ꠁꠘ꠆ꠎꠤꠟ ১৫: ১-ꠔꠤꠝꠕꠤ 5:1 - Siloṭi Asmani Kitab (Nagri lipi)

¹ ꠅ ꠔꠤꠝꠕꠤ, ꠢꠥꠘꠅ, ꠇꠥꠘꠥ ꠝꠥꠞꠛ꠆ꠛꠤ ꠝꠣꠘꠡꠞ ꠖꠥꠡ ꠖꠦꠈꠣꠘꠤꠔ ꠉꠤꠀ ꠇꠠꠣ ꠜꠣꠡꠣꠄ ꠝꠣꠔꠤꠅ ꠘꠣ। ꠔꠣꠞꠣꠞ ꠟꠉꠦ ꠘꠤꠎꠞ ꠛꠣꠚꠞ ꠟꠣꠈꠣꠘ ꠛꠦꠛꠢꠣꠞ ꠇꠞꠤꠅ। ꠀꠞ ꠎꠥꠀꠘ ꠅꠇꠟꠞꠦ ꠘꠤꠎꠞ ꠜꠣꠁ ꠝꠘꠅ ꠇꠞꠤꠀ ꠢꠦꠖꠣꠄꠅꠔ ꠇꠞꠤꠅ।

ছিলটি আছমানি কিতাব (বাংলা লিপি)

¹ ও তিমথি, হুনো, কুনু মুরব্বি মানষর দুষ দেখানিত গিয়া কড়া ভাষায় মাতিও না। তারার লগে নিজর বাফর লাখান বেবহার করিও। আর জুয়ান অকলরে নিজর ভাই মনো করিয়া হেদায়ত করিও।

Siloṭi Asmani Kitab (Latin lipi)

¹ O Timoti, huno, kunu murobbi manshor dush deḳanit gia ḳoṛa bashae matio na. Tarar loge nizor bafor laḳan bebohar ḳorio. Ar zuan oḳolre nizor bai mono ḳoria hedayot ḳorio.

ꠁꠘ꠆ꠎꠤꠟ ১৫: ১-ꠔꠤꠝꠕꠤ 5:1 Iomraidhean Croise

ꠔꠃꠞꠣꠔ ৩: ꠟꠦꠛꠤꠀꠘ 19:32

“ꠝꠥꠞꠛ꠆ꠛꠤ ꠝꠣꠘꠥꠡ ꠗꠣꠞꠅ ꠀꠁꠟꠦ ꠔꠥꠝꠞꠣ ꠃꠛꠣꠁꠀ ꠁꠎ꠆ꠎꠔ ꠖꠤꠅ। ꠔꠥꠝꠞꠣ ꠘꠤꠎꠞ ꠀꠟ꠆ꠟꠣꠞ ꠒꠞ-ꠈꠚꠦ ꠞꠁꠅ। ꠀꠝꠤꠃ ꠔ ꠝꠣꠛꠥꠖ।

ꠁꠘ꠆ꠎꠤꠟ ১: ꠝꠕꠤ 23:8

“ꠅꠁꠟꠦ ꠔꠥꠝꠞꠣꠞꠦ ꠇꠦꠃ ꠢꠥꠎꠥꠞ ꠢꠥꠎꠥꠞ ꠇꠞꠃꠇ, ꠁꠔꠣ ꠀꠡꠣ ꠇꠞꠤꠅ ꠘꠣ। ꠔꠥꠝꠞꠣꠞ ꠀꠍꠟ ꠢꠥꠎꠥꠞ ꠔ ꠈꠣꠟꠤ ꠄꠇꠎꠘꠃ ꠀꠍꠂꠘ, ꠔꠥꠝꠞꠣ ꠈꠣꠟꠤ ꠜꠣꠁ ꠜꠣꠁ ꠞꠁꠅ।

Injil 5: Sahabi Nama 14:23

ꠔꠣꠞꠣ ꠎꠝꠣꠔꠞꠦ ꠌꠣꠟꠣꠘꠤꠞ ꠟꠣꠉꠤ ꠙꠞꠔꠦꠇ ꠎꠝꠣꠔꠞ ꠝꠥꠞꠛ꠆ꠛꠤ-ꠇꠝꠤꠐꠤ ꠛꠣꠘꠣꠁꠟꠣ। ꠀꠞ ꠎꠦ ꠝꠣꠟꠤꠇꠞ ꠃꠙꠞꠦ ꠔꠣꠞꠣ ꠁꠝꠣꠘ ꠀꠘꠍꠂꠘ, ꠄꠘ ꠘꠣꠝꠦ ꠞꠥꠎꠣ ꠞꠣꠈꠤꠀ ꠖꠥꠀ ꠇꠞꠤꠀ ꠅꠃ ꠁꠍꠣꠞ ꠀꠔꠅ ꠄꠞꠣꠞꠦ ꠡꠙꠤꠀ ꠖꠤꠟꠣ।

