JEREMIAH 3:8 - Kathara Bible (BSI)

⁸ Shitkasang makhaleiva̱, Israelwui phokaphā saikorawui vang ina kapāngwui lairik kapimida chiho kahai chi makhamashungva̱ achināva̱ Judahna thatheilaga mangacheela ala vālaga khayorva̱wui ot sāzata.

JEREMIAH 3:8 Iomraidhean Croise

2 THOTRINCHĀN 21:11

Chili lāngda Judahwui kaphungpambingli kajujui apambing sakālaga Jerusalemwui mibingli mashitkasang pongli thānzatta Judahli apong nguingasaka.

ISAIAH 50:1

Hithāda Prohona hānga: “Nava̱li ina chiho khavai kapāngwui lairik kali lei? Lha, iwui kachishuta khipāwui pangli nali ina yorsanghao? Yanglu, nawui khayonkhamāngwui vang nali yorkahaina, kala nawui khalāngwui vang nava̱li ina chiho kahaina.

JEREMIAH 2:19

Nathumwui makhayāna nali machinra; kala nawui shitkasang kahat china nali machinra. Nawui Vare Proholi horkahai hi nawui vang makaphā kala kakhā otna kaji yangda theikhuilu; ili khangachee nathumwui alungli maleimana,” da saikorawui Proho VAREna hānga.

JEREMIAH 3:1

“Mi akhana apreiva̱li pānghaida awui eina thuihailaga mi khangatei akhali aleihaiakha khare gaharana preiva̱ chili khuiluirala? Chikathā ram chi hakmahālak eina mamakhaomarala? Nana khayorva̱wui ot sāda kachungkhali ngasohaira; laga nana ili ungluipairala? da Prohona hānga.

JEREMIAH 33:24

“Mibingna, ‘Prohona kapangkakhui shimkhur khani chili khalanhaira’ da kahāng chi na mayangkhuirangla? Chithāda athumna chipatlak eina iwui mibingli athumwui mikyanli yur akhana da machāpmimana.

JEREMIAH 5:7

“Ina kathāda pheomira? Nanao ngarāna ili malaihaowa, kala vare makhaningbingwui ming eina mingzaihaowa. Athumli thoting eina mizaakha phokaphā ot sāhao, athumna khayorva̱wui shimli ngaheireida apamhaowa.

EZEKIEL 16:46

“Kala nachonva, anao ngalāva̱li ngasoda nawui atungshong khalei Samaria china; kala anao ngalāva̱li ngasoda azingshong khaleiva̱ Sodom nagatuiva̱na.

EZEKIEL 16:47

Chithālala nava athumwui thāda kazatli, kala athumwui ningkakachai otsakli mapenmada atam kasha̱khawui thili athumna kasā apongli nana zakshimeikharhaowa.”

EZEKIEL 16:51

“Samariana nawui morei kasā yākhawui tangkhai makāshungmana; nana athumli ningkakachai ot chungmeikharda sai, nana ningkakachai ot sākahai saikora china nachinaova̱bing khamashung kasā thāhaowa.

EZEKIEL 23:44

Kaja khayorva̱̱ sha̱naoli khangaso thāda athumnala ali ngasoi. Chithāda Oholahli kala Oholibahlila somasap khavai athumna phārai.

EZEKIEL 23:9

Chiwui vang eina ina awui leikashe Assyrianaobingwui pāngli horsangmi kahaina.

HOSEA 3:4

Kaja Israelnaobingna awunga, lah wungnao mavaila, pha̱kaphayāla, tarung, ephod kala teraphimla maleila atam kasāngkha sompamra.

KHALATLUI 24:1

“Mi akhana ngalā khuilaga ali khangakum tharan, kalikhada ana preiva̱ chiwuitungli mamayākhangai khaleiwui vang, ana apāngli kapāngwui lairik kapisangmilaga awui shimwui eina kashamhaida, preiva̱ china awui shimwui eina shokhaiakha,

KHALATLUI 24:3

gahara khanaopa chinala ali maningchāngmada apāngli kapāngwui lairik kapisanglaga awui shimwui eina kashamshokhaiakha, lah ali apreiva̱ sara̱da kakhuia gahara kakhane chi thihaiakha,