JEREMIAH 8:2 - Kathara Bible (BSI)

² kala athumna leishida otram khangatha̱, athishurda khorumkasā zimik, kachāng, kala kazingramli khalei saikorawui mangāli phayaira; athumli makazipkhuiluimara, kaphumla maphumluimara; kha leimaiwui paih thāhaora.

JEREMIAH 8:2 Iomraidhean Croise

2 WUNGNAOBING 17:16

Athumna Proho Varewui kakaso saikora chi horhaida, athum khalattawui vang heikakhui seinao khani sākhuihaowa; kala Asherahla sākhuida zimik kachāng sirāli khoruma, kala Baalli otram ngatha̱ya.

2 WUNGNAOBING 21:3

Kaja avāva̱ Hezekiahna sakhai kahai kajujui apambing sakāluishita, kala Baalwui vang hanphutbing sakai; kala Israelwui awunga Ahabna sākahai thāda Asherahla sākhuilaga zimik, kachāng, sirā ashangva̱li khoruma.

2 WUNGNAOBING 21:5

Kala Prohowui shim yāngkhup apam khanili zimik, kachāng, sirā ashangva̱wui vang hanphut sakai.

2 WUNGNAOBING 23:5

Kala ana Judahwui awungana Judah kala Jerusalem kuikhamareili khalei kajujui apambingli nganamkaphā thao riktā khavai tharchisin kahai meoma̱li khokharuma pāngmonbing; kala Baal, zimik, kachāng, sirābing kala kazingli khalei ashangva̱ khangatateiwui vang thao rikkatā saikora chila khuishokhaida kashamserhaowa.

LAA 53:5

Athum chili ngacheeshun eina lei, chikathā khangachee mashoklakrangli! Kaja makaphā athumwui ara̱kui, Varena chaikathān ngasakhaora; athumli khayak ngasakra, kaja Varena athumli mamayāmana.

LAA 83:10

Endorli shaothatta ngaleipar sathui kahai thāda athumlila sāmihaolu.

LAA 83:11

Athumwui khangamabingli Oreb eina Zeebwui thāngasaklu, kala athumwui wungnaobing saikora Zeban eina Zalmunna thāda,

HĀSHOKME 6:3

Mi akhana nao shākha pharākhuida kasāngkha okthuida okpeilaklapai, kha mirinwui ringkaphā masamphangakha, kala chizankhamila maleiakha, ina kahāngna, kachāng mapeila pharātāda thikahaia china ali phāmei.

JEREMIAH 14:16

Kala athumna kahāng tui chi kashābingli Jerusalemwui eina kashamshokhaora, raighai eina kala chāmrei eina thira, athumli chifa khavai mi maleisāmara—athumla, apreiva̱̱ ngarāla, naomayara kala ngalāva̱ ngarā saikorali chifa khavai mi maleisāmara. Kaja athumwui makhayā otsak chi athumwuitungli ina heirorra.”

JEREMIAH 16:11

chitharan nana athumli hithāda ngahānkāra: Prohona hānga, ‘Khikhalajila nashāvā ngarāna ili horhaida vare khangateibingwui thi shurthuihaowa kala otram ngatha̱da athumli khoruma, kala ili horchaohaida iwui ainla mamayonmana,

JEREMIAH 16:4

Athum zakkashi kazāt eina thira. Athumwui vang chapkhangachāla machapngachāmara, kachifala machifamara; athum paih thāhaora. Athum raighai kala chāmrei eina thira, athumwui angun khamasaili yongkazat vānaobingwui kala ramsāwui kashakazā ngasāhaora.

JEREMIAH 16:6

Apam hiwui kharei kateo mateila thiserra; athumli machifamara, kala athumwui vang sam chichāpta lah sitāda chapngachā khavai khipākhala maleisāmara.

JEREMIAH 19:13

Jerusalemwui shimbing kala Judah awungabingwui shim, shimtung saikorali, kazingramli khalei saikorali nganamkaphā ot rikkatā kala varebing khangateili ra̱khalekkasā shim saikora chi Topheth thāda sākhamānghaora,” da hānga.