Injil 5: Sahabi Nama 15:4

ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠎꠦꠞꠥꠎꠣꠟꠦꠝꠅ ꠀꠁꠀ ꠙꠃꠍꠣꠞ ꠛꠣꠖꠦ ꠎꠝꠣꠔꠞ ꠝꠣꠘꠡꠦ, ꠍꠣꠢꠣꠛꠤ ꠀꠞ ꠝꠥꠞꠛ꠆ꠛꠤ ꠅꠇꠟꠦꠅ ꠔꠣꠞꠣꠞꠦ ꠝꠣꠄꠀꠞ ꠘꠎꠞꠦ ꠇꠛꠥꠟ ꠇꠞꠟꠣ। ꠀꠞ ꠔꠣꠞꠣꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠄ ꠎꠦꠔꠣ ꠇꠣꠝ ꠇꠞꠍꠂꠘ, ꠁꠔꠣ ꠢꠇꠟꠞ ꠉꠦꠍꠦ ꠎꠣꠘꠣꠁꠟꠣ।

Injil 5: Sahabi Nama 15:6

ꠔꠦꠃ ꠁ ꠛꠤꠡꠄꠅꠞ ꠚꠄꠍꠣꠟꠣ ꠇꠞꠣꠞ ꠟꠣꠉꠤ ꠍꠣꠢꠣꠛꠤ ꠅꠇꠟ ꠀꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟ ꠄꠇ ꠎꠣꠉꠣꠔ ꠖꠟꠣ ꠅꠁꠟꠣ।

Injil 5: Sahabi Nama 20:17

ꠝꠤꠟꠤꠔꠣ ꠕꠣꠇꠤ ꠙꠣꠃꠟꠥꠍꠦ ꠈꠛꠞꠤꠀ ꠙꠣꠑꠣꠁꠀ ꠁꠚꠤꠍꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠀꠘꠣꠁꠟꠣ।

Injil 6: Ruman 13:7

ꠅꠈꠘ ꠎꠣꠞ ꠎꠦꠟꠣ ꠙꠣꠅꠘꠣ, ꠔꠣꠞꠦ ꠅꠟꠣ ꠖꠦꠅ। ꠎꠦꠘꠞꠦ ꠈꠣꠎꠘꠣ ꠖꠤꠛꠣꠞ ꠇꠕꠣ, ꠄꠘꠞꠦ ꠈꠣꠎꠘꠣ ꠖꠦꠅ; ꠎꠦꠘꠞꠦ ꠝꠣꠡꠥꠟ ꠖꠤꠛꠣꠞ ꠇꠕꠣ, ꠄꠘꠞꠦ ꠝꠣꠡꠥꠟ ꠖꠦꠅ; ꠎꠦꠘꠞꠦ ꠁꠎ꠆ꠎꠔ ꠇꠞꠣꠞ ꠇꠕꠣ, ꠄꠘꠦ ꠁꠎ꠆ꠎꠔ ꠇꠞꠅ; ꠎꠦꠘꠞꠦ ꠔꠣꠎꠤꠝ ꠇꠞꠣꠞ ꠇꠕꠣ, ꠄꠘꠦ ꠔꠣꠎꠤꠝ ꠇꠞꠅ।

Injil 9: Galatia 6:1

ꠅ ꠜꠣꠁ ꠅꠇꠟ, ꠎꠝꠣꠔꠞ ꠇꠦꠃ ꠎꠥꠖꠤ ꠀꠈꠔꠣ ꠇꠥꠘꠥ ꠉꠥꠘꠣꠞ ꠚꠣꠘ꠆ꠖꠅ ꠙꠠꠤꠎꠣꠄ, ꠔꠦ ꠔꠥꠝꠞꠣ ꠎꠦꠞꠣ ꠙꠣꠇ ꠞꠥꠢꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠄ, ꠔꠥꠝꠞꠣ ꠔꠣꠞꠦ ꠔꠥꠟꠤꠀ ꠀꠘꠤꠅ। ꠀꠞ ꠈꠥꠛ ꠘꠞꠝ ꠖꠤꠟꠦ ꠁ ꠇꠣꠝ ꠇꠞꠤꠅ, ꠘꠤꠎꠞ ꠛꠦꠙꠣꠞꠦꠅ ꠢꠥꠡꠤꠀꠞ ꠞꠁꠅ, ꠎꠣꠔꠦ ꠘꠤꠎꠦꠅ ꠚꠣꠘ꠆ꠖꠅ ꠘꠣ ꠙꠠ।

