin maringphalungmara.

TITUS 3:4

Kha ithumwui huikhame Varewui lukhamashan kala leikashi phongkhami tharan,

HEBREWNAO 10:24

Akhana akhali ningngaishida kaphā ot sākhami, leikashi chithei khavai ngachon ngaroksa.

1 PETER 2:12

Yurkhangateibingwui alungli acham-aram mathada zatlu, chithākha nathumli khangui khalāng mina da phensālala nathumwui kaphā ot chi athumna theira kala a rāthang Vareli tekkmatei ngasakra.

1 PETER 2:9

Kha nathum kapangkhui kahai miyur, wungnao sharva̱, kathara yur, Varewui mibingna. Tangkhamangwui eina kahorli thānshokta awui matakkhak kahai kahor chi hāshok khavai nathumli hokakhuina.

1 PETER 3:1

Hithada sāda preiva̱ ngarā, nathum khalatta gahara ngarāli hamsanglu. Chieina athum kaikhana Vare tui hili mashitsangsālala nathumwui acham-aramna athumli yuikhuida shitsang ngasakakha nathumna tuikhur akha hānglui khavai maleiluimana.

1 PETER 3:16

Kha khanim kala khayākashi eina ngasoda sālu. Nathumwui mashun-makhui ngatarteihailu, chithākha Khristawui thikashurana da kaphā kasāwui vang nathumli kachipat tharan athum khalatta khayakkhuira.

1 PETER 4:11

Pao hākashoka a china Varewui pao hāshokphalungra; otram ngatha̱mena Varena ali mikahai pangshap chieina ngatha̱phalungra. Chithada sāda katang makhavai tekhamatei Khristawui mangā eina Vareli masot mipaira. Amen.

1 PETER 4:14

Khristawui thi kashurwui vang mina zeiakha nathum ringphālu; hiwui kakhalata tekhamatei manglā, Varewui Manglā chi nathumwui lungli lei.