ꠔꠃꠞꠣꠔ ৪: ꠡꠥꠝꠣꠞꠤ 14:9 - Siloṭi Asmani Kitab (Latin lipi)

⁹ Huno, tumra Mabudor morzir ulṭa ḳam ḳorio na. Tumra hi deshor manshore ḍoraio na, tarare gilia ḳaite-o amrar deri oito nae. Tumra itare ḍoraio na, tarar matar ufror saya nai, amrar loge to Mabud asoin.”

Siloṭi Asmani Kitab (Nagri lipi)

⁹ ꠢꠥꠘꠅ, ꠔꠥꠝꠞꠣ ꠝꠣꠛꠥꠖꠞ ꠝꠞ꠆ꠎꠤꠞ ꠃꠟꠐꠣ ꠇꠣꠝ ꠇꠞꠤꠅ ꠘꠣ। ꠔꠥꠝꠞꠣ ꠢꠤ ꠖꠦꠡꠞ ꠝꠣꠘꠡꠞꠦ ꠒꠞꠣꠁꠅ ꠘꠣ, ꠔꠣꠞꠣꠞꠦ ꠉꠤꠟꠤꠀ ꠈꠣꠁꠔꠦꠅ ꠀꠝꠞꠣꠞ ꠖꠦꠞꠤ ꠅꠁꠔ ꠘꠣꠄ। ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ, ꠔꠣꠞꠣꠞ ꠝꠣꠕꠣꠞ ꠃꠙꠞꠞ ꠍꠣꠄꠀ ꠘꠣꠁ, ꠀꠝꠞꠣꠞ ꠟꠉꠦ ꠔ ꠝꠣꠛꠥꠖ ꠀꠍꠂꠘ।”

ছিলটি আছমানি কিতাব (বাংলা লিপি)

⁹ হুনো, তুমরা মাবুদর মর্জির উল্টা কাম করিও না। তুমরা হি দেশর মানষরে ডরাইও না, তারারে গিলিয়া খাইতেও আমরার দেরি অইতো নায়। তুমরা ইতারে ডরাইও না, তারার মাথার উপরর ছায়া নাই, আমরার লগে তো মাবুদ আছইন।”

ꠔꠃꠞꠣꠔ ৪: ꠡꠥꠝꠣꠞꠤ 14:9 Iomraidhean Croise

ꠔꠃꠞꠣꠔ ১: ꠙꠄꠖꠣ ꠘꠣꠝꠣ 48:21

Heshe Hozrot Israile Iusufre ḳoila, “Deḳo, amar moronor oḳt aichche. Alla tumrar loge roiba, ar tumrare hirbar tumrar baf-dadar desho nichchoy firaia niba.

ꠎꠛꠥꠞ ꠡꠞꠤꠚ 121:5

Mabud-u tumar hefazotḳari, tumar asroy saya, tumar ḍain ato doria tain asoin ḳaṛa.

ꠎꠛꠥꠞ ꠡꠞꠤꠚ 14:4

Ou bojjat oḳlor maze kunu aḳol nai ni? Manshe zela ḳana-ḳaiddo ḳain, tara ola amar bondare ḳailae, Alla Mabudor nam-o ae na tarar mukedi.

ꠔꠃꠞꠣꠔ ২: ꠢꠤꠎꠞꠔ 14:13

Musae tarare ḳoila, “Tumra ḍoraio na. Hoḳole nirai oia deḳo, Mabude aiz kila basain. Ou zeta Mishorintore oḳon deḳrae, itare ar kunudin-u deḳtae nae.

ꠔꠃꠞꠣꠔ ২: ꠢꠤꠎꠞꠔ 33:16

Tumi na gele manshe kila buzba, amar ufre ar tumar i bonda oḳlor ufre tumar rohomot ase? Amra-u zen duniar hoḳol zati taki alada, ikan kila buzba?”

ꠔꠃꠞꠣꠔ ৪: ꠡꠥꠝꠣꠞꠤ 13:30

Ou shomoy Musar samne zeta manush dola asla, Kalute erar shurgul tamaia ḳoila, “Amrar lagi zorur oilo hono gia ou desh doḳol ḳora, ar ita amra farmu-o.”

