LUKE 9:18 - Kathara Bible (BSI)

¹⁸ Thang zimikshoka Jishuna amāng seihā sāda leilakha sākhangatha̱bingla awui ngalemli leisai, kala ana athumli ngahāna, “Ili mibingna khipāna jikhala?”

LUKE 9:18 Iomraidhean Croise

MATTHEW 14:23

Ana yaruili shiunkup kahaiwui thili seihā sākhavai kaphungli amāng kāhaowa. Kazing khaying eina tangda chili pama.

MATTHEW 26:36

Chiwui thili Jishuna awui sākhangatha̱bingli ngasoda Gethsemane kaho apam chili vai kala Jishuna athumli, “Ina vāda seihā sāda leilakha nathum hili pamsālu” da hānga.

LUKE 11:1

Jishuna apam akhali seihā asālaga kupkahaiwui thili sākhangatha̱ akhana ali hānga, “Proho, Johnna awui sākhangatha̱bingli seihā kasā tamkachithei thada ithumlila tamchitheimilu.”

LUKE 3:21

Mi saikorali ra̱hikmi kahaiwui thili kala Jishulila ra̱hikmihailaga seihā sāmahunglakha kazingram shohaowa;

LUKE 6:12

Chitharan Jishuna seihā sākhavai kaphungli vāda ngayā pongda Vareli seihā sāpama.

LUKE 9:19

Chieina athumna. “Mi kaikhana John Ra̱hikmena ji, kha kaikhana Elijahna ji kala khangatei kaikhana achālakhawui marānbingwui ngachaiwui eina akha ringkashokna ji” da ngahānkai.

LUKE 9:28

Tui hi hānghailaga zimiksho chishatthangwui thili Jishuna Peter, John kala James athumli thānphungda seihā sākhavai phungreili kai.

LUKE 9:29

Ana seihā sāmahunglakha awui zakmai onhaowa, kala awui kachonla charshi eina horchamrihai.