JEREMIAH 28:4 - Kathara Bible (BSI)

⁴ Jehoiakimwui naomayara, Judahwui awunga Jeconiahli ngasoda Judahwui eina Babylonli tukvā kahai saikorala apam hili khuiungmiluira, kaja Babylon awungawui kharitphun ina sātekmi haora da Prohona hānga.”

JEREMIAH 28:4 Iomraidhean Croise

HAOKAPHOK 27:40

Nawui raighai eina nana ringra, kala nachināli nana otram ngatha̱ra; kha nana khanganur tharan, awui kashai chi nakahungwui eina hortāhaora.”

2 WUNGNAOBING 24:14

Jerusalemwui mi saikora, kachām-khangaibing maningla, wungnao saikora, rai kapingbingla, athum thingtharā tukkhui, kachām-khangaibing maningla, pāngthem kathembing, mari kasābing chi tukthui kahaina.

ISAIAH 9:4

Kaja, awui otphun kashai, awui yārtuili parkahai khāmshui, ali rekakharekawui lijei, Medenaowui atamwui thāda nana sātekmihaira.

JEREMIAH 13:19

Negebwui keinungbing shungnamhaira, shomi khavai mi khipākha malei; Judah saikora raithāhaira, katonga raithāserhaira.”

JEREMIAH 2:20

“Kaja nathumna nathumwui langkon sāshatta, nar kahaiwui eina shok kahai atam kasāngkhahaira; kala nathumna, ‘I otram mangatha̱luimara’ da hānga. Mha, kaphung kajuitung kachiva̱li, khamatek thingrongphei kachiva̱li khayorva̱ thāda khoruma.

JEREMIAH 22:10

Kathe chiwui vang machapalu, kala awui vang sikafala masifalu; kha tukthui kahaipa chiwui vang soso chapngachālu, kaja ava awui ramli ungyang khavai maungluimara.

JEREMIAH 22:24

“Prohona hānga, ina katheina, Jehoiakimwui nao, Coniah Judahwui awunga hi iwui yāpangwui mahor namkhavai khutopna jilala, ina sershokhaora

JEREMIAH 24:1

Jehoiakimwui naomayara, Judahwui awunga Jehoiachinli ngasoda Judahwui wungnaobing, pāngthem kathembing, mari kasābingli Babylonwui awunga Nebuchadnezzarna Babylonli tukvā kahaiwui thili Prohona awui khamahā ili rāchithei: Yanglu, Prohowui shimli khaorāthei luk khani haikasā thei.

JEREMIAH 24:5

“Israelwui Proho VAREna hithāda hānga: Judahwui eina raitha kahaibing, Chaldea ngaleili chihovā kahaibing chi khaorāthei khamathābing katha thāda ina shānkhuira.

JEREMIAH 27:8

“Kachikathā yurna maningkha wungramna Babylonwui awunga Nebuchadnezzarli otram mangatha̱akha, kala Babylon awungawui kharitphunwui azingli akahung mahaisaakha, chikathā yur chili raighai eina, chāmrei eina, kala kazātkashi eina awui pāng eina ina mashimān ngasakranglakha eina tangda ina tandi mira da Prohona hānga.

JEREMIAH 28:10

Chieina Hananiah marānna Jeremiah marānwui akahungwui eina lengkot chi khuilaga sātekmihaowa.

JEREMIAH 28:2

“Israelwui Vare, saikorawui Prohona hithāda hānga: Babylon awungawui kharitphun ina sātekmihaira.

JEREMIAH 29:1

Jerusalemwui eina Babylonli Nebuchadnezzarna tukvā kahai raithā kahaia ararbing pāngmonbing, marānbing, kala yarui katongali marān Jeremiahna kachiphun chithi chiwui tui chi hithai.

JEREMIAH 29:2

Hi, awunga Jeconiah, ava̱va̱ awungva̱, ahongabing, Judah eina Jerusalemwui wungnaobing, pāngthem kathemabing, mari kasābing Jerusalemwui eina thuikahaiwui thilina.

JEREMIAH 30:8

“Kala chithang hithāda rāshokra, da saikorawui Prohona hānga, kaja akahungwui kharitphun chi ina khāngtāmira, athumwui zurthing sātekmihaida athumli yur khangateina athumwui rao masā ngasakluimara.

PĀNGMONSHI 26:13

I nathumwui Proho Varena, nathum raonao masā khavai Egypt ngaleiwui eina ina thānkashokna, nathumwui kharit ot sontāmihaida kashān kachot raikhangasakana.”

NAHUM 1:13

Kala ara awui kashai chi ina nawui eina sāshatmihaora, kala nali khalap kahai chi ngalāhaora.”