1 SAMUEL 22:2 - Kathara Bible (BSI)

² Kala kakhanang kachiva̱, leiman kazanga kachiva̱, kala ningyāng makhaunga kachiva̱, awuili rākazipserda ana athumwuitungli kathāna sāhaowa. Kala athum ali ngasoda mi shāmati sha̱khana.

1 SAMUEL 22:2 Iomraidhean Croise

2 SAMUEL 17:8

Kala Hushaina hāngluishita, “Navāla, awui mibingla raikapinga mānga, kala athum luili singom anao tukkhui kahai thāda sāshilak eina zatta lei. Hili lāngda navāva rai khangararwui pongli themlāk kahai mina, ngayā milila mangasopimara.

2 SAMUEL 5:2

Khare kachāng Saulna ithumli munglakha Israelli thānshokkhame chi nana; kala Prohona nali, ‘Iwui Israel mibingwui yao kahoma sāra, kala athumwuitungli nana wungnao sāra’ da hānghaira.”

2 WUNGNAOBING 20:5

“Ngareiungda iwui mibingwui wungnao Hezekiahli hānglu, ‘Navā Davidwui Proho Varena kahāngna: Ina nawui seihā kasā shāhaira, kala nawui chara̱ katā theihaira; yanglu, nawui kazāt ina raimihaida kakathumathang nana Prohowui shimli kāra.

2 WUNGNAOBING 4:1

Chitharan marānbingwui naomayara akhawui preiva̱na Elishali vaoda hānga, “Narao igahara thihaowa; narao Proholi ngacheelaka, kha lupā kachishutana inaomayara khanili awui rao sākhavai khuira jihaowa.”

CHĀNSAM 31:6

Thiuki kajibingli zamshei shimanlu, kala ningchotlak kahaibingli drakhāra̱ shimanlu;

MATTHEW 11:12

John Ra̱hikmewui thot eina thuida aja rāshungda kazing wungram hi rotmarātlak eina rāshuma kala rotkhamarātwui mibingna pangshap eina yuikhui khavai sai.

MATTHEW 11:28

“Iwuili rālu, kachota kala otphun kharit kaphungbing saikora; ina nathumli ngasāmkhui ngasakra.

HEBREWNAO 2:10

Ot saikora kasā kala phāri khavai Varena mi kachungkhali Anaomayarawui tekhamatei chi samphangrum khavai mingasakphalungra kaji hi mashunglaka.

WUNGVA̱-WUNGVĀ 11:3

Chieina Jephthana achinā ngarāwui eina yāmda Tob ngaleili apāna, kala makānkhanā mibingna ali ngasoda ngathi rai sāzata.

WUNGVA̱-WUNGVĀ 18:25

Chieina Dannaobingna ali hānga, “Nakhon chi ithumwui alungli mashā ngasakalu, malungvātkazar mi zangsāda nali saza̱paishina, kala na eina nawui shimkhurwui manglāla shimānpaishina.”

1 SAMUEL 1:10

Kala Hannahna malung ringlak eina Proholi seihā sāda wukkhananglāk eina chapa.

1 SAMUEL 22:3

Kala Davidna chiwui eina Moabwui Mizpehli vai; kala ana Moabwui awungali hānga, “Varena iwui vang khi sāngasak khangaikhala kaji ina matheikhuiranglakha eina tangda ishāvā eina ishāva̱ nawuili pamsa ngasak khavai kapona.”

1 SAMUEL 23:13

Chieina Davidla awui mibingla, athum shātharuk shakha Keilah horhaida athumwui thuikapaipaili thuihaowa. David yāmhaira kaji Saulli kahāng eina ana rai sākhavai thāhaowa.

1 SAMUEL 25:13

Kala Davidna awui mibingli hānga, “Mi kachiva̱ raighai thāngkhuiserlu!” Kala athum kachiva̱na raighai thāngkhuiserhaowa, Davidla awui raighai thāngkhui; kala athum mi shāmati sha̱khana Davidwui thi shurda thuihaowa, kha shākhanina shim mayonpama.

1 SAMUEL 30:6

Davidla wukkhananglākhaowa, kaja mibingna ali ngalung eina horthatra jihaowa. Khikhalajila naomayarabing tukthuiser kahaiwui vang mibingna ning chotnāhaowa. Kha Davidna awui Proho Varewui lungli pangshap samphanga.

1 SAMUEL 9:16

“Akhama, atam hitharan, Benjamin ramwui eina ina mi akha chihorāra. Iwui Israel yurwui awunga sākhavai ali thao neomilu. Philistinenaobingwui pāng eina ana iwui yurbingli kanmira, kaja iwui yurbingwui kachotkachāng ina theihaira, khikhalajila athumwui khangakaokhon ili rāshunghaira.”