CHAPCHĀT 2:9 - Kathara Bible (BSI)

⁹ Awui ngaveila ngaleili ngaphumhaira; marila akha̱ sāthuiserhaira; awui awunga kala wungnaobing miyurbingwui alungli lei; ainla maleiluimana, kala awui marānbingla Prohowui eina khamahā masamphangthura.

CHAPCHĀT 2:9 Iomraidhean Croise

2 WUNGNAOBING 25:7

Zedekiahwui miktāli anaomayarabingli sāthata, kala awui mikla latshokmithathuihaowa; kala pheipāng khalaplaga Babylonli khuivai.

2 THOTRINCHĀN 15:3

Atam kasāngkhawui vang Israelna khamashunga Vare mavaila leisai, tamchitheimi khavai pāngmonla, ainla maleisāmana;

NEHEMIAH 1:3

Kala athumna hānga, “Raithā kahaiwui eina ngathikashok ngalei chili ringda khaleibing ringshilāk eina kala simasailak eina okthuida lei; Jerusalemwui phākhola shaokhaitāmiserhaira, kala ngaveila mei sa̱tāmiserhaira” da hānga.

LAA 74:9

Ithumwui machut khavai ithumna matheimana, marān maleiluimana, atam karankharakhala da kathei ithumwui alungli akhala maleithura.

ISAIAH 24:12

Keinung ramcho ngasāhaira, ngaveila shaokhaida ngayāngserhaira.

JEREMIAH 14:14

Chieina Prohona ili hānga, “Marānbingna iwui ming singlaga kapikta marānphāphā kajina. Athumli ina machihomana, athumli kakasola makasomana, kahāngla mahāngmana. Athumna kakapika khamahā, masā khavai khanong, kala athum khalattawui ningli phaningphāphā kaji tui kahāngna.

JEREMIAH 23:16

Saikorawui Prohona hithāda hānga: “Makakachanga otli chihān khavai marānkhame athumwui tui makhuisangalu; Prohona kahāng maningmana, athum khalatta phaningkakhui tui kahāngna.

JEREMIAH 39:2

Zedekiahna khamung zingkum tharāda akhawui kachāng khamatewui zimiksho kachikothang, keinungwui alungli sākhaizanghaowa.

JEREMIAH 39:8

Chaldeanaobingna awungawui shim kala mibingwui shim mei thottāmiserhaowa, Jerusalemwui phākhola pheimiserhaowa.

JEREMIAH 51:30

Babylonwui kapingabing rai khangarar ngasāmhaira, athumna raipanlungli pamhaira; athumwui yāng kānhaira, pangshap makathuk sha̱nao thāhaira, athumwui pamkhavai mei chuihaira, veiruithingbingla tekserhaira.

JEREMIAH 52:14

Kala shantri kathānali ngasokhavā Chaldeawui raimibingna Jerusalemwui kuikhamarei ngavei sākhaiserhaowa.

CHAPCHĀT 1:3

Kachotkachāngwui vang eina Judahli raithāhaira, kala kakhananga raonao sāthuihaira; ara ana yurbingwui alungli pamzata, kha ngasām khavai masamphangmana; awui kakhanangwui alungli ali kakharomabingna ngaphankhuiserhaira.

CHAPCHĀT 4:15

“Thulu! Makathara!” da mibingna athumli kashama. “Thulu! Thulu! Masāza̱alu!” Chieina athum yāmkazata, yaokazata sāthuihaowa. yurbingwui alungli mibingna, “Athum ithumli mangayurpamluimara” da hāng ngaroka.

CHAPCHĀT 4:20

Prohona thao neomi kahaia, ithumwui nātangkhurwui eina kashok khaksui athumwui chomli sangmihaowa, “Awui khaya̱li yurbingwui alungli ithum okthuira” da ithumna kahānga chi.

EZEKIEL 12:13

Kala ina iwui khalen eina ali horkhuira, kala a iwui khalenli manhaora; kala Chaldeanaobingwui lam Babylonli khuivāra, chithālala ana matheimara, kala a chili thira.

EZEKIEL 17:20

Ina awuitungli khalen rānra, a iwui khalenli manra, kala ana iwuitungli kakapikwui vang ina ali Babylonli khuivāda chili bichar sāra.

EZEKIEL 7:26

Ka̱lāshātwuitungli kalāshāt rāra, chankharopwui thili chankharop pemra; marānbingwui eina khamahā angahānra, kha ain chi pāngmonbingwui eina shimānhaora kala hāngkachithei chi ararnaobingwui eina shimānhaora.

HOSEA 11:6

Raikhai eina athumwui keinung kaira, ngaveiwui mari kānmihaora, kala raipanwui alungli athumli shaiserhaora.

HOSEA 3:4

Kaja Israelnaobingna awunga, lah wungnao mavaila, pha̱kaphayāla, tarung, ephod kala teraphimla maleila atam kasāngkha sompamra.

AMOS 1:5

Ina Damascuswui maripan sakhaimira kala Avenwui Tampākli mi mapān ngasakmara, kala Beth-edenli khānthing kasinga, kala Syriawui mibing Kir kaho apamli raithāhaora” da Prohona hānga.

KHALATLUI 28:36

“Nathumna kachipama nathumwui awunga kala nathum saikorali, nathumna kala navā ngarānala makathei yurwui pāngli Prohona yorsangmira, kala chili nathumna thingwui lah ngalungwui varebingli khorumra.

KHALATLUI 28:63

Kala nathumli Prohona khamathā sāmida mataisangmikhangai chiyākha, Prohona kalāshi khavaila shimān khavaila sāra; kala nathumna vāda akhuiki kaji ngalei chiwui eina khuithuihaora.

1 SAMUEL 28:6

Kala Saulna Proholi khangasan eina, Prohona ali mangahānkāmithuwa, mang nganālala, Urim yanglala, marānbingnala khikha matheirarthuwa.