HOSEA 11:2 - Kathara Bible (BSI)

² Ina athumli chungmeida ho, athumna iwui eina tāmeimamānda yāma; athumna Baalli pha̱phayāpama, kala meoma̱li nganamkaphā riktāpama.

HOSEA 11:2 Iomraidhean Croise

1 WUNGNAOBING 12:33

Bethelli ana hanphut sakā kahai chili akhalattawui ningli machukping kahaiya kachāng kachishatawui zimiksho tharāda kaphangāthang kai; kala Israel mibingwui vang phanit akha chili samida ana nganamkaphā rikkhavai hanphutpamli kai.

1 WUNGNAOBING 18:19

Chiwui vang eina, Israel saikora iwui vang Carmel Kaphungli kazipkhuimilu, kala Jezebelwui tableli phazākhangarum Baal marān shāmati hangphangā kala Asherwui marān shāmati chila kazipkhuimilu.”

NEHEMIAH 9:30

Kum kasāngkha nana athumli yangmi, kala nawui Manglānala marānbingli hāngmathin ngasaka, kha athumna manganāsangmana. Chiwui vang ngalei chiwui mibingwui pāngli nana horsangmi.

ISAIAH 65:7

Khikhalajila athumna phungreitungli nganamkaphā riktai, kala chili ili khonkashitui hānga; athumna rida sākahai chiwui vang, ina peichaoda runkāmira.”

JEREMIAH 18:15

Kha iwui mibingna ili malaihaira; athumna makhaninga varebingli nganamkaphā riktai; achālakhawui shongfabing chili athum phei ngaphokhaowa, chānrei horhaida shongchonli thuihaowa.

JEREMIAH 35:13

“Israelwui Vare, saikorawui Prohona hithāda hānga: Judah kala Jerusalemwui mibingli vāda ahānglu: Iwui tui kala hāngkachithei nathum makhuisangmarala? da Prohona hāngli.

JEREMIAH 44:5

Kha athumnna makhamashung apongwui kala vare khangateibingli nganamkaphā otyur mariktālu kaji iwui tui makhuisangmana, khanganāla manganāsangmana.

HOSEA 11:7

Iwui miyurna iwui eina yāmphalungra jihaowa, chiwui vang eina athumli kashai phungngasaka, kala khipānakha makhuitāmimara.

HOSEA 2:13

Kala Baalwui zātkhān sāda nganamkaphā athumli riktāda, ana sinā khutop eina mukta sangda leikashebingwui thi shurzatta, ili malai kahaiwui vang ina ali tandi mira da Prohona hānga.

HOSEA 4:13

Athumna phungreibingwuitungli pha̱phayai, kala phungrārātungli shirimthing, thinglengthing, mathangthing pheili kachigat ot sai, kaja athumwui khaya̱ chi mathai. Chiwui vang nanao ngalāva̱bingna khayorva̱wui otsak sai, kala mākkhām kahaiva̱bingna phokaphā ot sai.

HOSEA 4:17

Ephraim meoma̱li ngarumhaira, aningkhānranu.

ZECHARIAH 1:4

Marān kharebingna, ‘saikorawui Prohona hithāda hānga, Nathumwui makaphā shongfa kala makaphā otsakwui eina latunghaolu, da machin kahai navā ngarāwui thāda masālu.’ Kha athumna mashāmana kala manganāsangmana, da Prohona hānga.

ZECHARIAH 7:11

“Kha athumna manganāsanglakla hiksor nātengseng eina thuihaowa.

LUKE 13:34

“Iyavo, Jerusalem! Jerusalem! Marānbingli shaokathata keinung, kala nali chihokharābingli lunggui eina horkathata! Ina nawui naongarabingli harva̱na anaobingli angachangzingli kazipkakhui thada kayākhashira, laga chi nana mamayāmana!

JOHN 3:19

Kala bichar chi hithai: kahor chi okathuili rāhaira, kha mikumona tangkhamangli leishitha̱haowa kaja athumwui otsak maphāmana.

OTSAK 7:51

“Hāngkashi mibing, wuklung kala khanā ahui marimkashoka mibing, nathumna Manglā Katharali ngakaishichinga. Nathumwui avā ngarāna kasa thada, nathumla chi tākamhai.

WUNGVA̱-WUNGVĀ 10:6

Kala Israelwui mibingna Prohowui mangāli makhayā otmāng saluishitta Baal eina Ashtaroth, Syria, Sidon, Moab, Ammon, kala Philistinewui varebingli otram ngatha̱thuihaida Proholi horhaowa, ali otram mangatha̱thuwa.

WUNGVA̱-WUNGVĀ 2:13

Athumna Proholi horhaowa, kala Baal eina Ashtarothli otram ngatha̱ya.

WUNGVA̱-WUNGVĀ 3:7

Kala Israelwui mibingna Prohowui mangāli makhayā otsakmāng sai, athumwui Proho Vareli malaihaida Baal eina Asherothli otram ngatha̱haowa.