CHAPCHĀT 1:16 - Kathara Bible (BSI)

¹⁶ “Hibingwui vang ina chapta imikli chāra̱ longtai; kaja yangdhar chishotmi khavai, ninglumi khavai iwui eina katāva̱ thuihaowa, iwui naomayarabing ngachakyānghaira, kaja yangkashena yuihaowa.

CHAPCHĀT 1:16 Iomraidhean Croise

LAA 106:42

Athumwui yangkashebingna rekhareka; kala athumwui pangshapwui azingli haihaowa.

LAA 119:136

Imikna chāra̱ kong thāda longa, khikhalajila mibingna nawui ain mamayonmana.

LAA 69:20

Zeikakharuina ining ngayānghaira, chiwui vang eina I chihān khavai maleithura. Ili lumashanmi khavai vang phai, kha akhanida maleimana; kala ninglum khavai phai, kha ili akhala masamphangmana.

HĀSHOKME 4:1

Okathuili rekakharek ot kasā saikora chila ina theiluishita. Kala yanglu, rekharek kahaibingwui chāra̱, athumli ringphā khangasaka khipākha maleimana! Athumli rekakharekbingna pangshap lei, kala athumli ringphā khangasaka khipākha maleimana.

ISAIAH 54:11

“O kakhanangna, siphan zingrotli chotchāng kahaida maringpha khangasakabing, yanglu, nali aman kasak lungguibing eina sākāmira, kala sapphire ngalung eina shimphunga sākāmira.

JEREMIAH 13:17

Kha nathumna manganāsangakha, nathumwui lāngsotwui vang imanglāna ngathumda chapra; imikna chapchapta chara̱ pemda longtāra. Khikhalajila Prohowui yaoshang tukthuihaowa.

JEREMIAH 14:17

“Athumli tui hi nana ahāngra: ‘Ngashun ngayā mateila imikli chāra̱ tāshon tāthairanu; kala athum mangasāmaranu, kaja iwui mibingwui kachingva̱ naongalāva̱li marlak eina shaomida khamā haklak eina za̱haira.

JEREMIAH 15:5

“O Jerusalem, nali khipāna lumashanmirakhala, lah khipāna nali chapngachāmirakhala? Kkhipana kathāhaokhala da rāngahānmirakhala?

JEREMIAH 8:18

Iwui kakhanang hi maraipailuimara; ining thenghaira.

JEREMIAH 9:1

O, ikui tara̱si kaje, imikna chāra̱wui ura̱si kaje sāthat kahai iwui mibingwui naongalava̱wui vang chapshon chapthaira!

JEREMIAH 9:10

“Phungreibingwui vang vaoda chapngachālu; lamhāngwui seizātpamwui vang chapngachālu, khikhalajila chibing chi ramcho sāhaoda khipākhana mamakānvāmana, seikhonla mashāluimana, kazingli yongkazata vanaola, ramsāla yāmserhaira.”

JEREMIAH 9:21

Kaja kathina ithumwui charfali rāngareikāhaira; china ithumwui konunglila kāzanghaira, chānreili kazat sha̱naobing, kayāng khareili khalei yaronnaobing katatthuiserhaira.

CHAPCHĀT 1:2

Ana ngayā pongda soso chapa, maisor chāra̱na pemda; awui leishikasābing ngachaiwui eina ali ninglum khavai khipākha maleimana; awui ngasotnao saikorana ali yomshināmhaira, athum awui yangkashe sāthuiserhaira.

CHAPCHĀT 1:9

Awui makathar chi awui kashanli kāsai, awui kathi ana maphaningmana; chiwui vang eina awui kongkhalui zakshilāka, ali ninglum khavai khipākha maleimana. O Proho, iwui kakhanang khayangmilu, kaja yangkashebingna yuihaira!

CHAPCHĀT 2:11

Imik chāra̱ tāsānhaira; imanglā kakhananglungli lei; Iwui mibingwui naongalāva̱wui kashimānwui vang, khikhalajila naoshinaobing angangnaobing kathaina keinungwui chānreili vānserhaowa.

CHAPCHĀT 2:18

Proholi panglāk eina vaolu! O Zionwui naongalāva̱! Nawui chāra̱ kong khalong thāda ngathor ngazin longshon longthairanu! Na khalatta mangasāmkhui ngasakalu namikla mangasāmkhuiaranu!

HOSEA 9:12

Athumna nao pharāsalala ina akhala mashākmila khuithuiserhaora. Ina athumli pākkahai tharan, athum kakhanang ngasāranu!