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 33:9

ꠝꠣ-ꠛꠣꠚꠞꠦꠅ ꠔꠥꠟꠍꠦ ꠘꠣ ꠢꠦ ꠔꠥꠝꠣꠞ ꠃꠙꠞꠦ, ꠉꠥꠘꠣꠞ ꠡꠣꠎꠣ ꠖꠤꠍꠦ ꠔꠣꠞ ꠝꠣʼꠞ ꠙꠦꠐꠞ ꠜꠣꠁꠞꠦ। ꠖꠣꠛꠤ ꠍꠣꠠꠤꠀ ꠡꠙꠤ ꠖꠤꠍꠦ ꠀꠙꠘ ꠙꠥꠀ-ꠙꠥꠠꠤ, ꠎꠤꠘ꠆ꠖꠦꠉꠤ ꠇꠥꠞꠛꠣꠘꠤ ꠖꠤꠍꠦ ꠔꠥꠝꠣꠞ ꠀꠁꠘ ꠝꠣꠘꠤ। ꠔꠥꠝꠣꠞ ꠇꠣꠟꠣꠝ ꠙꠣꠞꠣ ꠖꠤꠍꠦ ꠝꠣꠘꠍꠦ ꠡꠞꠤꠅꠔ, ꠅꠀꠖꠣ-ꠌꠥꠇ꠆ꠔꠤ ꠝꠣꠘꠤꠀ ꠌꠟꠍꠦ, ꠘꠣ ꠇꠞꠤ ꠈꠤꠀꠘꠔ।

ꠁꠘ꠆ꠎꠤꠟ ১৫: ১-ꠔꠤꠝꠕꠤ 5:17

ꠎꠝꠣꠔꠞ ꠎꠦ ꠙꠞꠗꠣꠘ ꠝꠥꠞꠛ꠆ꠛꠤ ꠅꠇꠟꠦ ꠎꠝꠣꠔꠞꠦ ꠜꠣꠟꠣꠝꠘ꠆ꠔꠦ ꠌꠣꠟꠣꠁꠘ, ꠈꠣꠍ ꠇꠞꠤ ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠀꠞ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠝꠦꠘꠔ ꠇꠞꠂꠘ, ꠔꠣꠞꠣ ꠒꠣꠛꠥꠟ ꠁꠎ꠆ꠎꠔ ꠙꠣꠅꠀ ꠎꠞꠥꠞ।

ꠁꠘ꠆ꠎꠤꠟ ১৫: ১-ꠔꠤꠝꠕꠤ 5:2

ꠝꠥꠞꠛ꠆ꠛꠤ ꠛꠦꠐꠤꠘꠞꠦ ꠘꠤꠎꠞ ꠝꠣ ꠀꠞ ꠙꠥꠠꠤꠘ꠆ꠔꠞꠦ ꠛꠁꠘ ꠝꠘꠅ ꠇꠞꠤꠀ, ꠝꠘꠞ ꠜꠣꠛ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠀ ꠔꠣꠞꠣꠞꠦ ꠢꠦꠖꠣꠄꠅꠔ ꠇꠞꠤꠅ।

Injil 17: Titas 2:2

ꠎꠝꠣꠔꠞ ꠝꠥꠞꠛ꠆ꠛꠤ ꠛꠦꠐꠣꠁꠘꠞꠦ ꠇꠅ, ꠔꠣꠞꠣ ꠎꠣꠘꠥ ꠢꠣꠝꠦꠡꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ, ꠁꠎ꠆ꠎꠔꠤ ꠛꠘꠂꠘ, ꠜꠣꠟꠣ ꠛꠤꠌꠣꠞ-ꠛꠤꠛꠦꠇ ꠈꠣꠐꠣꠁꠘ। ꠔꠣꠞꠣꠞ ꠎꠣꠘꠥ ꠈꠣꠐꠤ ꠁꠝꠣꠘ, ꠝꠣꠄꠀ-ꠝꠢꠛ꠆ꠛꠔ ꠀꠞ ꠍꠛꠞ ꠕꠣꠇꠦ।

Injil 17: Titas 2:6

ꠅꠟꠣꠈꠣꠘ ꠎꠥꠀꠘ ꠙꠥꠀꠂꠘ꠆ꠔꠞꠦꠅ ꠃꠙꠖꠦꠡ ꠖꠦꠅ, ꠎꠣꠔꠦ ꠔꠣꠞꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ।