JEREMIAH 22:19

Gadhā akha kaphum thāda alila phumra, Jerusalem ngavei kānda shimenshoklaga horhaora.”

JEREMIAH 25:33

Kala chithang Prohona shaokathat chi okathui ungshung vāshungra. Athumli machapngachāsangmara, makazipkhuimara, machifamara, leimaili paih thāda khorhaora.

JEREMIAH 31:40

Kathingunpam, hotlāpamwui tampāk katonga, Kidron kongrānaowuili khalei luipam, zingshoshong khalei Sigui Ngavei ungshungda apam saikora hi Prohowui katharapam ngasāra. Hi phurshok kahaila, sākhayāng kahaila maleiluilakmara.”

JEREMIAH 36:30

Chiwui vang eina Judahwui awunga Jehoiakimwui pongli Prohona hithāda hānga: Davidwui wungpamkhongli pamkhavai mi akhala masamphangmara, kala awui kathi angun ngashun kasāli pahanghaira, ngayā ikra̱ matakpira.

JEREMIAH 9:20

“Nganāmilu, O sha̱naobing, Prohowui tui, akhamor eina kahāng tui nathumwui khanāna shākhuiranu; naongalāva̱ ngarāli chapchāt laa tamchitheilu, mi ava̱va̱na khongnainaoli sikafa laa tamchitheilu.

JEREMIAH 9:21

Kaja kathina ithumwui charfali rāngareikāhaira; china ithumwui konunglila kāzanghaira, chānreili kazat sha̱naobing, kayāng khareili khalei yaronnaobing katatthuiserhaira.

JEREMIAH 9:22

Hānglu, da Prohona hānga: ‘Kathinguna khamasaipamli paih thāda tātungra, kahātabingwui thili lanji thāda, chi khipānakha makazipkhuimara.’”

EZEKIEL 29:5

Nalila, kongkhaihbing chilila lamhāngli horhaida ngalei kathengli ina shireohaira, kachifala machifamara. Ramsā kala yongkazat vānaobingna nali shaikhavai ina mikahaina.

EZEKIEL 39:5

Nathum khamasai lamhāngli thisangra; kaja ina hānghaira da Proho VAREna hānga.

EZEKIEL 6:5

Kala ina Israel mibingwui kathingunbing chi athumwui meoma̱bingwui azingli haimira; kala ina nathumwui ara̱kui nathumwui hanphut kuimareita chaimira.

EZEKIEL 8:16

Chiwui thili ana ili Prohowui shimwui zangkhamayar yāngkhupli thānzanga; kala yanglu, Prohowui khorumshim khāmongli, makān khavai yāngkhup eina hanphutwui ngachaili, mi maga̱da phangā sha̱kha Prohowui khorumshimli khana̱rorlaga zingshoshong ngareivāda zimikli khorumsai.

ZEPHANIAH 1:17

Ina mibingwuitungli sipkasā khuirāra, chithāda athumna mik khangapeo thāda zatra, khikhalajila athumna Proholi morei sāhaira; athumwui ashee chifa thāda heitha̱ra, kala asā seipaih thāra.

ZEPHANIAH 1:5

shimtungli kānganinglaga zimik kachāng sirāli khokharumbing; Prohowui mingli mingzailala Milcomwui ming eina shākhi kasābing;

OTSAK 7:42

Kha Varena athumwui eina mai ngareithuihaowa kala kazingli khalei sirābingli khorum khavai horsangmihaowa, hi marānbingwui lairikli hithada kapihai: ‘He Israelnaobing! Lamhāngli zingkum hangmati zatlakha, nathumna sāyur ili pha̱kaphayā chigatla?

KHALATLUI 17:3

kala vare khangateibingli vāda otram angatha̱da khorumthuihaiakha, lah zimiklilapai, kachānglilapai, kala ina makhamayā kazingramli khalei khangatateililapai khorumakha,

KHALATLUI 4:19

Kala ning ngasharlu, kaja kazingramli yangkāda nathumna zimik, kachāng, sirābing, kala kazingramli khalei yur saikorali theida nathumna chili khorumlaga otram ngatha̱paishina; okathuili khalei saikora chi Varena mikahai chili nathum khorumthuihaipaishina.