1 SAMUEL 8:5 - Kathara Bible (BSI)

⁵ kala ali hānga, “Yanglu, na sarhaira kala nanaomayara khanina nawui thi mashurmana; chiwui vang eina yur khangateiwui thāda ara ithumli mungkhavai awunga akha kapangsang milu.”

1 SAMUEL 8:5 Iomraidhean Croise

MISHĀN 23:9

Kaja phungreitonwui eina ina ali thei, phungrābingwui eina ina ali yanga; yanglu, khalatta somkapama miyurna, yur khangateili mashānrummana!

OTSAK 13:21

Chiwui thili mibingna awunga akha poi, chieina Varena Benjamin shangli kapharā Kishwui naomayara Saulli kum hangmati mungkhavai mi.

WUNGVA̱-WUNGVĀ 8:22

Chiwui thili Israelwui mibingna Gideonli hānga, “Midiawui pāng eina nana ithumli kankhuikhamiwui vang ara nana munglu, kala nawui thili nanao ngarāna kala nara̱ ngarāna mungchinglu.”

1 SAMUEL 10:19

Kha, kakhanang kachotwui eina, sipkasāwui eina huikhame nathumwui Vareli ara mamayāla, ‘Ngga! ithumwuitungli awunga sangmilu’ da hānga. Chiwui vang eina ara nathum shang-shang kala thingthing eina kaziplaga Prohowui mangāli nathum khalatta rālu.”

1 SAMUEL 12:13

Ara yanglu, nathumna pokhuida, awunga akha kapangkhuihaira, yanglu, Prohona nathumwuitungli awunga akha sangmihaira.

1 SAMUEL 12:17

Aruihon māhāt maningmala? Ina Proholi polaga kazing ngashumda kazing rongasakakha, nathum khalattana awunga pokakhui hi Prohowui mangāli makhayā ot kahakva̱ sāhaira da theikhuira.”

1 SAMUEL 12:2

Ara yanglu, awungana nathumli thānda lei; Iva sarhaida kuila ngapokhaira, kala yanglu, inaomayara khanila nathumli ngasoli; kala ina nganuilakha eina thuida aja rāshungda nathumli thānrāhaira.

1 SAMUEL 9:20

Nawui gadhābing shimānda kathumthang kahai chiwui vang wukmakhanangalu, kaja chibing chi samphanghaira. Israelna kahaomeikap kaji chi khipakhala? Chi na eina navāwui shimkhur maningmala?”