Injil 20: Iakub 3:17

ꠅꠁꠟꠦ ꠛꠦꠢꠦꠡ꠆ꠔ ꠕꠣꠇꠤ ꠎꠦ ꠢꠦꠇꠝꠔ ꠀꠄ, ꠁꠇꠐꠣ ꠅꠁꠟ ꠈꠣꠐꠤ। ꠁꠇꠐꠣ ꠡꠣꠘ꠆ꠔꠤꠄ ꠜꠞꠣ, ꠍꠛꠞꠀꠟꠣ ꠀꠞ ꠘꠞꠝ ꠝꠤꠎꠣꠎꠤ, ꠖꠄꠀ ꠀꠞ ꠢꠇ ꠇꠣꠝꠦ ꠜꠞꠣ, ꠔꠣꠞ ꠝꠣꠎꠦ ꠇꠥꠘꠥ ꠢꠣꠞ-ꠙꠞ ꠛꠣ ꠜꠘ꠆ꠒꠣꠝꠤ ꠘꠣꠁ।

Injil 20: Iakub 5:14

ꠇꠦꠃꠞꠞ ꠛꠦꠝꠣꠞ ꠅꠁꠟꠦ ꠢꠦ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠖꠣꠅꠔ ꠖꠦꠃꠇ, ꠔꠣꠞꠣ ꠀꠁꠀ ꠀꠟ꠆ꠟꠣꠞ ꠘꠣꠝ ꠟꠁꠀ ꠔꠣꠞ ꠝꠣꠕꠣꠔ ꠔꠦꠟ ꠖꠤꠀ ꠖꠥꠀ ꠇꠞꠃꠇ꠆ꠇꠣ।

ꠁꠘ꠆ꠎꠤꠟ ২১: ১-ꠙꠤꠔꠞ 5:1

ꠅꠈꠘ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠞꠣꠝ, ꠀꠝꠤꠅ ꠔ ꠄꠇꠎꠘ ꠝꠥꠞꠛ꠆ꠛꠤ, ꠀꠝꠤ ꠘꠤꠎꠞ ꠌꠃꠈꠦ ꠀꠟ-ꠝꠍꠤꠞ ꠖꠥꠈ-ꠇꠡ꠆ꠐ ꠖꠦꠈꠍꠤ, ꠀꠞ ꠔꠣꠘ ꠎꠦ ꠝꠢꠤꠝꠣ ꠎꠣꠁꠞ ꠅꠁꠛ, ꠅꠃ ꠝꠢꠤꠝꠣꠔꠅ ꠡꠞꠤꠇ ꠅꠁꠝꠥ। ꠀꠝꠤ ꠝꠤꠘꠔ ꠇꠞꠤ ꠇꠁꠞꠣꠝ,

Injil 24: 2-Hannan 1:1

ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ, ꠀꠟ꠆ꠟꠣꠞ ꠙꠍꠘ꠆ꠖꠞ ꠢꠃ ꠛꠦꠉꠝ ꠍꠣꠄꠛꠣꠘꠤ ꠀꠞ ꠔꠣꠘ ꠀꠅꠟꠣꠖ ꠅꠇꠟꠞ ꠉꠦꠍꠦ। ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠣꠞꠦ ꠝꠢꠛ꠆ꠛꠔ ꠇꠞꠤ, ꠈꠣꠟꠤ ꠀꠝꠤ ꠘꠣꠄ, ꠀꠞꠅ ꠎꠔ ꠝꠣꠘꠡꠦ ꠀꠟ꠆ꠟꠣꠁ ꠢꠇ ꠎꠣꠘꠍꠂꠘ ꠔꠣꠞꠣ ꠢꠇꠟꠦ ꠎꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠅꠃ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ।

Injil 25: 3-Hannan 1:1

ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠦ ꠝꠢꠛ꠆ꠛꠔ ꠇꠞꠤ, ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠉꠃꠍꠞ ꠉꠦꠍꠦ, ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ।

Injil 27: Zaira Kalam 4:4

ꠅꠃ ꠔꠈ꠆ꠔꠞ ꠌꠣꠁꠞꠅ ꠇꠣꠘ꠆ꠖꠣꠛꠣꠄ ꠀꠞꠅ ꠌꠛ꠆ꠛꠤꠡꠈꠣꠘ ꠔꠈ꠆ꠔ ꠀꠍꠤꠟ, ꠢꠃ ꠔꠈ꠆ꠔꠅ ꠛꠅꠀꠔ ꠀꠍꠟꠣ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ। ꠄꠞꠣꠞ ꠟꠦꠛꠣꠍ ꠀꠍꠤꠟ ꠗꠟꠣ ꠌꠇꠌꠇꠣ ꠀꠞ ꠝꠣꠕꠣꠔ ꠀꠍꠤꠟ ꠡꠥꠘꠣꠞ ꠔꠣꠎ।