MATTHEW 22:3 - Kathara Bible (BSI)

³ ana awui raobingli shakazāwui zātkhānli rākhavai ngahot kahaibingli hokhavai shivātvai, kha athumna marāngaiki jihaowa.

MATTHEW 22:3 Iomraidhean Croise

LAA 68:11

Prohona kakaso miya; paokaphā phungkhami ashangva̱ chi hakmahālaka:

ISAIAH 30:15

Kaja Israelwui Katharapa, Proho VAREna hithāda hānga, “Latungda khangasāma nathumli huimira; va̱ri kahai kala shitkasang chi nathumwui yāng ngasāra”.

JEREMIAH 25:4

Prohona awui rao marānbing kachungkha chihorāchinglala nathumna manganāsangmana, kala manāshungmana.

JEREMIAH 35:15

Iwui rao marānbing kachungkha chihoda athumna, ‘Makhamashung apongwui eina nathum kachiva̱ latungda nathumwui apong mashung ngasaklu, kala khangatei vareli otram ngatha khavai mashurzatalu, chithakha nathumli kala navāngarāli ina mikahai ngalei chili somra’ da hāng ngasakchinga. Kha nathumna ili manganāsangmana, kakhuila makhuisangmana.

HOSEA 11:2

Ina athumli chungmeida ho, athumna iwui eina tāmeimamānda yāma; athumna Baalli pha̱phayāpama, kala meoma̱li nganamkaphā riktāpama.

HOSEA 11:7

Iwui miyurna iwui eina yāmphalungra jihaowa, chiwui vang eina athumli kashai phungngasaka, kala khipānakha makhuitāmimara.

ZEPHANIAH 1:7

Proho VAREwui mangāli kasaikha pamlu; kaja Prohowui zimiksho nganaihaira; Prohona pha̱kaphayā akha ngarānhaira, kala awui mibingli tharchikathaira.

MATTHEW 21:34

Drakhāthei kaphā atam kharā tharān, raobingli yāmgui khamasābingwui eina awui sharuk athei akhui khavai chihovai.

MATTHEW 23:37

“O Jerusalem! Jerusalem, marānbingli shaothata kala nawuili chihokharābingli lunggui eina horthata! Ina nawui naongarāli harva̱na anaoli angachangzingli kapum thada pumkhami kayākha shirakhala, laga chi nana masā ngasakmana.

MATTHEW 3:2

“Ningngateilu, kaja kazing wungram nganaishunhaira.”

MATTHEW 9:15

Chieina Jishuna athumli hānga, “Shakazā mayarana athumli ngasopamda leilakha shakzātli kharā mibingli chikhumpairalā? Shakazā mayara chili athumwui eina khuikathui atam rārāsara: chithang athum khumnaora.

LUKE 13:34

“Iyavo, Jerusalem! Jerusalem! Marānbingli shaokathata keinung, kala nali chihokharābingli lunggui eina horkathata! Ina nawui naongarabingli harva̱na anaobingli angachangzingli kazipkakhui thada kayākhashira, laga chi nana mamayāmana!

LUKE 15:28

Chi kashā eina ama chi malungvātnāhaida shimlungli makāngaiga jihaowa. Chieina avāva̱na shoksuiya.

LUKE 19:27

Athumwuitungli ili mamung ngasak khangaia yangkashebing chiva hili khuirāda iwui miktāli shaothathaolu.’”

JOHN 5:40

kha kharing samphang khavai nathumna iwuili marāngaimana.

OTSAK 13:45

Yarui kachungkha kakazip chi Jihudibingna theilaga mikpaishihaowa kala athumna Paulna kahānghāng chili yetta ali kazeila zeiya.

ROMNAO 10:21

Kha Israelwui apongli ana hānga: “Kahāng makhanganā kala ngakaikashe miyurli ina mashitkhui khavai langpongda hoi.”

HEBREWNAO 12:25

Chiwui vang eina ngasharlu, matuida khalei tui chi makhuikasang masaalu. Okathuili tharkhamatheng tui hāngkhami chili makhuikasang athum chi mayāmshokrarthuwa. Chithaakha kazingramwui eina khamatuia chiwui eina yāmshokkida kayākha sakrakhala?

HEBREWNAO 9:15

Hiwui vang eina Khristana kadhara tuingashitwui ngashikmena. Varena ngashit kahai katang makhavai sokhami chi ana hokhui kahaibingli samphang ngasaka, kaja khare tuingashit chiwui eina ningkhān khavai thikhamina.

PHONGKHAMI 22:17

Manglā kala Khām kahaiva̱ china “Rālu” da hānga. Nganāda khalei mi kachiva̱nala “Rālu” da hāngranu. Ra̱kachanga mi china rāranu, ningkachānga a china kharingwui tara̱ chi aman mamila rāmangkhuiranu.

1 SAMUEL 9:13

Ana phazā khavai kaphung kajuili makāranglakha, nanina keinung lungli zangkhaleoda ali samphanghaora; kaja pha̱kaphayā hili ana somiki jihaoda, ana masomiranglakha khipākha mazāmara; chiwui thili horākahaibing saikora zānaora. Kaulu, samphangngalanghaora” da athumna hāngmi.