JOHN 4:10 - Kathara Bible (BSI)

¹⁰ Jishuna ali ngahānkai, “Nana Varewui lemmet chi theisāsi kaja kala ‘Ili tara̱ khamimanglu’ da kapopa hi khipākhala da theisi kaja nana ali poda ana nali kharinga tara̱ chi mihaira̱ra.”

JOHN 4:10 Iomraidhean Croise

LAA 10:17

O Proho, malungkhanimawui ningkachāng chi nana shāmira; athumwui wuklung nana pingngasakra, nana nāshungmira,

LAA 46:4

Varewui keinungli mathān khangasak kong akha lei, Juikhamataiawui kathara pamkhavaina.

SHONGZĀ 17:6

Yanglu, Horeb lunggui pamli ina nawui mangāli nganingra; lunghār chili ngaphitlu, chiwui eina mangkhavai tara̱ shokrāsāra.” Israel ararbingwui mangāli Mosesna chithāda sai.

SOLOMONWUI LAA 4:15

yāmguiwui ura̱, kharinga tara̱wui ra̱khong, kala Lebanon eina longkatā kong!

ISAIAH 12:3

Khamathān eina ngasoda nana huikhami ra̱khongwui eina tara̱ sokkhuira.”

ISAIAH 35:6

Phei kathākana chaonao thāda ngalongra; khangasha̱bingnala male eina laa sāra. Kaja lamhāngwui eina tara̱ shokra, kala siwukli kong longra.

ISAIAH 42:6

“Proho chi ina, ina nathumli khamashung khangarong eina hokakhuina, ina nathumli ipāng eina thara̱zatta mayonmi, ina nathumli mibingwui vang tuingashit akha sāda, yurbingwui vang kahor sangasakta,

ISAIAH 43:20

Ramsābing, ramfa kala ostrichbingna ili khayā shira, kaja ina lamhāngli tara̱ mi, siwukli kong longngasaka; Iwui kapangkhui khahai mibingli tara̱ mimang khavai,

ISAIAH 44:3

“Khikhalajila ra̱kachangpamli ina tara̱ heirorra, ngalei kathengli kong longmira; nawui atheili iwui Manglā heirorra, nawui ara̱-azāli iwui sokhami tāshungmira.

ISAIAH 49:10

Athum kathaila mathaimara ra̱kachangla mara̱changmara. Masi kala zimikwui kasā chinala athumli masāza̱mara, kaja athumli lukhamashana china thānmira kala ura̱pamli athumli ngakuimira.

ISAIAH 9:6

Kaja, ithumli nao akha pharāmihaira, ithumli naomayara akha mihaira; kala shorkar ana phungra, kala awui ming, “Matakkhakkahai Machinme, Pangshapa Vare, Katangmakhavai Avāva̱, Chingrikahai Wungnao” da hora.

JEREMIAH 2:13

Kaja iwui mibingna makaphā khani sāhaira: longkazata tara̱ khame ura̱ ili malaihaowa, kala mangarungki kaji ra̱khong athumna khonkhui.”

EZEKIEL 16:35

“Chiwui vang eina O khayorva̱̱! Prohowui tui chi nganālu:

ZECHARIAH 13:1

“Morei kala makathar otwui eina samathā khavai, chithanghon David shimkhurwui vang kala Jerusalemnaobingwui vang ura̱ akha shokmira.

ZECHARIAH 14:8

Chithanghon kharinga tara̱ Jerusalemwui eina urshokra, tangkhaina zingshowui shamadruli, kala tangkhaina zingtungwui shamadruli longvāra; sikachāngwui thāda lumkachāngla chithāchingra.

LUKE 11:13

Maphasālala nana naongarāli khamathā ot mitheiakha, kazingramli khalei Avāva̱na ali kapobingli kayākha mataida Manglā Kathara mirakhala?”

JOHN 16:3

Athumna Avālila ilila makatheiwui vang chikathā ot sāra.

JOHN 17:3

Katang makhavai kharing kaji hi akhamāng kaje khamashunga Vareli kala nana kashirāta Jishu Khristali mikumona kathei hina.

JOHN 3:16

Khikhalajila Varena apuk-apagva̱li leishinā kahaiwui vang awui Naohonaotong chi mi, chieina ali shitkasanga mi kachiva̱ mashimānphalungmara kha katang makhavai kharing samphangra.

JOHN 4:14

kha ina miki kaji tara̱ chi khamanga a chi mara̱changluimara. Ina miki kaji tara̱ chiva awuili katang makhavai kharing wurkashoka ura ngasāhaora.”

JOHN 6:35

Jishuna hānga, “I kharingawui kashakazāna, ili kharā mi chi mathaimara, kala ili shitkasanga mi chi mara̱changlakmara.

JOHN 6:51

I kazingramwui eina katā kharinga kashakazāna. Kachikathāna hi zaakha a katang mavaila ringra kala apuk-apaga ringkhavai ina miki kaji kashakazā chiya iwui asāna.”

OTSAK 9:11

Prohona ali hānga, “Khangatar Shongfa kaho chili vālu, kala Judaswui shimli Saul kaho Tarsuswui mi akha angathingkhuilu. A seihā sāda leili,

ROMNAO 8:32

Anaomayarali mashivāmla ithum saikorawui vang chigatmiakha ithumli ot saikora khalem eina mamimaralā?

1 CORINTHNAO 1:30

Varena nathumli Khrista Jishuli ngarum khavai hokhuihaira kala Varena Khrista chi ithumwui thangmei sāngasakhaira. Awui mangā eina ithumli mashungmihaira; ithum Varewui kathara miyur ngasāhaira kala moreiwui eina ningkhān ngasakhaira.

1 CORINTHNAO 10:4

kala athumli ngasokazata manglārinwui lunghār chiwui eina athumna khamang samphanga; lunghār chi Khrista a khalattana.

2 CORINTHNAO 9:15

Khamor eina mahāngkhararra awui lemmetwui vang Vareli ningshisa!

EPHESIANAO 2:8

Kaja shitkasang mangā eina nathumli huikhami hi Varewui lukhamashanna, nathumna sākakhui maningmana, kha Varewui lemmetna.

HEBREWNAO 6:4

Varewui kahor samphang kahaibingna kazingramwui sokhami mazapyanghailaga, Manglā Katharawui apongla samphanghailaga,

1 JOHN 5:20

Varewui Naomayara rāhaira kala ithumli theishingkhui ngasakhaira kaji ithumna thei. Ithum khamashunga Vare, Anaomayara Jishu Khristali ringrumda lei. Hi khamashunga Vare kala makashimān Kharing china.

PHONGKHAMI 21:6

kala ili hānga, “Kuphaira! I Alpha eina Omegana kaja haokaphok eina katangana, ra̱kachanga chili kharinga uraokwui eina ina khalem eina mimangra.

PHONGKHAMI 22:17

Manglā kala Khām kahaiva̱ china “Rālu” da hānga. Nganāda khalei mi kachiva̱nala “Rālu” da hāngranu. Ra̱kachanga mi china rāranu, ningkachānga a china kharingwui tara̱ chi aman mamila rāmangkhuiranu.

PHONGKHAMI 7:17

khikhalajila wungpamkhong alungthungli kapama Yaonao china athumli hommida kharinga tara̱ khawur ura̱pamli thanvāmira; kala Varena athumwui mikwui chara̱ mitmisera.”