ꠔꠃꠞꠣꠔ ৪: ꠡꠥꠝꠣꠞꠤ 17:6

Teu Musae ita hoḳolta Boni Israilre zanaila. Ar tarar baf-dadar ḳandan mafik forteḳ shordare zarzir ḳandanor torof taki egu ḳori, muṭ baro ḳandanor baroṭa laṭi ania dila. Ou laṭintor egu laṭi asil Harun nobir.

ꠔꠃꠞꠣꠔ ৪: ꠡꠥꠝꠣꠞꠤ 20:2

Hino ḳaibar kunu fani na faoae Boni Israile Musa ar Harunor birudde dol bandia erar fise lagla.

ꠔꠃꠞꠣꠔ ৪: ꠡꠥꠝꠣꠞꠤ 24:8

Allae Mishor taki tarare bar ḳori anchoin, tain oila tarar fokke bolala zongli boyra, tarar loge zoto zatie lagba, itare tara gilia ḳailiba, tarar aḍḍi-guḍḍire guṛa guṛa ḳorba, tir-donukdi tarare gatiba.

ꠁꠘ꠆ꠎꠤꠟ ১: ꠝꠕꠤ 1:23

Mabude bataisla, “Huno, eḳzon abiati shoti narir feṭo hurutta aibo, tain eḳ fuar zonom diba, i fuare ḍaḳa oibo Immanuel.” I namor mani oilo, Alla amrar loge asoin.

Injil 6: Ruman 8:31

Oḳon ita befare amra kita ḳoitam? Shoyong Alla Pak zebla amrar fokke, te amrar bifokke ḳegu lagto?

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 1:21

Huno, tumrar Mabud Allar dan ḳora ou asta desh-u tumrar samne foṛi roise. Oḳon zao, gia tumrar baf-dadar Mabud Allar oada ḳora ou deshre doḳol ḳoro. Ḳeu ḍoraio na, nirash oio na.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 1:26

“Oile tumra ou desho zaite razi oilae na. Tumra nizor Mabud Allar hukumor birudita ḳorlae.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 1:29

“Ita hunia ami tumrare ḳoislam, tumra mon gabṛaio na, itare ḍoraio na.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 31:6

Tumrar bukut bol raḳo ar shaosh ḳoro. Ḍoraio na, tarare dekia gabṛaio na. Mono rakio, tumrar Mabud Alla tumrar loge loge zaira, tain kunumonte-u tumrare saṛta nae, kunu halote-u tumrare falaita nae.”

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 31:8

Shoyong Mabud tumar age age roiba, tumare shaijjo ḳorba, tain tumare-o saṛta nae ar tumare falaita-o nae, te tumi ḍoraio na, shaosh araio na.”

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 32:42

Tir-donuke lou ḳaia ḳorbo matlami, amar toluare-o to lou ḳaibo zani. Murda ar bondi oḳlor lou he ḳaibo, dushmonor gust ḳaia feṭ fulaibo. Lamba-suli sifair ḳolla ḳaibore muke, tarar ḳolla sibai kaibo amar donuke.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 7:18

Oile tumra itare ḍoraio na. Feraun ar asta Mishor deshor ufre tumrar Mabud Allae kita ḳorsoin, ita tumra faurio na.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 7:21

Te tumra itare ḍoraio na, zano to, tumrar Mabud Alla zein tumrar loge boshot ḳoroin, ein boṛo boyonkor ar mohan.

ꠔꠃꠞꠣꠔ ৫: ꠖꠥꠍꠞꠣ-ꠛꠄꠀꠘꠤ 9:7

“Ar hou morubumir maze tumra kila nizor Mabud Allar gusa tulaislae, ikan mono rakio, kunudin faurio na. Mishor desh saṛia aoar din taki oḳano aoa forzonto, hamesha tumrar monor bitre Mabudor birudita ase.

Injil 11: Filifia 1:27

Asol befar oilo, tumra zarzir zindegire ou nomunae ḳaṭao, ze zindegi al-Mosir kush-ḳobrir laḳ. Teu ami nize aia deki ba duroi taki huni, ami buzmu, tumra dile-zane milia mozbut aso. Ar kush-ḳobrir mazdi ze iman foyda oy, ou imanor lagi hoḳole milia eḳ dile menot ḳorrae.